បាតុកម្មកាលពីចុងសប្តាហ៍មុននេះនៅក្នុងរដ្ឋធានីសេអ៊ូលបានផ្ទុះឡើងបន្ទាប់ពីអ្នកគ្រូបង្រៀនម្នាក់ត្រូវបានគេប្រទះឃើញស្លាប់នៅក្នុងសាលាបឋមសិក្សាមួយកាលពីខែកក្កដា បន្ទាប់ពីមានសម្ពាធផ្លូវចិត្តបណ្តាលមកពីការត្អូញត្អែររបស់ឪពុកម្តាយសិស្សានុសិស្ស។
គ្រូបង្រៀនដែលបានប្រមូលផ្តុំគ្នាតវ៉ាជាច្រើនសប្តាហ៍មកនេះបាននិយាយថា ច្បាប់បច្ចុប្បន្នធ្វើឱ្យពិបាកក្នុងការគ្រប់គ្រងថ្នាក់រៀនរបស់ពួកគេ និងធ្វើឱ្យពួកគេរងសម្ពាធផ្លូវចិត្តពីការស្ដីបន្ទោសរបស់ឪពុកម្តាយសិស្ស ដែលអាចចោទយ៉ាងងាយថាគ្រូបានរំលោភបំពានលើកុមារ។
សមាជិកសភាកូរ៉េខាងត្បូងបច្ចុប្បន្នកំពុងជជែកដេញដោលសេចក្ដីព្រៀងច្បាប់មួយចំនួនដែលនឹងបំពេញតាមការទាមទាររបស់គ្រូបង្រៀន ដើម្បីឱ្យមានអភ័យឯកសិទ្ធិពីការចោទប្រកាន់ពីការបំពានលើកុមារ។ ប៉ុន្តែក្រុមអ្នកជំនាញបានលើកឡើងពីក្តីបារម្ភចំពោះការផ្លាស់ប្តូរដ៏មានសក្ដានុពលនេះដោយនិយាយថា សំណើនេះអាចធ្វើឱ្យការការពារកុមារកាន់តែចុះខ្សោយខណៈដែលគេបានប្រឹងប្រែងលើកកម្ពស់ជាច្រើនឆ្នាំក្នុងបរិយាកាសប្រកួតប្រជែងយ៉ាងខ្លាំងក្លា។
បើតាមក្រសួងអប់រំ និងទិន្នន័យសេវាធានារ៉ាប់រងសុខភាពជាតិដែលបានផ្តល់ឱ្យតំណាងរាស្រ្តគណបក្សប្រឆាំងសេរីម្នាក់ គឺលោកស្រី គីម វ៉ូនី (Kim Woni) កាលពីសប្តាហ៍មុនបានបង្ហាញថា សិស្សបឋមសិក្សា មធ្យម និងវិទ្យាល័យជាង៨២០នាក់បានស្លាប់ដោយសារការធ្វើអត្តឃាតនៅចន្លោះឆ្នាំ២០១៨ និងឆ្នាំ២០២២។
អត្ថបទគួរអាន
ក្រុមគ្រូបង្រៀន និងបុគ្គលិកសាលាដែលស្លៀកពាក់ពណ៌ខ្មៅរាប់ពាន់នាក់បានតវ៉ានៅជិតរដ្ឋសភាដោយស្រែកពាក្យស្លោក និងលើកបដាសរសេរថា«សូមផ្តល់អភ័យឯកសិទ្ធិគ្រូបង្រៀនឱ្យរួចផុតពីការចោទប្រកាន់ពីការរំលោភបំពានផ្លូវចិត្តរបស់កុមារ» ហើយថា គ្រូបង្រៀនជាង៩ពាន់នាក់ត្រូវបានឪពុកម្តាយរាយការណ៍ថា បានរំលោភបំពានលើកុមារក្នុងរយៈពេល៨ឆ្នាំចុងក្រោយនេះ។
លោក អាន ជី ហេ (Ahn Ji Hye) គ្រូបង្រៀន និងជាអ្នករៀបចំការតវ៉ាម្នាក់បាននិយាយថា គាត់សង្ឃឹមថា សេចក្ដីព្រៀងច្បាប់ដែលសមាជិកសភាកំពុងពិភាក្សាពេលនេះនឹងត្រូវបានអនុម័ត ឱ្យបានឆាប់តាម ដែលអាចធ្វើទៅបាន ដើម្បីការពារសិទ្ធិមានជីវិតរបស់គ្រូបង្រៀន និងផ្តល់អំណាចដល់គ្រូបង្រៀនក្នុងការផ្តល់ការអប់រំឱ្យបានល្អ។
ចំពេលមានការខឹងសម្បារកាន់តែខ្លាំងឡើងពីសំណាក់គ្រូបង្រៀន រដ្ឋាភិបាលអភិរក្សនិយមរបស់កូរ៉េខាងត្បូងបានចាប់ផ្តើមបង្កើតក្រុមការងារពិសេសមួយនៅដើមខែនេះ ដើម្បីស្វែងរកច្បាប់ថ្មីទាក់ទងនឹងការអប់រំដែលនឹងឆ្លុះបញ្ចាំងពីមតិរបស់គ្រូបង្រៀនក្នុងកិច្ចខិតខំប្រឹងប្រែងដើម្បីការពារពួកគេពីការចោទប្រកាន់ពីការរំលោភបំពានលើកុមារ។
ក្រសួងអប់រំ និងយុត្តិធម៌នៅក្នុងសេចក្តីប្រកាសព័ត៌មានរួមមួយបានចោទអតីតរដ្ឋាភិបាលសេរីរបស់ទីក្រុងសេអ៊ូលថា បានប្រើគោលនយោបាយដែល«សង្កត់ធ្ងន់លើសិទ្ធិរបស់កុមារ» ដែលពួកគេនិយាយថា បាននាំឱ្យមានការកើនឡើងនៃ«របាយការណ៍ពីការរំលោភបំពានលើកុមារដែលគ្មានការធានានោះឡើយ»៕
អត្ថបទ ៖ សុខ ជា
