លោក ត្រាំ អះអាងថា លោកប្រហែលជាប្ដូរចិត្តឈប់ដកប្រធានធនាគារកណ្ដាលអាម៉េរិក ចេញពីតំណែងវិញហើយ

ក្រោយធនាគារកណ្តាលអាម៉េរិក សម្រេចរក្សាអត្រាការប្រាក់ឱ្យនៅដដែលដោយគ្មានការផ្លាស់ប្តូរកាលពីពេលថ្មីៗ លោក ដូណាល់ ត្រាំ ប្រធានាធិបតីអាម៉េរិក បានចេញមកនិយាយជាថ្មីថា លោកអាចនឹងដកលោក ជើរ៉ូម ផៅវែល (Jerome Powell) ចេញពីតំណែងប្រធានធនាគារកណ្តាលអាម៉េរិក ដែលលោកបានរិះគន់ជាញឹកញាប់ចំពោះការមិនបញ្ចុះអត្រាការប្រាក់។

តាមរយៈសារមួយបង្ហោះលើបណ្ដាញទំនាក់ទំនងសង្គម Truth Social លោក ដូណាល់ ត្រាំ បានចោទជាសំណួរថា ហេតុអ្វីក្រុមប្រឹក្សាភិបាលរបស់ធនាគារកណ្ដាលអាម៉េរិក គ្មានសិទ្ធិអំណាចជំទាស់សេចក្ដីសម្រេចរបស់លោក ជើរ៉ូម ផៅវែល ហើយបានព្រលយពាក្យថា លោកប្រហែលជាដកតំណែងរបស់លោក ជើរ៉ូម ផៅវែល ទោះបីជាអាណត្តិរបស់ប្រធានធនាគារកណ្ដាលរូបនេះនឹងបញ្ចប់ជាផ្លូវការនៅក្នុងពេលឆាប់ៗនេះក្ដី។

លោក ដូណាល់ ត្រាំ បានទទួលស្គាល់ថា ការរិះគន់របស់លោកអាចនឹងធ្វើឱ្យលោក ជើរ៉ូម ផៅវែល ពិបាកចាត់វិធានការ ហើយបានអះអាងថា រូបលោកផ្ទាល់បានព្យាយាមធ្វើគ្រប់យ៉ាងដើម្បីជំរុញឱ្យបញ្ចុះអត្រាការប្រាក់។

តាមច្បាប់ប្រធានធនាគារកណ្ដាលអាម៉េរិក ត្រូវបានការពារពីការដកតំណែងលើកលែងតែក្នុងករណីប្រព្រឹត្តកំហុសធ្ងន់ធ្ងរ ប៉ុន្តែលោក ដូណាល់ ត្រាំ ជាញឹកញាប់បានគំរាមដកតំណែងលោក ជើរ៉ូម ផៅវែល។ ទោះជាយ៉ាងណាពេលនេះលោក ត្រាំ បាននិយាយថា លោកប្ដូរចិត្តវិញហើយ គឺលោកនឹងមិនដកដំណែងលោក ជើរ៉ូម ផៅវែល នោះទេ។

សូមបញ្ជាក់ថា កាលពីពេលថ្មីៗនេះ ធនាគារកណ្ដាលអាម៉េរិក បានសម្រេចរក្សាអត្រាការប្រាក់ឱ្យនៅដដែលចន្លោះពី៤,២៥% ទៅ៤,៥០% ហើយបានព្យាករថា សេដ្ឋកិច្ចអាម៉េរិក នឹងសម្រេចបានកំណើនយឺត អត្រាគ្មានការងារធ្វើនឹងហក់ឡើងខ្ពស់ ហើយអតិផរណានៅតែស្ថិតក្នុងអត្រាខ្ពស់មិនងាយនឹងថយចុះរហូតដល់ដំណាច់ឆ្នាំ២០២៥ នេះ៕

ដោយ: តែម សុខុម