ក្នុងខ្លឹមសារលិខិតរបស់សមាគមអ្នកផលិតចំណីអាហារកម្ពុជា ដែលខេមបូណូមីសទទួលបាននោះ បានរាយការណ៍ទៅកាន់រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុថា ការីករាលដាលនៃមេរោគ Covid-19 មានការកើនឡើងគួរឲ្យកត់សម្គាល់ ហើយស្ថានភាពនេះ បានជះឥទ្ធិពលដោយផ្ទាល់ និងប្រយោលលើផលិតកម្មរបស់សហគ្រាសធុនតូច និងមធ្យម សឹងតែគ្រប់វិស័យទាំងអស់ រួមទាំង កសិ-ឧស្សាហកម្ម កម្មន្ដសាល សេវាក្ម អាជីវកម្មលក់ដុំ និងលក់រាយជាដើម។
សមាគមអ្នកផលិតចំណីអាហារកម្ពុជា បានគូសបញ្ជាក់ថា «ករណីស្ថានភាពអាក្រក់នេះ នៅតែបន្ដនោះ សហគ្រាសធុនតូច និងមធ្យម នឹងជួបប្រទះនឹងបញ្ហាធ្ងន់ធ្ងរឡើងៗ ព្រមទាំងអាចជះឥទ្ធិពលដល់ខឿនសេដ្ឋកិច្ច បង្កើនអត្រាអត់ការងារធ្វើដល់សង្គមកម្ពុជា»។
អត្ថបទទាក់ទង!
នៅក្នុងចំណោមផលប៉ះពាល់ធំៗចំនួន
៦ ចំណុច ដែលបានសមាគមបានរៀបរាប់ទៅកាន់ក្រសួងសេដ្ឋកិច្ច និងហិរញ្ញវត្ថុ មានចំណុចមួយ
បានបញ្ជាក់ថា ស្ថានភាពអាក្រក់បច្ចុប្បន្ននេះ សហគ្រាសមួយចំនួន បានកាត់បន្ថយកម្មករពី
៥០% ទៅ៨០% ហើយបើស្ថានភាពខាងលើនៅតែបន្ដនោះ សហគ្រាសធុនតូច និងមធ្យមនឹងផ្អាកដំណើរការផលិតកម្មទាំងស្រុង។
ករណីបិទអាជីវកម្មទាំងស្រុង បណ្ដាលឲ្យសហគ្រាសទាំងអស់នឹងលំបាក ក្នុងការរៀបចំ និងបង្កើតឡើងវិញនៅពេលស្ថានភាព
ធូរស្រាលឡើងវិញ។ លើសពីនេះ បញ្ហាកង្វះខាតលទ្ធភាពទូទាត់សងម្ចាស់បំណុល និងថ្លៃជួលទីតាំង
ក៏ជាបញ្ហាប្រឈមធំមួយរបស់សហគ្រាសផងដែរ។
សមាគមអ្នកផលិតចំណីអាហារកម្ពុជា ក៏បានស្នើសុំនូវដំណោះស្រាយចំនួន ៧ ចំណុច ពីសំណាក់រាជរដ្ឋាភិបាលកម្ពុជា
ដើម្បីដាក់ចេញនូវវិធានការបន្ទាន់លើកស្ទួយសហគ្រាសធុនតូច និងមធ្យម។ ក្នុងនោះមានដូចជា៖
១, ពន្យារការបង់ពន្ធគ្រប់ប្រភេទចំពោះសហគ្រាសដែលផ្ដោតលើវិស័យផលិតចំណីអាហារ កសិ-ឧស្សាហកម្ម និងកសិកម្ម។
២, បន្ថយតម្លៃថាមពលមកនៅត្រឹម ២៥% នៃតម្លៃបច្ចុប្បន្ន សម្រាប់វិស័យដែលទាក់ទង នឹងការផលិតចំណីអាហារ
៣, ក្នុងរយៈពេល ៣ឆ្នាំខាងមុខ សូមជួយឲ្យគ្រឹះស្ថានហិរញ្ញវត្ថុទាំងអស់ សម្រួលដល់លក្ខខណ្ឌនៃប្រាក់កម្ចី
៤, ស្នើសុំបង្កើតប្រព័ន្ធលើកទឹកចិត្តអ្នកទិញផលិតផលខ្មែរ
៥, សម្រួល និងពន្លឿននីតិវិធី ក្នុងការបោះទុនវិនិយោគជាមួយនឹង SMEs ឬបោះទុនឲ្យធនាគារនានា ផ្តល់កម្ចីដល់ SMEs ជាមួយអត្រាការប្រាក់ទាប។
៦, សម្របសម្រួលលើការបង់ការប្រាក់សងទៅធនាគារ (ពន្យារ ឬបង់តែការប្រាក់) ក្នុងរយៈពេល ៦ខែយ៉ាងតិច
៧, ស្នើសុំការគាំទ្រពីសំណាក់រាជរដ្ឋាភិបាល នូវការឧបត្ថម្ភប្រាក់បៀវត្សរ៍បុគ្គលិក ៥០% លើប្រាក់ខែគោល កំណត់ដោយរាជរដ្ឋាភិបាល។
យ៉ាងណាក៏ដោយ នៅមិនទាន់មានឃើញការឆ្លើយតបណាមួយ ពីក្រសួងសេដ្ឋកិច្ច និងហិរញ្ញវត្ថុនៅឡើយទេ។ ប៉ុន្ដែ ខាងវិស័យឯកជន នៅតែរងចាំមើល ចំពោះការឆ្លើយតប និងចំណាត់ការរបស់ក្រសួង ព្រោះថា បើបញ្ហា Covid-19 អូសបន្លាយកាន់តែយូរ ហើយបើរដ្ឋមិនមានចំណាត់ការជួយវិស័យឯកជនបានទាន់ពេលវេលាទេនោះ វិស័យឯកជននឹងជួបបញ្ហាកាន់តែធ្ងន់ធ្ងរ និងឈានទៅដល់ការបិទអាជីវកម្មផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
