ការលក់មូលបត្របំណុលបរទេស ចាប់តាំងពីដើមឆ្នាំ រហូតដល់ថ្ងៃទី ៥ខែតុលា ឆ្នាំ២០២៣ នេះ មានទំហំទឹកប្រាក់សរុបដល់ទៅ ៤ ២០០ លានដុល្លារ ប៉ុន្តែក្រោយពេលដែលផ្ទុះសង្រ្គាមនៅអ៊ីស្រាអែល កាលពីថ្ងៃសៅរ៍ អ្នកវិភាគបានអះអាងថា ផ្សារហ៊ុនថៃ កំពុងប្រឈមមុខនឹងសម្ពាធលក់ចេញថ្មី ដោយសន្ទស្សន៍បានធ្លាក់ចុះយ៉ាងខ្លាំង។
សមាគមទីផ្សារមូលបត្រថៃ បានឱ្យដឹងថា ចាប់ពីថ្ងៃទី ១ ខែសីហា ដល់ថ្ងៃទី ៥ ខែតុលា ឆ្នាំនេះ អ្នកវិនិយោគបរទេស បានលក់មូលបត្របំណុលរបស់ថៃ ដែលមានតម្លៃសរុបប្រមាណជា ២.៥០០ លានដុល្លារ ប៉ុន្តែពេលនេះ ស្ថានការណ៍វាបានបែជាក្រឡាប់ចាក់វិញភ្លាមៗ។
លោក រ៉ាកផុង ឆៃស៊ូផារ៉ាគល (Rakpong Chaisuparakul ) អនុប្រធានជាន់ខ្ពស់នៃក្រុមហ៊ុនស្រាវជ្រាវទីផ្សា KGI Thailand Research បាននិយាយថា ហានិភ័យសកលនៅតែបន្តគ្រប ដណ្តប់លើការជួញដូភាគហ៊ុននៅក្នុងទីផ្សារថៃ ដោយសារតែសំពាធនៃបញ្ហាសង្គ្រាម។
អត្ថបទគួរអាន
លោកបាននិយាយថា "ការប្រយុទ្ធចុងក្រោយរវាងក្រុមហាម៉ាស និងអ៊ីស្រាអែល អាចបង្កើនភាពមិនច្បាស់លាស់នៃភូមិសាស្ត្រនយោបាយ ជាពិសេសប្រសិនបើប្រទេសមហាអំណាចនយោបាយពិភពលោកដូចជាសហរដ្ឋអាមេរិក និងអ៊ីរ៉ង់ ចូលរួមពាក់ព័ន្ធក្នុងជម្លោះ" ។
ការប្រយុទ្ធគ្នារវាងអ៊ីស្រាអែល និងក្រុមហាម៉ាស ដែលបានផ្ទុះឡើងកាលពីចុងសប្តាហ៍ បានបណ្តាលឱ្យលំហូរមូលនិធិផ្លាស់ប្តូរទៅទ្រព្យសម្បត្តិដែលមានសុវត្ថិភាព ជាពិសេស មាស រីឯតម្លៃប្រេងនៅពេលនេះក៏មានការប្រែប្រួលផងដែរ។
ពាក់ព័ន្ធនឹងបញ្ហានេះដែរ អ្នកជំនាញនៅក្រុម Asia Plus Securities បាននិយាយថា សង្រ្គាមអ៊ីស្រាអែល និងក្រុមហាម៉ាស ត្រូវបានឃ្លាំមើលយ៉ាងដិតដល់ ថាតើអ៊ីស្រាអែល និងប៉ាឡេស្ទីន ត្រូវបានគាំទ្រដោយប្រទេសផ្សេងៗគ្នាទេ។
ប្រភពដដែលបាននិយាយនៅក្នុងកំណត់ត្រាស្រាវជ្រាវមួយថា "ហានិភ័យភូមិសាស្ត្រនយោបាយកើនឡើងម្តងទៀត ហើយសង្រ្គាមអូសបន្លាយអាចបណ្តាលឱ្យអតិផរណាកើនឡើង" ។
ប៉ាឡេស្ទីន ត្រូវបានគាំទ្រដោយបណ្តាប្រទេសនៅមជ្ឈិមបូព៌ា ដែលដឹកនាំដោយអ៊ីរ៉ង់ ខណៈដែលអ៊ីស្រាអែល ត្រូវបានគាំទ្រដោយប្រទេសលោកខាងលិច ដែលដឹកនាំដោយសហរដ្ឋអាមេរិក ដូចនេះអ្នកវិភាគបានអះអាងថា សង្រ្គាមត្រូវតែត្រូវបានឃ្លាំមើលយ៉ាងដិតដល់ ព្រោះវាអាចនឹងលាតសន្ធឹងពាសពេញតំបន់ និងមានផលប៉ះពាល់ទូទាំងពិភពលោក៕
ដោយៈ សរ សុជាតិ
None
