លោក ចូ បៃឌិន ប្រធានាធិបតីអាមេរិក បាននិយាយកាលពីសប្ដាហ៍មុននេះថា លោកនឹងដាក់ឲ្យអនុវត្តបទបញ្ជាតម្រូវឲ្យបុគ្គលិកសុខាភិបាលត្រូវតែទទួលការចាក់វ៉ាក់សាំងកូវីដ១៩ ចាប់ពីថ្ងៃទី៤ខែមករាឆ្នាំ២០២២តទៅ។ ក្រោយពីមានការប្រកាសឡើងយ៉ាងដូច្នេះ ក្រុមប្រធានទីប្រឹក្សាផ្នែកច្បាប់របស់រដ្ឋចំនួន ១០ ដែលមកពីគណៈបក្សសាធារណៈរដ្ឋ បានរួមគ្នាដាក់ពាក្យប្ដឹងជំទាស់រដ្ឋបាលលោកចូបៃឌិនចំពោះការអនុវត្តបទបញ្ជានេះ។
ទីប្រឹក្សាផ្នែកច្បាប់ម្នាក់មកពីរដ្ឋ Kansas គឺលោក ឌឺរេក ស្មីត (Derek Schmidt) បាននិយាយថា ការដាក់ចេញនូវបទបញ្ជាបន្ថែម ទៅលើបុគ្គលិកនៅក្នុងវិស័យសុខាភិបាលនេះ នឹងធ្វើបញ្ហាកាន់តែធ្ងន់ធ្ងរឡើង ហើយបុគ្គលិកនឹងមិនមកធ្វើការទៀតនោះទេ។
នៅក្នុងពាក្យបណ្ដឹងបានបញ្ជាក់ទៀតថា បទបញ្ជារបស់រដ្ឋាភិបាលសហព័ន្ធ បានរំលោភលើអំណាចប៉ូលីសនៅក្នុងរដ្ឋ ហើយវាមិនស្របទៅតាមច្បាប់នៅក្រោមនីតិរដ្ឋបាលនោះឡើយ ពីព្រោះតែវាមិនត្រូវបានដាក់ឲ្យមានការបញ្ចេញមតិ មុនពេលបទបញ្ជានេះចេញនោះទេ។ ជាទូទៅ ដើម្បីអាចចេញបទបញ្ជា ឬច្បាប់បណ្ដោះអាសន្នបែបនេះបាន គេត្រូវបើកឲ្យមានការឆ្លងការផ្ដល់មតិយោបល់ក្នុងរយៈពេល៦០ថ្ងៃដែរ មុននឹងចេញច្បាប់។
អត្ថបទគួរអាន
តាមអ្វីដែលបានចែងក្នុងបទបញ្ជាដែលដាក់ចេញដោយរដ្ឋបាលលោកចូបៃឌិន សម្រាប់អ្នកផ្ដល់សេវាសុខាភិបាលទាំងឡាយណា ដែលមិនអនុវត្តតាមបទបញ្ជា ពោលគឺមិនបានចាក់វ៉ាក់សាំង នឹងត្រូវបាត់បង់សិទ្ធិក្នុងការទទួលបានមូលនិធិផ្ដល់ជូនដោយរដ្ឋ។ មូលនិធិទាំងនោះ រួមមានការផ្ដល់ជូនប្រាក់ឧបត្ថម្ភនៅពេលបុគ្គលិកទាំងនោះមានវ័យចាប់ពី៦៥ឆ្នាំឡើងទៅ ឬក៏មានពិការភាព និងមូលនិធិសម្រាប់ជនក្រីក្រជាដើម។
គួរបញ្ជាក់ថា បើទោះបីជា បច្ចុប្បន្ន អាមេរិកមានការចាក់វ៉ាក់សាំងបានក្នុងចំនួនច្រើនក៏ដោយចុះ ប៉ុន្ដែ ក៏នៅមានពលរដ្ឋមួយចំនួនពិសេសអ្នកដែលមាននិន្នាការទៅខាងគណៈបក្សសាធារណៈរដ្ឋ គឺមិនចង់ទទួលការចាក់វ៉ាក់សាំងនោះទេ ដែលវាបានធ្វើឲ្យរដ្ឋាភិបាលអាមេរិក មានការលំបាកមែនទែនក្នុងការទប់ទល់នឹងការឆ្លងកូវីដ១៩។ បន្ថែមពីនេះទៀត ក្រោយមានដំណឹងពីការរកឃើញថ្នាំគ្រាប់ព្យាបាលកូវីដ១៩រួចមក វាក៏បានធ្វើឲ្យរដ្ឋាភិបាលអាមេរិកបារម្ភកាន់តែខ្លាំងថា នឹងធ្វើឲ្យប៉ះពាល់ដល់យុទ្ធនាការចាក់វ៉ាក់សាំង ដ្បិតថា ពលរដ្ឋខ្លះមានទំនោរចង់ទទួលការប្រើប្រាស់ថ្នាំព្យាបាលកូវីដ១៩ ជាជាងការចាក់វ៉ាក់សាំង។ ទោះយ៉ាងណា ក្រុមអ្នកជំនាញសុខាភិបាលបានអះអាងថា ការដែលមិនព្រមទទួលវ៉ាក់សាំងនេះ វា គឺជាកំហុសធំមួយទៅថ្ងៃអនាគត ព្រោះថា មានតែវ៉ាក់សាំងទេ ដែលអាចការពារខ្លួនពីការឆ្លងកូវីដ១៩ និងការពារក្រុមគ្រួសារ និងអ្នកជុំវិញខ្លួនមិនឲ្យឆ្លងកូវីដ១៩ ហើយវ៉ាក់សាំងក៏មានសារសំខាន់ក្នុងការបង្កើតនូវភាពស៊ាំនៅក្នុងសហគមន៍ផងដែរ៕
None
