លោក អនុសន តាម៉ាចៃ នាយកមជ្ឈមណ្ឌលស្រាវជ្រាវសេដ្ឋកិច្ច និងពាណិជ្ជកម្មនៃ សកលវិទ្យាល័យ Rangsit បានព្រមានថា ផលប៉ះពាល់នៃមេរោគ កូរ៉ូណា នឹងជះឥទ្ធិពលអវិជ្ជមានដល់ វិស័យទេសចរណ៍ថៃ ខ្លាំងជាងគេ ហើយលើសពីនេះទៅទៀត វិស័យឧស្សាហកម្មផលិត ការនាំចេញ និងវិស័យកសិកម្ម ក៏រងផលប៉ះពាល់ដូចគ្នាដែរ។
ប្រទេសថៃ ធ្វើការនាំចេញផលិតផលកសិកម្មជាង ២៧ពាន់លានដុល្លារអាមេរិក ទៅកាន់ប្រទេសចិន ជារៀងរាល់ឆ្នាំ ហើយក្រោយការកើតមានមេរោគកូរ៉ូណានេះ ការនាំចេញអាចនឹងធ្លាក់ចុះប្រមាណ ២%។
លោក អនុសន ក៏ទទូចសុំដល់ រាជរដ្ឋាភិបាលថៃ គួរតែតម្រូវឲ្យ ភ្ញៀវទេសចរចិន ធ្វើការស្នើសុំ វីសា មុននឹងអាចចូលមកប្រទេសថៃបាន ដើម្បីបើកឱកាសឲ្យ អាជ្ញាធរថៃ អាចពិចារណាទៅលើ ភ្ញៀវម្នាក់ៗ ថាគួរអនុញ្ញាតឲ្យចូលមក ប្រទេសថៃ ដែរឬអត់។
អត្ថបទទាក់ទង!
ទោះបីជាយ៉ាងណាក៏ដោយ ចិន ក៏បានធ្វើការរឹតបន្តឹងលើ សេវាកម្មក្រុមទេសចរទៅក្រៅប្រទេសដែរ ដោយសារតែ ការផ្ទុះរីករាលដាលនៃមេរោគកូរ៉ូណា នៅក្នុងប្រទេសរបស់ខ្លួន ហើយក្រសួងទេសចរណ៍ និងកីឡាថៃ បានប៉ាន់ប្រមាណថា គ្រាន់តែផលប៉ះពាល់ជាបឋម នឹងធ្វើឲ្យ វិស័យទេសចរណ៍ខាតចំណូលជាង ១ពាន់ ៦រយលានដុល្លារអាមេរិក។
សាកលវិទ្យាល័យសភាពាណិជ្ជកម្មថៃបានបង្ហាញពីការព្យាករណ៍របស់ខ្លួនថា ថៃ នឹងខាតបង់ប្រមាណ ៧ពាន់លានដុល្លារអាមេរិក ក្នុងឆ្នាំ ២០២០នេះ ដោយសារតែឥទ្ធិពលនៃមេរោគកូរ៉ូណា និងគ្រោះរាំងស្ងួតដែលបណ្តាលឲ្យប៉ះពាល់ដល់វិស័យទេសចរណ៍និងតម្រូវការប្រើប្រាស់ទំនិញថៃ។
បើសិនជា បញ្ហាមេរោគកូរ៉ូណា ត្រូវបានបញ្ចប់ក្នុងខែមីនា ឆ្នាំ ២០២០ ចំនួនភ្ញៀវទេសចរបរទេស ចូលមកកម្សាន្តនៅប្រទេសថៃ នឹងថយចុះប្រមាណ ២លាន ៤សែននាក់ ក្នុងនោះ ជនជាតិចិន មានជាង ១លាន ៨សែននាក់ ហើយថៃ នឹងខាតបង់ប្រមាណ ៣ពាន់ ៧រយលានដុល្លារអាមេរិក។
គួរជម្រាបដែរថា នៅក្នុងប្រទេសថៃ មានករណីឆ្លង ១៩ករណី ហើយក៏មានការអះអាងផងដែរថា មានអ្នកជម្ងឺ ជាសះស្បើយ ៧ករណីហើយ ដោយគ្រូពេទ្យថៃ បានប្រើប្រាស់ថ្នាំសម្រាប់ជំងឺ អេដស៍ និងផ្តាសាយធំ សម្រាប់ការព្យាបាលនេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
