ការផ្អាកអាជីវកម្មក្នុងស្រុករយៈពេលវែង ការបិទជើងហោះហើរចូលមកក្នុងប្រទេស និងការធ្លាក់ចុះនៃអំណាចទិញ នៅអំឡុងពេលមានវិបត្តិកូវីដ-១៩នេះ ត្រូវបានគេមើលឃើញថា គឺជាកត្តាទាញទម្លាក់ការនាំចេញចំណីអាហារ ដែលកាន់ចំណែកធំ រហូតដល់ទៅ ៧៦% នៃការនាំចេញសរុបរបស់ប្រទេសថៃ ឲ្យជួបបញ្ហាធ្លាក់ចុះ។
កាលពីឆ្នាំ ២០១៩កន្លងទៅ ការនាំចេញចំណីអាហារថៃ សម្រេចបានជាង ៣៣ពាន់លានដុល្លារអាមេរិក ដែលមានការធ្លាក់ចុះ ៣,៨% ធៀបនឹងឆ្នាំ ២០១៨។
លោក វិសិទ្ធ លីមលូឆា ប្រធានក្លឹបឧស្សាហកម្មកែច្នៃចំណីអាហាររបស់ សហព័ន្ធឧស្សាហកម្មថៃ បានបញ្ជាក់ថា នៅក្នុងបរិយាកាសអាជីវកម្មដ៏អាប់អួរបែបនេះ វិស័យចំណីអាហារ ពិបាកនឹងស្តារឡើងវិញណាស់ ពីព្រោះវាត្រូវជាប់គាំងដោយសារតែ វិបត្តិមេរោគកូវីដ-១៩។
អត្ថបទទាក់ទង!
ក្រុមហ៊ុនអាកាសចរណ៍ សណ្ឋាគារ និងភោជនីយដ្ឋាន បានកាត់បន្ថយការបញ្ជាទិញចំណីអាហារ យ៉ាងច្រើន ហើយអាជីវកម្មដែលធ្លាប់តែកម្ម៉ង់ទិញអាហារគុណភាពខ្ពស់ ឥឡូវនេះពុំទទួលបានការកម្ម៉ង់ទិញទៀតឡើយ ឬទទួលបានការបញ្ជាទិញក្នុងទំហំតូចប៉ុណ្ណោះ។
លោក វិសិទ្ធ បន្តថា បើទោះបីជារាជរដ្ឋាភិបាល ក្នុងបណ្តាប្រទេសនានា ចាប់ផ្តើមកាត់បន្ថយវិធានការរឹតបន្តឹង និងអនុញ្ញាតឲ្យអាជីវកម្មបន្តសកម្មភាពឡើងវិញក៏ដោយ លោកជឿជាក់ ប្រជាជន នៅតែពិចារណាខ្ពស់ លើការចំណាយនានា និងការធ្វើដំណើរកម្សាន្ត។
លើសពីនេះ វិស័យចំណីអាហារថៃ ពឹងផ្អែកខ្លាំងទៅលើ វិស័យទេសចរណ៍ ដូច្នេះហើយ ការបាត់បង់ភ្ញៀវទេសចរអន្តរជាតិ ក៏ជាការបាត់បង់ប្រាក់ចំណូលសម្រាប់វិស័យចំណីអាហារផងដែរ។
ប្រទេសថៃ ជាប់ចំណាត់ថ្នាក់លេខ ១១ ក្នុងចំណោមអ្នកនាំចេញចំណីអាហារធំជាងគេបង្អស់ទូទាំងសកលលោក ហើយនៅក្នុងតំបន់អាស៊ី ថៃ ជាប់ចំណាត់ថ្នាក់លេខ ២ នៅពីក្រោយប្រទេសចិន។
គួរជម្រាបថា បើតាមក្រសួងឧស្សាហកម្មថៃ រោងចក្រនៅក្នុងវិស័យចំណីអាហារ និងភេសជ្ជៈ មានជាង ៥,៣ម៉ឺនរោងចក្រ កាលពីឆ្នាំ ២០១៩ ក្នុងនោះមានជាង ៤,៣ម៉ឺនស្ថិតនៅក្នុង កសិ-ពាណិជ្ជកម្ម, ៩ពាន់រោងចក្រទៀត ស្ថិតនៅក្នុងការកែច្នៃចំណីអាហារ និងមានជាង ៨០០រោងច្រក ជាឧស្សាហកម្មផលិតភេសជ្ជៈ៕
None
