Advertisement
Advertisement
Advertisement
អាកាសចរណ៍ថៃ

ទីបំផុត Thai Airways ត្រូវបានគណៈរដ្ឋមន្ត្រីថៃ យល់ព្រមឲ្យប្រកាសក្ស័យធន


នៅទីបំផុត គណៈរដ្ឋមន្ត្រីថៃ កាលពីថ្ងៃអង្គារ ម្សិលមិញនេះ បានសម្រេចឲ្យក្រុមហ៊ុនអាកាសចរណ៍ Thai Airways ត្រូវតែធ្វើការស្ដារនីតិសម្បទា តាមរយៈការប្រកាសក្ស័យធនដោយតុលាការ ដោយការសម្រេចនេះ ត្រូវបានលោកប្រាយុទ្ធ ចាន់អូចា នាយករដ្ឋមន្ត្រីថៃ ចាត់ទុកថា គឺជាការលំបាកមួយ តែវាជារឿងចាំបាច់ត្រូវតែធ្វើ។
ទីបំផុត Thai Airways ត្រូវបានគណៈរដ្ឋមន្ត្រីថៃ យល់ព្រមឲ្យប្រកាសក្ស័យធន (រូបភាព៖ https://asia.nikkei.com )
ដោយ
Advertisement

លោក ប្រាយុទ្ធ ក៏បានទទូច​ឲ្យ​គណៈរដ្ឋមន្ត្រីថៃ ​សម្រេចចិត្ត​បោះបង់​ចោល​ការផ្ដល់​ហិរញ្ញវត្ថុ​ដល់​ក្រុមហ៊ុន​អាកាសចរណ៍ Thai Airways នេះ ព្រោះតែ​ត្រូវការ​សន្សំប្រាក់ទុក​សម្រាប់​គម្រោង​ផ្ដល់ជំនួយ​ ដែលចាំបាច់​ ដើម្បី​កាត់បន្ថយ​វិបត្តិ​កូវីដ-១៩ និងពង្រឹង​សេដ្ឋកិច្ចរបស់ប្រទេស​ឡើងវិញ។

លោក ប្រាយុទ្ធ និយាយថា «នៅថ្ងៃនេះ ខ្ញុំ​បាន​ធ្វើការ​សម្រេច​ចិត្តដ៏លំបាកមួយ ទាក់ទង​នឹង​ក្រុមហ៊ុន​អាកាសចរណ៍ Thai Airways។ ប៉ុន្ដែ វា​គឺជា​អ្វីតែមួយ ដែលខ្ញុំដឹងថា វាគឺជា​ផលប្រយោជន៍ធំធេង​សម្រាប់​សាធារណជន និង​ប្រទេសជាតិ​របស់យើង»។

លោក​នាយករដ្ឋមន្ត្រីថៃ​បន្ថែមថា រាជរដ្ឋាភិបាល មាន​ជម្រើសបី គឺទី១ រកលុយ​បន្ថែមទៀត​ ដើម្បី​យកមក​រក្សា​ដង្ហើម​រស់​របស់ក្រុមហ៊ុននេះ, ទី២ គឺ​ទុកឲ្យវា​ក្ស័យធនដោយខ្លួនឯង និងទី៣ ​ឲ្យក្រុមហ៊ុននេះ​ត្រូវបានប្រកាស​ក្ស័យធន​ដោយតុលាការ និងអនុម័ត​ឲ្យមានគម្រោង​ការស្ដារ​នីតិសម្បទា។ ហើយជាចុងក្រោយ រាជរដ្ឋាភិបាលថៃ បាន​ជ្រើសយក​ជម្រើសទី៣។

បើតាម​ក្រសួង​ដឹកជញ្ជូនថៃ ​​​ពាក្យបណ្ដឹង​ក្ស័យធន ដើម្បី​ឲ្យ​មានការ​ស្ដារនីតិសម្បទា​ឡើងវិញនេះ នឹងត្រូវដាក់ទៅកាន់តុលាការ​ទាំងនៅក្នុងប្រទេស​ថៃផង និងសហរដ្ឋ​អាមេរិកផង ខណៈដែល​មាន​ប្រមាណ ៣៥% នៃ​ម្ចាស់បំណុល​របស់​ក្រុមហ៊ុន​អាកាសចរណ៍ Thai Airways នេះ គឺមាន​នៅ​សហរដ្ឋអាមេរិក។

កន្លងមក​គោលបំណង​ក្នុងការជួយសង្គ្រោះ​ក្រុមហ៊ុន​អាកាសចរណ៍ជាតិថៃមួយនេះ មិនមានប្រសិទ្ធភាព​ដោយសារតែ​មានការ​រាំងស្ទះ​ផ្នែក​ច្បាប់ ពិសេស​ច្បាប់ការងារ និងច្បាប់​សហគ្រាសរដ្ឋ ដែលវាបាន​ធ្វើឲ្យ​កិច្ចខិតខំ​ប្រឹងប្រែង​មានភាព​ស្មុគស្មាញ ក្នុងការកែទម្រង់ក្រុមហ៊ុននេះ។

ការស្ដារនីតិសម្បទានេះ នឹងពាក់ព័ន្ធ​នឹងការ​កាត់បន្ថយ​ចំណែក​ភាគហ៊ុន​ធំ​របស់​ក្រសួង​ហិរញ្ញវត្ថុថៃ នៅក្នុង​ក្រុមហ៊ុន​អាកាសចរណ៍​ជាតិ​មួយនេះ និង​​ធ្វើឲ្យ​ក្រុមហ៊ុននេះ បាត់បង់​នូវភាព​ជា​សហគ្រាសរដ្ឋរបស់ខ្លួន។

Advertisement

នាយករដ្ឋមន្ត្រីថៃ បញ្ជាក់ថា ក្រុមហ៊ុន​ Thai Airways គួរតែ​ត្រូវបាន​អនុញ្ញាត​ឲ្យ​បន្តប្រតិបត្តិការ​ដើម្បី​បង្កើត​ប្រាក់ចំណូល ដូច្នេះ​វាអាច​ទទួលការពង្រឹង​អាជីវកម្ម​ឡើងវិញ។

សេចក្ដីសម្រេច​របស់គណៈរដ្ឋមន្ត្រីថៃ កាលពីថ្ងៃអង្គារទី ១៩ ខែឧសភានេះ បានដាក់ចេញ​នូវផែនការ​ស្ដារឡើងវិញ​ដែលត្រូវបាន​រៀបចំ​ដោយ​ក្រុមហ៊ុន Thai Airways និង​គណៈកម្មាធិការ​គោលនយោបាយ​សហគ្រាសរដ្ឋ ដែលអនុគ្រោះ​ដល់​ក្រសួង​ហិរញ្ញវត្ថុ ដើរតួជា​អ្នកធានា​សម្រាប់​ប្រាក់កម្ចី​ ៥៤ ពាន់លានបាត​ (១,៧ ពាន់លាន​ដុល្លារអាមេរិក) ដើម្បីជួយ​ក្រុមហ៊ុន​​អាកាសចរណ៍នេះ។

លោក​ប្រាយុទ្ធ បាន​ទទូចថា រាជរដ្ឋាភិបាល ត្រូវតែមានការ​ប្រុងប្រយ័ត្ន ជាមួយនឹង​ការចំណាយ​របស់ខ្លួន ដោយផ្ដល់​ប្រាក់កម្ចី​សង្គ្រោះ​កូវីដ-១៩ ដ៏ធំសម្បើម ដែលខ្លួន​​បាន​ដកយកទៅ​ជួយ​ក្រុមហ៊ុន​នេះ។ លោកបានបញ្ជាក់​ទៀតថា ប្រាក់ដែលបានបម្រុង​ទុក សម្រាប់​ការផ្ដល់​កម្ចី​ដល់​ក្រុមហ៊ុន​អាកាសចរណ៍​ថៃមួយនេះ អាច​នឹងត្រូវ​​ចំណាយ​កាន់តែប្រសើរ​ក្នុងការជួយដល់​អ្នកដែលរង​ផល​ប៉ះពាល់​ដោយ​ជំងឺរាតត្បាត។

លោកប្រាយុទ្ធ និយាយយ៉ាងដូច្នេះថា «យើងត្រូវការ​គិត​លើការចំណាយ​របស់យើង ដោយមាន​ការ​ប្រុងប្រយ័ត្ន ឥឡូវនេះ ការរាតត្បាត​បានធ្វើឲ្យមានផលប៉ះពាល់។ ការចំណាយនេះ គឺសម្រាប់​ស្ថានភាពសម្លាប់​រស់​របស់​ប្រជាជន​​របស់យើង»។

បើតាម​ការអះអាង​របស់​លោក អ៊ុតតាម៉ា សុវណ្ណា យ៉ាណា រដ្ឋមន្ត្រី​ក្រសួង​ហិរញ្ញវត្ថុថៃ បាននិយាយថា ការិយាល័យ​គោល​នយោបាយ​សហគ្រាសរដ្ឋ នឹង​ដាក់ចេញ​ផែនការ​ កាត់បន្ថយ​ចំណែកភាគហ៊ុន​របស់​ក្រសួង​ហិរញ្ញវត្ថុ​នៅក្នុង​ក្រុមហ៊ុន​អាកាសចរណ៍ Thai Airways ពី​ ៥១,០៣% នាពេល​បច្ចុប្បន្ន មកនៅក្រោម ៥០%វិញ ដែលវា​អាចនឹង​បញ្ចប់​ភាព​ជាសហគ្រាស​រដ្ឋ​របស់ក្រុមហ៊ុននេះផងដែរ៕

Advertisement
© 2020 រក្សាសិទ្ធិ​គ្រប់​បែប​យ៉ាង​ដោយ ខេមបូណូមីស។ សម្រាប់​ការ​ប្រើ​ប្រាស់ ឬ​ផ្សាយ​បន្ត សូមទាក់ទង​មក អ៊ីម៉េល sothea[at]cambonomist.com ឬទូរស័ព្ទលេខ​ 089 777 076។



អត្ថបទបន្ទាប់


អាជីវកម្មក្នុងវិស័យសំខាន់ចំនួន ៤ នឹងទទួលបានការបញ្ចុះតម្លៃអគ្គិសនី ២៥% ពីរដ្ឋ

ព័ត៌មាន
យ៉ាងហោចណាស់ អាជីវកម្មក្នុងវិស័យសំខាន់ៗចំនួន ៤ គឺឧស្សាហកម្ម កសិកម្ម ពាណិជ្ជកម្ម និងសេវាកម្ម ដែលមានបរិយាកាសអំណោយផលអាចបង្កើនសកម្មភាពផលិ...

ក្រសួងសុខាភិបាល អនុញ្ញាតឲ្យក្រសួងវប្បធម៌បើកសារមន្ទីរនានាឡើងវិញហើយ តែត្រូវមានវិធានការការពារឲ្យបានម៉ត់ចត់

ព័ត៌មាន
នៅថ្ងៃនេះ ក្រសួងសុខាភិបាលបានចេញលិខិតមួយជូនដល់ក្រសួងវប្បធម៌ និងវិចិត្រសិល្បៈ ដោយបានសម្រេចអនុញ្ញាតឲ្យបើកសារមន្ទីរនានាឡើងវិញទូទាំងប្រទេស...
ច្រើនទៀត

អត្ថបទស្រដៀង


ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ