សេដ្ឋកិច្ចដែលពាក់ព័ន្ធនឹងវិស័យទេសចរណ៍របស់ថៃ នៅតែលិចកប់យ៉ាងជ្រៅនៃការធ្លាក់ចុះខ្លាំងដោយសារតែ រងផលប៉ះពាល់នៃកូវីដ-១៩រាតត្បាត ហើយមកទល់ពេលនេះ វិស័យទេសចរណ៍ថៃនេះ នៅតែបន្ដស្ថិតក្នុងភាពជាប់គាំងនៅឡើយ បើទោះបីជារាជរដ្ឋាភិបាលថៃ ខ្នះខ្នែងចេញវិធានការស្ដារឡើងវិញជាបន្ដបន្ទាប់យ៉ាងណាក្ដី។
ជាក់ស្ដែង ថ្មីៗនេះ ថៃទើបតែដាក់ចេញនៅវិធានការស្ដារវិស័យទេសចរណ៍ឡើងវិញ មិនទាន់បានប៉ុន្មានផង បែរជាកំពុងជួបគ្រោះជាថ្មីទៀតហើយ ដោយសារតែរលកឆ្លងថ្មីកំពុងវាយប្រហារក្នុងប្រទេសនេះ ពិសេសនៅខេត្តតំបន់ទេសចរណ៍មួយចំនួន ហើយក្រុមអ្នកជំនាញបានសម្ដែងក្ដីបារម្ភខ្លាំងថា បើរដ្ឋាភិបាលនៅតែបន្ដបើកឲ្យមានការធ្វើដំណើរក្នុងស្រុក ពិសេសនៅអំឡុងថ្ងៃចូលឆ្នាំថ្មីនៅដើមសប្តាហ៍ នេះ វានឹងធ្វើឲ្យវិស័យទេសចរណ៍ថៃប្រឈមហានិភ័យខ្ពស់ និង អាចកាន់តែពិបាកស្ដារឡើងវិញ បើសិនមានការឆ្លងកូវីដ-១៩ រីករាលដាលកាន់តែខ្លាំងនោះ។
អត្ថបទទាក់ទង
ភាពមិនប្រាកដប្រជាដែលកំពុងបន្ដមានទាំងអស់នេះ ត្រូវបានអ្នកជំនាញសេដ្ឋកិច្ចថៃ អះអាងថា ជាហានិភ័យអាចធ្វើឲ្យកំណើនសេដ្ឋកិច្ចថៃនៅឆ្នាំ២០២១ នឹងមានតិចជាងអ្វីដែលបានព្យាករថា នឹងកើន ៣%។ បើទោះបីជា សេដ្ឋកិច្ចថៃ ត្រូវបានរំពឹងថាស្ទុះលឿងជាងមុនក៏ពិតមែន ប៉ុន្ដែមានចំណុចខ្លះក៏នៅតែមានភាពទន់ខ្សោយ ពិសេសវិស័យសេវាកម្មហ្នឹងតែម្ដង។
បើតាមអ្នកជំនាញ សម្រាប់សេណារីយ៉ាអាក្រក់បំផុត សេដ្ឋកិច្ចថៃ ត្រូវបានព្យាករថា អាចនឹងដាំក្បាលចុះប្រហាក់ប្រហែលនឹងឆ្នាំមុនដែរ ប្រសិនបើមានបញ្ហាទាក់ទងនឹងប្រសិទ្ធភាពវ៉ាក់សាំង។ ក្រសួងសុខាភិបាលថៃ បានបញ្ជាក់ដែរថា ដើម្បីអាចគ្រប់គ្រងការឆ្លងរាលដាលក្នុងទីក្រុងបាងកកនាពេលបច្ចុប្បន្ននេះបាន អាចនឹងត្រូវការពេលវេលាជាង២ខែ។
អ្នកជំនាញបានប៉ាន់ប្រមាណថា នៅ៣ខែ ឆ្នាំ២០២១ សេដ្ឋកិច្ចថៃអាចមានការធ្លាក់ចុះ ចន្លោះពី ១% ទៅ៣%។
ដើម្បីស្ដារសេដ្ឋកិច្ចថៃឡើងវិញ ពិសេសវិស័យទេសចរណ៍ ប្រទេសថៃ បានសម្រេចបើកប្រទេសទទួលទេសចរណ៍អន្តរជាតិឡើងវិញ ដោយរំពឹងថា នឹងទទួលបានទេសចរបរទេស ៣លាននាក់នៅឆ្នាំនេះ ហើយរំពឹងថាភ្ញៀវទេសចរទាំងនោះ នឹងចូលមកប្រទេសថៃកាន់តែច្រើន នៅត្រីមាសទី៤នៃឆ្នាំនេះ។ ប៉ុន្ដែ គេមិនទាន់ដឹងទថា តើគម្រោងនេះ នឹងសម្រេចបានផ្លែផ្កា ឬក៏អត់ ព្រោះ ឥឡូវនេះ ករណីឆ្លងកូវីដ-១៩ កំពុងតែបន្ដវាយលុកកើតមានច្រើននៅក្នុងប្រទេសថៃដដែល៕
ចុច Like Facebook Page របស់ខេមបូណូមីស និងចូលរួមក្នុង Telegram ដើម្បីទទួលបានព័ត៌មានថ្មីៗលឿនរហ័សមុនគេ: https://t.me/cambonomist
None
