អ្នកជំនាញស្នើឱ្យពលរដ្ឋបន្តដំណើរការរស់នៅ និងរកស៊ីជាប្រក្រតី ដើម្បីគាំទ្រចរន្តសេដ្ឋកិច្ចជាតិ
សង្រ្គាមឈ្លានពានរបស់យោធាថៃ មកលើដែនអធិបតេយ្យភាពកម្ពុជា បានអូសបន្លាយអស់រយៈពេលជាង១០ថ្ងៃហើយ ដែលបានបង្កផលប៉ះពាល់យ៉ាងខ្លាំងដល់អាយុជីវិត និង…
ឧកញ៉ា កែវ បូណ៌ភិរក្ស អគ្គនាយកក្រុមហ៊ុន បូទីកា និងបុរី ឡុងនី សង្កេតឃើញថា ក្រោយថៃបង្កអរិភាពមកលើកម្ពុជា បានធ្វើឱ្យពលរដ្ឋខ្មែរទាំងក្នុង និងក្រៅប្រទេសបានបង្ហាញពីស្មារតីជាតិនិយម និងស្នេហាជាតិ តាមរយៈរួបរួមសាមគ្គីគ្នាជាធ្លុងមួយ ដើម្បីប្រឆាំងនឹងការរំលោភបំពានរបស់យោធាថៃ។ បើតាមអ្នកជំនួញរូបនេះ សកម្មភាពឈ្លានពានរបស់ថៃ មកលើកម្ពុជា បានធ្វើឱ្យពលរដ្ឋខ្មែរស្ទើរតែគ្រប់វ័យកំពុងផ្លាស់ប្ដូរទម្លាប់ឈប់ប្រើប្រាស់ផលិតផលថៃ ខណៈវិស័យឯកជនដទៃទៀត ក៏បានត្រៀមខ្លួនឈប់នាំចូលផលិតផលថៃ ចូលមកទីផ្សាររបស់កម្ពុជាផងដែរ។ ការណ៍នេះ ធ្វើឱ្យលោកឧកញ៉ា ជឿជាក់ថា ផលិតផលថៃ នៅក្នុងទីផ្សារកម្ពុជានឹងថយចុះជាបន្តបន្ទាប់ ឬអាចនៅសល់ប្រមាណ១០% ប៉ុណ្ណោះ ដែលភាគច្រើនជាឧបករណ៍បន្ទាប់បន្សំសម្រាប់ប្រើប្រាស់ក្នុងខ្សែច្រវាក់ផលិតកម្ម។
ជាមួយគ្នានេះ ឧកញ៉ា តែ តាំងប៉ ប្រធានក្រុមប្រឹក្សាភិបាលសម្ព័ន្ធសមាគមសហគ្រាសធុនតូច និងមធ្យមកម្ពុជា យល់ឃើញថា ទំនិញរបស់ថៃ ប្រឈមនឹងបាត់វត្តមានពីទីផ្សារកម្ពុជា ប្រសិនបើប្រទេសក្បែរខាងមួយនេះ នៅតែបន្តឈ្លានពានមកលើកម្ពុជា។ ឧកញ៉ាបន្តថា មកដល់ពេលនេះ ពលរដ្ឋខ្មែរមានការភ្ញាក់រលឹកកាន់តែខ្លាំង និងបាននាំគ្នាធ្វើពហិការមិនប្រើប្រាស់ផលិតផលថៃ ខណៈនៅតាមទីតាំងលក់ដូរមួយចំនួន ក៏បានចាប់ផ្ដើមទម្លាក់ចោលទំនិញរបស់ថៃ ផងដែរ។ តាមការវាយតម្លៃរបស់មេដឹកនាំ SME រូបនេះ ផលិតផលរបស់ថៃបាត់បង់វត្តមានពីទីផ្សារកម្ពុជា បន្តិចម្ដងៗ និងអាចបាត់បង់កាន់តែច្រើននាពេលខាងមុខ។ ជាមួយគ្នានេះ ឧកញ៉ា តែ តាំងប៉ រំលឹកដល់ក្រុមឈ្មួញពិចារណាឡើងវិញក្នុងការនាំចូលទំនិញថៃ ដែលបានឈ្លានមកលើកម្ពុជា ម្តងហើយម្តងទៀត។
ពាក់ព័ន្ធបញ្ហានេះដែរ ឧកញ៉ា ស៊ិន ចន្ធី អគ្គនាយកក្រុមហ៊ុនឡាញហល អិចប្រេស កត់សម្គាល់ឃើញថា ចាប់តាំងពីប្រទេសថៃ បើកការបាញ់ប្រហារមកលើកម្ពុជា មានពលរដ្ឋខ្មែរជាច្រើនបាននាំគ្នាធ្វើពហិការមិនប្រើប្រាស់ផលិតផលថៃ សំដៅដាក់សម្ពាធសេដ្ឋកិច្ចថៃ។ តាមរយៈសកម្មភាពឈ្លានពានរបស់យោធាថៃ មកលើកម្ពុជាជាថ្មីនេះ ឧកញ៉ាបានវាយតម្លៃថា ពលរដ្ឋខ្មែរនឹងឈប់ប្រើប្រាស់ផលិតផលថៃកាន់តែច្រើន ដែលអាចធ្វើឱ្យផលិតផលថៃ បាត់វត្តមានកាន់តែច្រើនពីទីផ្សាររបស់កម្ពុជា នាពេលអនាគត។
បើតាមការវាយតម្លៃរបស់ប្រធានក្រុមប្រឹក្សាភិបាលសម្ព័ន្ធសមាគមសហគ្រាសធុនតូច និងមធ្យមកម្ពុជា មកដល់ពេលនេះ សហគ្រាសក្នុងស្រុកមានសកម្មភាពផលិតផលិតផលកាន់តែខ្លាំង ដើម្បីផ្គត់ផ្គង់តម្រូវការប្រើប្រាស់ក្នុងស្រុក ដែលកំពុងមានកំណើនខ្ពស់។ សូមបញ្ជាក់ថា នៅក្នុងខែវិច្ឆិកា ឆ្នាំ២០២៥ ការនាំចូលទំនិញពីថៃ មកកាន់ទីផ្សារកម្ពុជា មានទំហំ១៦១លានដុល្លារមានការធ្លាក់ចុះជិត៥០% បើធៀបនឹងរយៈពេលដូចគ្នាកាលពីឆ្នាំ២០២៤៕
អត្ថបទ៖ បូ ដូឡា
