ការលាលែងនេះ វាគ្រាន់តែជាការរំងាប់កំហឹងក្រុមបាតុករបានខ្លះៗប៉ុណ្ណោះ ដ្បិតថា ក្រុមបាតុករបានទាមទារឲ្យមេដឹកនាំកំពូលរបស់រដ្ឋាភិបាលស្រីលង្កា ត្រូវលាលែងពីតំណែងទាំងអស់ រួមទាំងលោកប្រធានាធិបតីផងដែរ។ក្រុមបាតុករចាត់ទុកក្រុមមេដឹកនាំរដ្ឋាភិបាលស្រីលង្ការទាំងនេះ អសមត្ថភាពធ្វើឲ្យប្រទេសធ្លាក់ចូលក្នុងវិបត្តិសេដ្ឋកិច្ចធ្ងន់ធ្ងរមិនធ្លាប់មានក្នុងប្រវត្តិសាស្ត្រ។ នេះបើយោងតាមប្រភពព័ត៌អន្តរជាតិធំៗជាច្រើនចុះផ្សាយថ្ងៃនេះ។
ប្រទេសស្រីលង្កាពេលនេះ កំពុងជួបបញ្ហាអសន្តិសុខសង្គម និង ធ្លាក់ចូលទៅក្នុងវិបត្តិសេដ្ឋកិច្ចយ៉ាងធ្ងន់ធ្ងរ ដែលបណ្តាលមកពីការធ្លាក់ចុះទុនបម្រុងអន្តជាតិ និង ការជំពាក់បំណុលបរទេសជាច្រើនសន្ធឹកសន្ទាប់។
នៅប៉ុន្មានសប្ដាហ៍មកនេះ ប្រទេសស្រីលង្កាបានកើតមានភាពវឹកវរយ៉ាងខ្លាំង ដោយសារក្រុមបាតុករបានចេញតាមដងផ្លូវប្រឆាំងតវ៉ានឹងរដ្ឋាភិបាល។ ហើយរដ្ឋាភិបាលស្រីលង្កាក៏បានសម្រេចប្រកាសដាក់ប្រទេសក្នុងគ្រាអាសន្ន និងដាក់បម្រាមគោចរផងដែរ។ យ៉ាងណាមិញ នៅថ្ងៃទី ១០ ខែឧសភា រដ្ឋាភិបាលដាក់ពង្រាយកងទ័ព និងប៉ូលីស រាប់ពាន់នាក់ ដើម្បីអនុវត្តវិធានការបម្រាមគោចរ បន្ទាប់ពី មានមនុស្ស៧នាក់ត្រូវបានស្លាប់ក្នុងអំពើហិង្សាដែលបានកើតមានទៅលើក្រុមបាតុករនៅអំឡុងប៉ុន្មានសប្ដាហ៍មកនេះ។
បន្ថែមពីនេះ ក៏មានមនុស្សប្រហែល ២០០នាក់ទៀត បានរងរបួស ក្នុងអំឡុងពេលអាជ្ញាធរបង្ក្រាបទៅលើក្រុមបាតុករនៅថ្ងៃទី ១០ ខែឧសភា ខណៈនៅថ្ងៃដដែលនោះ លោកនាយករដ្ឋមន្ត្រី ម៉ាហីនដា រ៉ាចាប៉ាក់សា ក៏បានសម្រេចលាលែងពីតំណែងដែរ ប៉ុន្ដែ វាគ្រាន់តែអាចរំសាយកំហឹងរបស់ក្រុមបាតុករតិចតួចប៉ុណ្ណោះ ដ្បិតក្រុមបាតុករចង់ឲ្យថ្នាក់ដឹកនាំកំពូលរដ្ឋាភិបាលៗចុះពីតំណែង។
លោក ម៉ាហ៊ីនដា រ៉ាចាប៉ាក់សា នាយករដ្ឋមន្ត្រីប្រទេសស្រីលង្ការបានអះអាងថា លោកបានផ្ញើលិខិតជូនដំណឹងដល់ប្អូនប្រុសរបស់លោក ដែលជាប្រធានាធិបតីស្រីលង្កា គឺលោក គូតាប៉ាយ៉ា រ៉ាចាប៉ាក់សា (Gotabaya Rajapaksa) អំពីការសម្រេចចិត្តរបស់លោកក្នុងការលាលែងពីតំណែងរួចរាល់ហើយ។
ប៉ុន្ដែ មន្ត្រីជាន់ខ្ពស់នៅក្នុងការិយាល័យរបស់លោកនាយករដ្ឋមន្ត្រី ម៉ាហ៊ីនដា នេះ បានប្រាប់សារព័ត៌មានជប៉ុន Nikkei ថា លោកមិនទាន់ទទួលបានការបញ្ជាក់ណាមួយថា លិខិតសុំលាលែងពីដំណែងនេះត្រូវបានអនុម័តនៅឡើយទេ។
អត្ថបទគួរអាន
ទោះយ៉ាងណា ភ្លាមៗក្រោយពីលេចឭដំណឹងពីការលាលែងតំណែងរបស់លោកនាយករដ្ឋមន្ត្រីស្រីលង្ការ រួចមក ពលរដ្ឋក្នុងប្រទេសដីកោះស្រីលង្កាមួយនេះបានដុតផាវ និង បាញ់កាំជ្រួចដើម្បីអបអរសាទរយ៉ាងច្រើនកុះករ។
សូមបញ្ជាក់ថា នៅអំឡុងពេលបាតុកម្មនោះ ក្រុមប៉ូលីសបានវាយប្រហារបាតុករ និងបានបំផ្លាញទីតាំងនានា ដែលជាកន្លែងសម្រាប់ធ្វើបាតុកម្មប្រចាំថ្ងៃក្នុងរយៈពេល១ខែកន្លងមកនេះ។
ទោះបីជា មានបម្រាមគោចរក៏ដោយ ផ្ទះ និង ការិយាល័យជាច្រើនរបស់សមាជិកសភាជាន់ខ្ពស់របស់រដ្ឋាភិបាល និង អ្នកនយោបាយបក្សកាន់អំណាចត្រូវបានដុតបំផ្លាញដោយហ្វូងបាតុករដែលមានកំហឹងជាខ្លាំង។
- គួរជម្រាបថា សេដ្ឋកិច្ចប្រទេសស្រីលង្កា កំពុងដុនដាបកាន់តែខ្លាំងទៅៗហើយ ដោយសារតែរដ្ឋាភិបាលខ្វះរូបិយវត្ថុបរទេសដើម្បីទ្រទ្រង់ដល់ការនាំចូលទំនិញ គួបផ្សំនឹងការជំពាក់បំណុលបរទេសវណ្ឌករជាដើម។ យ៉ាងណាមិញ រដ្ឋមន្ត្រីហិរញ្ញវត្ថុស្រីលង្កា កាលពីសប្តាហ៍មុនបានប្រកាសថាស្រីលង្កាមានទុនបម្រុងត្រឹមតែ ៥០ លានដុល្លារប៉ុណ្ណោះ។ បច្ចុប្បន្នស្រីលង្កាកំពុងចរចាជាមួយមូលនិធិរូបិយវត្ថុអន្តរជាតិ (IMF) សម្រាប់ថវិការជំនួយ ប៉ុន្តែអ្នកជំនាញអះអាងថា ការស្នើរសុំនេះនឹងចំណាយពេលជាច្រើនខែបន្តទៀត ដើម្បីទទួលបានការអនុម័ត៕
អត្ថបទ៖ វ៉ាន់ ស្រីរ័ត្ន
None
