លោកបណ្ឌិត តាន់ មុន្នីវណ្ណ អះអាងថា និស្សិតដែលរៀនចប់បរិញ្ញាប័ត្រកសិកម្ម គឺអាចមានសមត្ថភាពធ្វើការផ្នែកនេះត្រឹម ១០%នៃជំនាញនេះប៉ុណ្ណោះ។ លោកបន្តថា មកដល់ពេលនេះ ក្រុមហ៊ុនរបស់លោករកមេការដាំស្វាយ មកធ្វើការមិនគ្រប់ចំនួនផង។ លោកបន្ថែមថា ៖និស្សិតរាប់ពាន់នាក់ ទៅធ្វើទស្សនកិច្ចសិក្សានៅក្រុមហ៊ុនរបស់លោកជារៀងរាល់ឆ្នាំ ប៉ុន្តែ លោកពិបាករកអ្នកចង់រៀនចង់ចេះចង់ដឹងចង់រកស៊ីផ្នែកនេះណាស់។
លោកបញ្ជាក់ថា ព្រោះតែខ្លាចកម្ដៅថ្ងៃ ខ្លាចហត់ ខ្លាចលំបាក ទើបធ្វើឱ្យអ្នកសិក្សាបរិញ្ញាប័ត្រកសិកម្មមួយចំនួនរៀនចប់បរិញ្ញាបត្របែរជាទៅធ្វើជាបុគ្គលិកផ្នែកទីផ្សារ ឬទៅធ្វើការផ្សេងៗ ខុសជំនាញរៀន ទៅវិញ។
អត្ថបទទាក់ទង!
សព្វថ្ងៃនេះ ក្រុមហ៊ុន ម៉ុង ឬទ្ធី គ្រុប ជោគជ័យខ្លាំង ខាងជំនួញកសិកម្មនិងកសិឧស្សាហកម្ម។ ជំនួញទាំងនោះ រួមមាន ដូងប្រេង ចិញ្ចឹមជ្រូក ដំណាំដាំស្វាយនាំទៅអ៊ឺរ៉ុប សំណង់ ចំណីសត្វ សណ្ឋាគារ ។ល។
របាយការណ៍របស់ក្រសួងកសិកម្មបង្ហាញថា និស្សិតដែលរៀនចប់ជំនាញឯកទេសជាន់ខ្ពស់ និងបរិញ្ញាបត្រផ្នែកកសិកម្មមានប្រមាណជាង ១.២០០ នាក់ជារៀងរាល់ឆ្នាំ។ ក្នុងនោះ៩៥%ភាគបានទទួលការងារធ្វើ ខណៈដែលនិស្សិតមិនដល់ ៥០%ទេ ដែលធ្វើការងារជំនាញកសិកម្ម។
ធានាគារអភិវឌ្ឍន៍អាស៊ីក៏ទើបតែបានចេញរបាយការណ៍មួយព្រមានពីកង្វះអ្នកជំនាញ ឯកទេសនៅកម្ពុជាដែរ។ ក្នុងនោះ វិស័យកសិកម្មជាវិស័យមួយមានកំណើនទាបជាងគេ ក្នុងចំណោមវិស័យសំខាន់ៗ ដែលទ្រទ្រង់កំណើនសេដ្ឋកិច្ចនៅកម្ពុជា ខណៈដែលលំហូរកម្លាំងពលកម្មវិស័យនេះទៅក្រៅប្រទេសក៏នៅតែកើនឡើងពីមួយឆ្នាំទៅមួយឆ្នាំ៕
None
