រដ្ឋលេខាធិការប្រចាំការក្រសួងពាណិជ្ជកម្មថៃ លោកប៊ូនយ៉ារិទ្ធ បាននិយាយថា លោកនឹងស្នើទៅកាន់រដ្ឋមន្ត្រីក្រសួងពាណិជ្ជកម្មថៃឲ្យជួយជំរុញដាក់ចេញនូវវិធានការសង្គ្រោះអាជីវកម្មដែលកំពុងរកស៊ីនៅភូមាដែលកំពុងរងទុក្ខលំបាកទាំងនោះ រួមទាំងការកាត់បន្ថយពន្ធ និងការផ្ដល់នូវគម្រោងប្រាក់កម្ចីការប្រាក់ទាបជាដើម។
បើតាមលោក ប៊ូនយ៉ារិទ្ធ អាជីវកម្មថៃ នៅភូមាភាគច្រើនជាអាជីវកម្មខ្នាតតូច និងមធ្យម គឺរងផលប៉ះពាល់ខ្លាំងជាងគេ។ ភាគច្រើននៃអាជីវកម្មទាំងនោះ កំពុងប្រឈមមុខនឹងកង្វះខាតកម្លាំងពលកម្ម ដោយសារតែការប្រឈមមុខដាក់គ្នារវាងរបបយោធា និងក្រុមបាតុករ។ ជាមួយគ្នានេះ ការដឹកជញ្ជូនទំនិញក៏ត្រូវបានរំខាន ហើយសហគ្រាសខ្លះកំពុងប្រឈមមុខនឹងបញ្ហាសាច់ប្រាក់ផងដែរ។
មន្ត្រីជាន់ខ្ពស់ថៃរូបនេះ បានគូសបញ្ជាក់ទៀតថា ប្រសិនជម្លោះនយោបាយកាន់តែកើនឡើង និងមានអំពើហិង្សាកាន់តែខ្លាំងនោះ នៅពេលខាងមុខនឹងមានការដាក់ទណ្ឌកម្មពីអន្តរជាតិកាន់តែច្រើនថែមទៀតទៅលើប្រទេសភូមា ហើយអាជីវកម្មថៃនៅទីនោះ នឹងប្រឈមមុខនឹងបញ្ហាកាន់តែច្រើនដែរ។
អត្ថបទទាក់ទង
ហេតុអ្វី ក៏អាជីវកម្មថៃនៅភូមាត្រូវរងទុក្ខខ្លាំង?
ដូចយើងដឹងស្រាប់ហើយ ប្រទេសថៃ គឺជាប្រទេសមួយ ដែលមានការវិនិយោគរកស៊ីច្រើននៅភូមា បើសិនជាភូមាជួបទណ្ឌកម្មសេដ្ឋកិច្ចកាន់តែច្រើន នោះរោងចក្រផលិតរបស់ថៃនៅភូមានឹងមិនអាច នាំចេញផលិតផលទៅកាន់ប្រទេសដែលបានដាក់ទណ្ឌកម្មមកលើភូមានោះបានទេ ពិសេសរោងចក្រថាមពលតែម្ដង។
មានក្រុមហ៊ុនមួយចំនួនបានស្នើដល់រដ្ឋាភិបាលថៃ ឲ្យមានការពិចារណាកាត់បន្ថយពន្ធលើប្រាក់ចំណូលសម្រាប់ពួកគេ។ មួយវិញទៀត ពួកគេក៏ស្នើឲ្យរដ្ឋាភិបាលផ្ដល់ជូននូវប្រាក់កម្ចីអត្រាការប្រាក់ទាបសម្រាប់ការវិនិយោគនៅភូមាផងដែរ។
យ៉ាងណាក៏ដោយចុះ មកទល់ពេលនេះ ប្រទេសថៃ និងមីយ៉ាន់ម៉ា នៅតែមានការដឹកជញ្ជូនតាមព្រំដែនដូចធម្មតា ដោយមានឡានដឹកជញ្ជូនទំនិញប្រមាណ៧០០ទៅ៨០០គ្រឿងក្នុងមួយថ្ងៃ។
ជុំវិញនឹងស្ថានភាពនៅភូមានេះដែរ សម្រាប់កម្ពុជាវិញ បើតាមអ្នកនាំពាក្យក្រសួងការបរទេស ឯកឧត្តម កុយ គួង បានបញ្ជាក់ប្រាប់ខេមបូណូមីសថ្មីៗនេះថា បច្ចុប្បន្នយើងមានពលរដ្ឋខ្មែរ ដែលធ្វើការងារ និងរកស៊ីនៅក្នុងប្រទេសភូមានេះប្រមាណ ជាង១ពាន់នាក់ ហើយស្ថានទូតកម្ពុជាប្រចាំប្រទេសនោះបានយកចិត្តទុកដាក់យ៉ាងខ្លាំងចំពោះបញ្ហានេះ។
អ្នកនាំពាក្យក្រសួងការបរទេសកម្ពុជា បានអះអាងទៀតថា មកទល់ពេលនេះ មិនទាន់មានពលរដ្ឋខ្មែររងផលប៉ះពាល់ពីការបាតុកម្មនៅភូមានេះនោះទេ ព្រោះភាគច្រើនអ្នកដែលកំពុងស្នាក់នៅនិងធ្វើការនៅទីនោះ គឺធ្វើការនៅរោងចក្រ សហគ្រាស និងឧស្សាហកម្មនៅតាមបណ្តោយព្រំដែនភូមា និងថៃតែប៉ុណ្ណោះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
