យ៉ាងហោចណាស់មានបាតុករជាង ៨០០នាក់ បានមកជួបជុំគ្នានៅចំកណ្តាលក្រុងបាងកក។ ពួកគេជំរុញឲ្យអ្នកស្រលាញ់ប្រជាធិបតេយ្យទាំងអស់ ក្រោកឈរដើម្បីបញ្ចប់អំណាចដ៏ច្រើនលើសលប់របស់មហាក្សត្រថៃ។ បាតុករអះអាងថា មហាក្សត្រថៃ ព្រះចៅ ម៉ាហា វិជ្ជរ៉ាឡុងកន បានកាន់កាប់អំណាចហួសព្រំដែន ដើម្បីដឹកនាំប្រទេសថៃ ប្រការនេះហើយបង្កឲ្យមានវិសមភាពសង្គមជាខ្លាំង។នេះបើតាមសារព័ត៌មានជប៉ុន Kyodo។
ដោយឡែក បើតាមការចុះផ្សាយដោយសារព័ត៌មានអាល្លឺម៉ង់ DW នៅល្ងាចថ្ងៃដដែល បាតុករបានបន្តដើរក្បួនទៅកាន់មុខស្ថានទូតអាល្លឺម៉ង់ប្រចាំប្រទេសថៃផងដែរ។ ប៉ូលិសបានព្យាយាមរារាំងបាតុករមិនឲ្យចូលទៅកៀកជិត នឹងស្ថានទូត ដោយអាជ្ញាធរបាន បាញ់គ្រាប់កាំភ្លើងជ័រដើម្បីបំបែកពួកគេ។ យ៉ាងហោចណាស់ មានមនុស្ស៣នាក់បានរងរបួស និងម្នាក់ក្នុងចំណោមនោះ ត្រូវបញ្ចូនទៅមន្ទីរពេទ្យ។ នេះបើតាមការចុះផ្សាយពី DW ។
មុននិងក្រោយពេលឡើងស្នងរាជ្យបន្តពី ព្រះចៅរាមាទី៩ ភូមិបុល អាឌុលយ៉ាដេត ដែលជាព្រះបិតារបស់ទ្រង់ ព្រះចៅ ម៉ាហា វិជ្ជរ៉ាឡុងកន ត្រូវបានគេកត់សម្គាល់ថា បានសព្វព្រះរាជហឫទ័យចំណាយពេលវេលាគង់នៅប្រទេសអាល្លឺម៉ង់ ច្រើនជាងក្នុងប្រទេសថៃ។ ប្រការនេះបានធ្វើឲ្យមានភាពចម្រូងចម្រាស់ និងមិនពេញចិត្តនោះទេ ពីពលរដ្ឋថៃ និងអ្នកនយោបាយមួយចំនួន។
គួរកត់សំគាល់ថា ថ្វីបើថៃមានរបបរាជានិយមអាស្រ័យរដ្ឋធម្មនុញ្ញមែន ក៏ប៉ុន្តែស្ថាប័នព្រះមហាក្សត្រថៃ នៅតែរក្សាអានុភាពអំណាចដ៏ធំ នៅក្នុងវិស័យនយោបាយ និងកងទ័ពផងដែរ។ នៅក្នុងប្រទេសថៃ ទោសប្រមាថព្រះជេស្តា ព្រះមហាក្សត្រ និងគ្រួសាររាជវង្ស អាចប្រឈមនឹងទោសជាប់ពន្ធនាគារ រយៈពេល១៥ឆ្នាំ។
សូមជម្រាបថា បាតុកម្មកាលពីថ្ងៃអាទិត្យ ធ្វើឡើងនៅប៉ុន្មានថ្ងៃប៉ុណ្ណោះ ក្រោយព្រះមហាក្សត្រថៃ បានយាងចេញទៅប្រទេសអាល្លឺម៉ង់ជាថ្មី ហើយដែលគេជឿថា ជាដំណើរស្តេចយាងចេញទៅក្រៅប្រទេសលើកដំបូងរបស់ទ្រង់ ចាប់តាំងពីការមានតវ៉ាពីអ្នកគាំទ្រលទ្ធិប្រជាធិបតេយ្យ ដែលបានចាប់ផ្តើមឡើងតាំងពីឆ្នាំមុន៕
