ប្រធានក្រុមប្រឹក្សាភិបាលក្រុមហ៊ុន Thai AirAsia លោក Tassapon Bijleveld បាននិយាយថា ក្នុងនាមលោកតំណាងឲ្យក្រុមហ៊ុនអាកាសចរណ៍ទាំង៨ នឹងជួបជាមួយរដ្ឋមន្ត្រីក្រសួងហិរញ្ញវត្ថុ លោក Uttama Savanayana ដើម្បីពិភាក្សាអំពីប្រាក់កម្ចីការប្រាក់ទាប ដើម្បីជួយដល់ក្រុមហ៊ុនអាកាសចរណ៍ក្នុងស្រុក ចំណាយទៅលើប្រាក់ខែបុគ្គលិក បន្ទាប់ពីក្រុមហ៊ុនទាំងនេះ បានរងផលប៉ះពាល់ធ្ងន់ធ្ងរដោយសារតែបញ្ហារីករាលដាលនៃមេរោគកូវី-១៩។
លោក Tassapon និយាយថា «នៅថ្ងៃពុធ (ទី២២ ខែមេសា) យើងនឹងមានកិច្ចប្រជុំមួយ ក្នុងចំណោមពួកយើង ហើយនឹងប្រកាសជាផ្លូវការនូវវិធានការណ៍ និងគោលនយោបាយ ទាក់ទងនឹងប្រតិបត្តិការអនាគតរបស់អាជីវកម្ម»។
អត្ថបទទាក់ទង!
តាមប្រភពព័ត៌មានបានបញ្ជាក់ថា ក្រុមហ៊ុនអាកាសចរណ៍ទាំង៨ បានដាក់ដាក់លិខិតទៅកាន់ក្រសួងរួចហើយកាលពីសប្ដាហ៍មុននេះ ដោយបានស្នើសុំប្រាក់កម្ចីការប្រាក់ទាប សរុបមានទំហំទឹកប្រាក់ប្រមាណ ២៤,១៥ ពាន់លានបាត ឬស្មើនឹងជាង ៧៤០ លានដុល្លារអាមេរិក។
ក្រុមហ៊ុនអាកាសចរណ៍ក្នុងស្រុកនៃប្រទេសថៃ ទាំង ៨នោះ រួមមាន ក្រុមហ៊ុន Bangkok Airways, Thai AirAsia, Thai AirAsia X, Thai Lion Air, Thai Vietjet Air, Thai Smile, Nok Air, និង NokScoot។
លោក Tassapon បន្ថែមទៀតថា «យើងក៏ចង់ឲ្យរាជរដ្ឋាភិបាលប្រកាសពីគោលនយោបាយឲ្យបានចាស់នៅសប្ដាហ៍នេះ ក្នុងការអនុញ្ញាតឲ្យមានការហោះហើរនៅក្នុងខែឧសភា ខណៈដែលមានក្រុមហ៊ុនអាកាសចរណ៍ជាច្រើនរួមទាំង AirAsia ផង បានត្រៀមខ្លួនរួចហើយ ដើម្បីចាប់ផ្ដើមបើកការហោះហើរឡើងវិញនៅថ្ងៃទី ១ ខែឧសភា»។ លោកគូសបញ្ជាក់ទៀតថា «ដោយសារតែមានខេត្តជាច្រើននៅបន្ដបិទនៅឡើយ ការហោះហើរត្រូវបានហាមឃាត់។ គោលនយោបាយច្បាស់លាស់ពីរាជរដ្ឋាភិបាល នឹងជួយឲ្យក្រុមហ៊ុនអាកាសចរណ៍ធ្វើការសម្រេចចិត្តលើកផ្លូវហោះហើរមួយណាដែលត្រូវបើក»។
![លោក Fernades នាយកប្រតិបត្តិ ក្រុមហ៊ុន AirAsia (រូបឆ្វេង) និងលោក Kamarudin Meranun ប្រធានក្រុមប្រឹក្សាភិបាល ក្រុមហ៊ុន AirAsia (រូបស្ដាំ) [រូបភាព៖https://kisahdunia.com]](https://cdn.cambonomist.com/media/images/canva-photo-editor_35_TrWZXHo.2e16d0ba.fill-300x168.png)
ទន្ទឹមគ្នានេះ ប្រភពព័ត៌មាន ពីក្រុមហ៊ុនអាកាសចរណ៍ Thai Lion Metari ឬហៅថា Thai Lion Air បានបង្ហាញថា ក្រុមហ៊ុននេះ បានបញ្ឈប់បុគ្គលិកចំនួន ១២០នាក់រួចហើយ ដែលពួកគេគឺជាបុគ្គលិកដែលបានធ្វើការងារនៅក្នុងក្រុមហ៊ុននេះ តិចជាង១ឆ្នាំ។
ប្រភពព័ត៌មាន បានបញ្ជាក់ថា «ក្រុមហ៊ុនបានខ្ចីប្រាក់ពីគ្រឹះស្ថានហិរញ្ញវត្ថុ ដើម្បីចំណាយលើការសងសំណងទៅកាន់បុគ្គលិកទាំងនេះទៅតាមច្បាប់កំណត់»។ ប្រភពបន្ថែមទៀតថា «ចាប់ពីថ្ងៃទី ០១ ខែឧសភា តទៅ ក្រុមហ៊ុននឹងចាប់ផ្ដើមឲ្យមានការឈប់សម្រាកដោយមិនទទួលបានប្រាក់ឈ្នួលផងដែរ រួមទាំងកម្មវិធីអនុញ្ញាតឲ្យបុគ្គលិកឆាប់ចូលនិវត្តន៍ ដោយឈរលើមូលដ្ឋានស្ម័គ្រចិត្ត ដើម្បីកាត់បន្ថយការចំណាយបន្ថែម»៕
None
