ក៏ប៉ុន្តែ ប្រធានាធិបតីអ៊ុយក្រែនរូបនេះគូសបញ្ជាក់ថា កាចរចា ត្រូវការពេលវេលាបន្ថែមទៀត។ បើទោះបីជា វាមានការបង្ហាញសញ្ញាវិជ្ជមានក្នុងកិច្ចចរចាសន្តិភាពក៏ដោយ ប៉ុន្ដែ ស្នូគ្រាប់កាំភ្លើង និងការបាញ់ផ្លោងគ្រាប់មីស៊ីល ពីសំណាក់កងទ័ពរុស្ស៊ី ទៅលើអ៊ុយក្រែន គឺនៅតែបន្តវាយប្រហារដដែល ពិសេសការវាយប្រហារតាមផ្លូវអាកាសមកលើទីក្រុងសំខាន់ៗ រួមទាំងរដ្ឋធានីកៀវរបស់អ៊ុយក្រែនផងដែរ។
ប្រធានាធិបតីអ៊ុយក្រែនហ្សេលេនស្គី បានថ្លែងនៅថ្ងៃពុធសប្ដាហ៍នេះថា៖ កិច្ចប្រជុំនៅតែបន្ត ហើយរូបលោកបានទទួលដំណឹងមកថា ការចរចាលើកចុងក្រោយនេះ ស្តាប់មើលទៅកាន់តែមានភាពប្រាកដប្រជាច្រើនជាងមុនហើយ។ ប៉ុន្តែពេលវេលានៅតែត្រូវការបន្ថែមទៀតសម្រាប់ការសម្រេចចិត្តដើម្បីជាផលប្រយោជន៍របស់អ៊ុយក្រែន។
គួរជម្រាបថា កាលពីថ្ងៃអង្គារម្សិលមិញ រុស្ស៊ី-អ៊ុយក្រែន បានបន្តកិច្ចចរចាសន្តិភាពជុំទី៥របស់ខ្លួនតាមប្រព័ន្ធវីដេអូអនឡាញ ដែលជាការពិភាក្សាគ្នាពីចម្ងាយលើកទី២ហើយតាមអនឡាញហ្នឹង បន្ទាប់ពីការចរចាតាមអនឡាញលើកដំបូងកាលពីថ្ងៃចន្ទដើមសប្តាហ៍នេះ មិនទទួលបានផ្លែផ្កាគួរឲ្យកត់សម្គាល់នោះទេ។
យ៉ាងណាមិញ ការអះអាងពីភាគីរុស្ស៊ីមិនសូវជាស្របគ្នានឹងការលើកឡើងរបស់ភាគីអ៊ុយក្រែនប៉ុន្មានឡើយ។ អ្នកនាំពាក្យវិមានក្រឹមឡាំង លោក ឌីមេទ្រី ប៉េសស្កូវ និយាយថា វាដូចជាលឿនរហ័សពេកសម្រាប់ការប៉ាន់ស្មានដំណើរការចរចាទុកជាមុន។ វាជារឿងពិបាកសម្រាប់ការស្វែងរកកិច្ចព្រមព្រៀងសន្តិភាពមួយ យើងសង្ឈឹមថា ការពិភាក្សាគ្នាក្រោយៗទៀតនឹងឈរលើភាពជាវិជ្ជមានទៅចុះ។
គួរបញ្ជាក់ថា ចាប់តាំងតែពីដើមមក រុស្ស៊ីបានហៅសកម្មភាពយោធារបស់ខ្លួននៅក្នុងប្រទេសអ៊ុយក្រែនថា ជាប្រតិបត្តិការយោធាពិសេសដើម្បីរំដោះប្រជាជនអ៊ុយក្រែន និងមិនបានចាត់ទុកថា វាជាសកម្មភាពឈ្លានពានអ៊ុយក្រែនឡើយ បើទោះបីជាអន្តរជាតិជាច្រើនបានចេញថ្កោលទោសពីទង្វើរបស់រុស្ស៊ីក៏ដោយ។ ជាក់ស្ដែង សម្ព័ន្ធមិត្តអ៊ុយក្រែន និងលោកខាងលិច ហៅសកម្មភាពយោធារបស់រុស្ស៊ីថា ជាលេសដែលគ្មានមូលដ្ឋានត្រឹមត្រូវសម្រាប់បង្កសង្គ្រាម។ មកទល់ពេលនេះ សង្គ្រាមដែលអូសបន្លាយអស់ជាង២០ថ្ងៃមកហើយ បានបង្កើនការភ័យខ្លាចថា វាអាចរាលដាលកាន់តែទូលំទូលាយនៅក្នុងតំបន់អឺរ៉ុប។
សេតវិមានអាមេរិក បាននិយាយថា ប្រធានាធិបតីអាមេរិកចូ បៃឌិន នឹងធ្វើទស្សនកិច្ចជាលើកដំបូងមួយទៅកាន់តំបន់អឺរ៉ុបនៅសប្តាហ៍ក្រោយ ចាប់តាំងពីរុស្ស៊ីបានឈ្លានពានអ៊ុយក្រែន ក្នុងគោលដៅពិភាក្សាអំពីវិបត្តិមួយនេះ ជាមួយសម្ព័ន្ធមិត្តណាតូ។ លោកបៃឌិន នឹងត្រូវចូលរួមកិច្ចប្រជុំមេដឹកនាំណាតូនៅទីស្នាក់ការកណ្តាលរបស់សម្ព័ន្ធភាពយោធាមួយនេះ នៅទីក្រុងប្រ៊ុចសែល ប្រទេសបេលហ្សិកនៅថ្ងៃទី២៤ខែមីនា។ មន្ត្រីប្រចាំនៅសេតវិមានបានបង្ហើបឲ្យដឹងថា លោក បៃឌិន នឹងធ្វើការប្រកាសផ្តល់ជំនួយផ្នែកសន្តិសុខចំនួន ៨០០លានដុល្លារបន្ថែមទៀតដល់អ៊ុយក្រែននៅថ្ងៃនោះផងដែរ។
អត្ថបទគួរអាន
តើនៅចុងក្រោយនេះ រុស្ស៊ីបន្តការវាយប្រហារខ្លាំក្លាអ្វីខ្លះនៅអ៊ុយក្រែន?
ទីក្រុងនានារបស់អ៊ុយក្រែន នៅតែជាគោលដៅវាយប្រហាររបស់រុស្ស៊ី ពិសេសការវាយប្រហារតាមផ្លូវអាកាស។ រដ្ឋធានីកៀវ ជាគោលដៅធំបំផុតមួយរបស់ម៉ូស្គូ ប៉ុន្តែនៅតែមិនអាចវាយដណ្តើមបាន អស់ពេលជាច្រើនថ្ងៃមកនេះ។
ការទម្លាក់គ្រាប់បែកបានឆក់យកជីវិតមនុស្ស ខណៈអគារជាច្រើនត្រូវភ្លើងឆេះ ហើយមនុស្សបានកប់ក្រោមគំនរបាក់បែក។ រុស្ស៊ីអះអាងថា ខ្លួនមិនមានបំណងវាយប្រហារ ដោយកំណត់គោលដៅលើជនស៊ីវិលនោះទេ។ ប្រជាជនក្នុងទីក្រុងកៀវជិត២លាននាក់បានភៀសខ្លួនចេញពីលំនៅដ្ឋាន ដោយអ្នកខ្លះបានទៅស្នាក់នៅតាមស្ថានីយ៍រថភ្លើងក្រោមដី។
សូមជម្រាបថា ចាប់តាំងពីបើកការឈ្លានពានលើអ៊ុយក្រែនកាលពីថ្ងៃទី២៤កុម្ភៈមក រុស្ស៊ីមិនទាន់កាន់កាប់យកទីក្រុងធំបំផុតទាំង១០របស់អ៊ុយក្រែននៅឡើយទេ លើកលែងតែទីក្រុងកំពង់ផែ ខឺសិន ភាគខាងត្បូងនៃប្រទេសជាប់នឹងសមុទ្រខ្មៅ។ ទីប្រឹក្សារដ្ឋអ៊ុយក្រែន បានប៉ាន់ស្មានថា សង្គ្រាមនេះអាចបញ្ចប់នៅក្នុងខែឧសភាខាងមុខ ដោយសម្អាងថា រុស្ស៊ីនឹងអស់ធនធានបន្តការវាយប្រហារទៅមុខទៀត។ យ៉ាងណាក៏ដោយចុះ យើងនឹងចាំមើលបន្ដទៀតថា តើវិបត្តិសង្គ្រាមនៅអ៊ុយក្រែននេះ វានឹងត្រូវបន្ដអូសបន្លយយូរជាងនេះ ឬក៏យ៉ាងណា ហើយផលប៉ះពាល់អ្វីខ្លះទៀត ដែលបង្កឡើងដោយសង្គ្រាមនៅតំបន់អឺរ៉ុបមួយនេះ?
None
