ដូច្នេះ ទើបរាជរដ្ឋាភិបាលថៃកំពុងជំរុញឲ្យមានការអន្តរាគមន៍ ដើម្បីធ្វើឲ្យតម្លៃប្រេងឥន្ធនៈលក់រាយលើទីផ្សារនៅមានក្នុងតម្លៃទាបដែលអាចទទួលយកបានសម្រាប់ពលរដ្ឋ ខណៈដែលកន្លងមករាជរដ្ឋាភិបាលថៃ បានចំណាយប្រហែល២០០លានដុល្លារក្នុងមួយខែដើម្បីឧបត្ថម្ភធនជួយឲ្យតម្លៃប្រេងឥន្ធនៈលក់រាយលើទីផ្សារនៅរក្សាបានក្នុងតម្លៃទាបសម្រាប់ពលរដ្ឋ។ នេះបើតាមការរាយការណ៍ពីកាសែតបាងកកប៉ុស្ដិ៍។
ដើម្បីជួយទប់តម្លៃប្រេងកុំឱ្យឡើងខ្ពស់ពេក ការិយាល័យមូលនិធិប្រេងឥន្ធនៈរបស់ថៃ កាលពីមុនបានចំណាយប្រាក់ចំនួនជាង ២០០ លានដុល្លារក្នុងមួយខែ ដើម្បីជួយកាត់បន្ថយតម្លៃប្រេង ដែលកំពុងតែមានការកើនឡើង។ តាមរយៈការឧបត្ថម្ភធននេះ តម្លៃប្រេងម៉ាស៊ូតលក់រាយនៅថៃមានតម្លៃប្រមាណ ៩០សេនក្នុងមួយលីត្រ ខណៈដែលប្រេងសាំងធម្មតាវិញមានតម្លៃប្រមាណ១ដុល្លារក្នុងមួយលីត្រ។ ប៉ុន្ដែ សម្រាប់ការឧបត្ថម្ភធនថ្មីៗនេះ ទំនងជានឹងត្រូវកើនឡើងបន្ថែមទៀត ដោយសារតម្លៃប្រេងពិភពលោកបច្ចុប្បន្នត្រូវបានគេរំពឹងថានឹងឡើងដល់ ៨៨ ទៅ ៩៣ ដុល្លារក្នុងមួយធុងបារ៉ែលក្នុងសប្តាហ៍នេះ។
ការិយាល័យមូលនិធិប្រេងឥន្ធនៈថៃ ដែលបច្ចុប្បន្នមានបំណុលជាង ៤០០លានដុល្លារនោះ នឹងត្រូវទទួលបានកម្ចីជាង ៦០០ លានដុល្លារពីធនាគារពាណិជ្ជ និងប្រាក់កម្ចីបណ្តោះអាសន្នចំនួនជាង ៣០០លានដុល្លារក្នុងរយៈពេលប៉ុន្មានខែខាងមុខនេះ ដើម្បីគាំទ្រកម្មវិធីឧបត្ថម្ភធនរបស់ខ្លួន។ សូមជម្រាបថា ប្រាក់កម្ចីទាំងនេះ គឺជិតស្មើនឹងទំហំកម្ចីដែលកំណត់ដោយច្បាប់ត្រឹមចំនួនជាង ១ពាន់ ២រយលាន ដុល្លារដែលនៅក្រោមច្បាប់ការិយាល័យមូលនិធិប្រេងឥន្ធនៈ ។
អត្ថបទគួរអាន
តែយ៉ាងណាមិញ លេខាធិការអចិន្ត្រៃយ៍នៃក្រសួងថាមពលថៃបាននិយាយថា ការឧបត្ថម្ភធននឹងលើសពី ២០០លានដុល្លារក្នុងមួយខែ ដោយសារការកើនឡើង ១ ដុល្លារនៃតម្លៃប្រេងឆៅនឹងធ្វើឱ្យតម្លៃប្រេងលក់រាយកើនឡើងបន្តិចបន្ថែមទៀត។
ទន្ទឹមនេះ ការកើនឡើងតម្លៃថាមពល ក៏ពាក់ព័ន្ធនឹងការកើនឡើងនៃតម្លៃអគ្គិសនីផងដែរ ដោយសារតែតម្លៃឧស្ម័នធម្មជាតិរាវ (LNG) កាន់តែកើនខ្ពស់។ ការផ្គត់ផ្គង់ឧស្ម័ន LNG ពីប្រភពក្នុងស្រុកត្រូវបានគេរំពឹងថា នឹងថយចុះដោយសារតែការពន្យារពេលក្នុងការផលិតឧស្ម័ននៅឯប្លុកឧស្ម័ន Erawan ក្នុងឈូងសមុទ្រថៃ ។ ដូចនេះហើយ ទើបប្រទេសថៃទិញឧស្ម័ន LNG ច្រើនពីបរទេស។
យ៉ាងណាមិញ បច្ចុប្បន្ននេះអាជ្ញាធរថៃកំពុងព្យាយាមគ្រប់គ្រងតម្លៃប្រេង ចំពេលមានជម្លោះក្នុងចំណោមប្រទេសបូមប្រេងមួយចំនួន ដែលគំរាមកំហែងដល់ទីផ្សារតម្លៃប្រេងពិភពលោកបន្ថែមទៀត៕
អត្ថបទ ស៊ើង និមល់
None
