យោងតាមប្រភពព័ត៌មានពី សមាគមមជ្ឈមណ្ឌលទិញទំនិញថៃ បានឲ្យដឹងថា កាលពីថ្មីៗនេះ សមាគម បានដាក់លិខិត ទៅកាន់រដ្ឋាភិបាលឲ្យពិចារណាលើវិធានការជួយ និងប៉ះប៉ូវសង ដល់អ្នកគ្រប់គ្រងផ្សារទំនើប ដូចជាមជ្ឈមណ្ឌលលក់ទំនិញដែលបានបិទទ្វារ ព្រោះតែត្រូវចូលរួមជាមួយរាជរដ្ឋាភិបាលក្នុងការទប់ស្កាត់ការឆ្លងរីករាលនៃមេរោគកូវីដ-១៩។
ក្នុងអំឡុងពេលនៃការបិទទ្វារបណ្ដោះអាសន្ននោះ ប្រតិបត្តិករផ្សារទំនើបភាគច្រើន បានលើកលែងថ្លៃជួលសម្រាប់ម្ចាស់ហាងជួលលក់ទំនិញនានា ខណៈដែលក្រុមប្រតិបត្តិករផ្សារទំនើបទាំនោះ នៅតែបន្ដការចំណាយ ជាពិសេសសម្រាប់បុគ្គលិក ដែលវាគឺជាការចំណាយច្រើនសម្រាប់ពួកគេ។
លើសពីនេះ ប្រតិបត្តិករផ្សារទំនើប ក៏ត្រូវអនុវត្តនូវវិធានការផ្សេងៗ ដើម្បីជាប្រយោជន៍ដល់សុវត្ថិភាពបុគ្គលិក រួមទាំងកម្មវិធីឲ្យការធ្វើការពីផ្ទះ ឬការដំឡើងបច្ចេកវិទ្យា និងឧបករណ៍ជាដើម។ប្រភពព័ត៌មានពី សមាគមមជ្ឈមណ្ឌលទិញទំនិញថៃ បាននិយាយទៀតថា បើទោះបីជាហាងលក់ទំនិញត្រូវបានអនុញ្ញាតឲ្យបើកឡើងវិញក៏ពិតមែន ប៉ុន្ដែ មានអ្នកដើរទិញទំនិញប្រហែល ៤០% ទៅ៦០% បានចូលមកទិញទំនិញ ព្រោះតែវិធានការរក្សាគម្លាតសង្គម។ វានឹងត្រូវការពេល ៦ ទៅ១២ ខែ ដើម្បីឲ្យអារម្មណ៍អតិថិជន ដែលចូលចិត្តដើរទិញទំនិញវិលមករកសភាពធម្មតាវិញ។
ទោះយ៉ាងណា វាក៏ត្រូវពឹងផ្អែកទៅលើ ការងើបឡើងប្រសើរឡើងវិញនៃអាជីវកម្ម ដែលអាចជួយជំរុញដល់ការប្រើប្រាស់ផងដែរ ដូចជាអាជីវកម្មនៃវិស័យទេសចរណ៍ និងការនាំចេញ។
អត្ថបទទាក់ទង!
ប្រភពពី សមាគមមជ្ឈមណ្ឌលទិញទំនិញថៃ
បានឲ្យដឹងទៀតថា សមាជិករបស់ពួកគេមួយចំនួន ក៏បានបង្ហាញពីការព្រួយបារម្ភថា ពួកគេនឹងមិនអាចទទួលយកការចំណាយបានទៀតទេ
ប្រសិនបើការឆ្លងរីករាលដាលមេរោគកូវីដ-១៩ នឹងអាចកើតមានជារលកទី២នោះ។
នៅក្នុងលិខិតដែលស្នើទៅកាន់រាជរដ្ឋាភិបាល សមាគមមជ្ឈមណ្ឌលទិញទំនិញថៃ បានអំពាវនាវឲ្យរាជរដ្ឋាភិបាល ជួយប៉ះប៉ូវ ឬពន្យាពេលការបង់ពន្ធលើប្រាក់ចំណូល សម្រាប់រយៈពេល ២ ទៅ៣ឆ្នាំ ដើម្បីអនុញ្ញាតឲ្យប្រតិបត្តិករផ្សារទំនើប មានពេលវេលាគ្រប់គ្រាន់ធ្វើឲ្យអាជីវកម្មរបស់ពួកគេមានសកម្មភាពប្រសើរឡើងវិញ។
ក្រុមប្រតិបត្តិករផ្សារទំនើប ក៏បានអំពាវនាវឲ្យមានការលើកលែងពន្ធលើអចលនវត្ថុ នៅក្នុងអំឡុងពេលនៃការបិទ ឬស្ដារអាជីវកម្មផងដែរ។ ក្រុមប្រតិបត្តិករទាំងនេះ បានព្យាករថា ឧស្សាហកម្មលក់រាយរបស់ថៃ អាចនឹងធ្លាក់ចុះរហូតដល់ទៅ ៥០% នៅក្នុងឆមាសទី២ នៅឆ្នាំនេះ។
សូមបញ្ជាក់ថា ផ្សារទំនើប និងហាងលក់ទំនិញខ្នាតតូច នៅក្នុងប្រទេសថៃបានស្រូបទាញកម្លាំងពលកម្មជាង ៣២ម៉ឺននាក់៕
None
