គ្រាន់តែនៅថ្ងៃព្រហស្បតិ៍មួយថ្ងៃប៉ុណ្ណោះ មានពលរដ្ឋថៃបីក្រុមផ្សេងៗគ្នាបានប្រមូលផ្តុំគ្នាហែក្បួន ទាមទារឲ្យលោក ប្រាយុទ្ធ ចុះចេញពីតំណែង ដែលលោកដណ្តើមបានកាលពីឆ្នាំ២០១៤ តាមរយៈការធ្វើរដ្ឋប្រហារ។
ប៉ុន្តែបើទោះបីជាមានការ បាតុកម្ម តវ៉ាឲ្យលោកប្រាយុទ្ធចុះចេញពីតំណែងក៏ដោយ ក៏ខាងគណៈបក្សនយោបាយមួយចំនួន ដែលមានកៅអីនៅរដ្ឋសភា នៅតែមានបំណងចង់កែច្បាប់ ឲ្យ លោកប្រាយុទ្ធបន្ដកាន់តំណែងដដែល។
គេនៅចាំបានថា កាលពីប៉ុន្មានខែមុន គ្រាដែលថៃកំពុងផ្ទុះរីករាលដាលឆ្លងកូវីដ១៩ម្តងជាពីរដង លោកប្រាយុទ្ធ និង រដ្ឋមន្ត្រីសុខាភិបាលរបស់លោក ត្រូវបានបក្សប្រឆាំង និងសាធារណជនក្នុងប្រទេសថៃ ទាមទារឲ្យចេញពីដំណែងដូចគ្នាដែរ ដោយសារលោកបរាជ័យក្នុងការទប់ស្កាត់កូវីដ-១៩ និងធ្វើឲ្យសេដ្ឋកិច្ចប្រទេសមួយនេះ នៅជាប់ទ្រឹងពិបាកនឹងងើបរួច រួមផ្សំនឹងភាពយឺតយ៉ាវនៃការចាក់វ៉ាក់សាំងបង្ការកូវីដ១៩ផងដែរ។
អត្ថបទទាក់ទង!
យ៉ាងណាក៏ដោយចុះ ភាគីរដ្ឋាភិបាលថៃតាមរយៈអ្នកនាំពាក្យរបស់ខ្លួន លោក អានុឆា បុរាផាចៃស្រ៊ី (Anucha Burapachaisri) បានធ្វើការឆ្លើយតបដោយសន្តិវិធីថា៖ រដ្ឋាភិបាលរីករាយស្តាប់ និង ទទួលយករាល់ការរិះគន់ពីគ្រប់ភាគីទាំងអស់ ប៉ុន្តែលោកនាយករដ្ឋមន្ត្រី ប្រាយុទ្ធ ចាន់អូចា នៅតែមានកាតព្វកិច្ចដើម្បីគ្រប់គ្រងប្រទេសក្នុងអំឡុងពេលមានវិបត្តិកូវីដ១៩ ហើយលោកប្រាយុទ្ធ ធ្វើអ្វីៗក៏ដើម្បីតែផលប្រយោជន៍សាធារណៈតែប៉ុណ្ណោះ។
សូមបញ្ជាក់ថា បាតុកម្មទាមទារឲ្យលោកប្រាយុទ្ធ ចាន់អូចារ នាយករដ្ឋមន្ត្រីថៃ ចុះចេញពីដំណែងចុងក្រោយបំផុតនៅប្រទេសថៃ បានកើតឡើងកាលពីថ្ងៃទី២០ខែមីនាកន្លងទៅ ដែលមានបាតុករជាច្រើនរយនាក់បានចូលរួម ភាគច្រើនសុទ្ធសឹងជាយុវជន ដោយពួកគេបានដើរមកប្រមូលផ្តុំគ្នាតវ៉ានៅតំបន់ក្បែរព្រះបរមរាជវាំងថៃ។ គ្រានោះមានបាតុករជាង ៣០នាក់ត្រូវបានចាប់ខ្លួន។
ស្របពេលដែលកម្លាំងក្រុមអ្នកតវ៉ាចាប់ផ្ដើមកម្រើកឡើងវិញនេះដែរ ប្រទេសថៃបច្ចុប្បន្ន ក៏កំពុងប្រឈមនឹងករណីឆ្លងកូវីដ-១៩កាន់តែច្រើនឡើង ហើយថ្មីៗនេះថៃ អាជ្ញាធរថៃក៏បានស្នើឲ្យមានការបិទខ្ទប់ជាថ្មីទៀតសម្រាប់រយៈពេល៧ថ្ងៃ នៅក្នុងទីក្រុងបាងកក។ ប៉ុន្ដែ សំណើនេះ កំពុងស្ថិតនៅក្នុងការពិចារណានៅឡើយ ដ្បិតថា វាអាចធ្វើឲ្យមានការប៉ះពាល់ទៅដល់អាជីវកម្មត្រូវបិទទ្វារផ្អាកដំណើរការ ហើយកម្មករធ្វើការងារ អាចនឹងត្រឡប់ទៅស្រុកកំណើតតាមខេត្តក្នុងចំនួនច្រើន ដែលអាចនឹងបង្កការឆ្លងជំងឺកូវីដ-១៩កាន់តែច្រើនថែមទៀត។
សូមបញ្ជាក់ថា ចំនួនអ្នកឆ្លងកូវីដ-១៩ប្រចាំថ្ងៃនៅក្នុងប្រទេសថៃនៅតែមានរាប់ពាន់នាក់ក្នុងមួយថ្ងៃ ដោយនៅថ្ងៃទី ២៤ ខែមិថុនា តួលេខបង្ហាញថាអ្នកឆ្លងថ្មីនៅប្រទេសថៃ មានជាង៤ពាន់នាក់ ស្លាប់៣១នាក់។ សរុបចំនួនអ្នកឆ្លងកូវីដ-១៩នៅថៃមកទល់ពេលនេះ កើនដល់ប្រមាណ២៣ម៉ឺននាក់ហើយ ក្នុងនោះ អ្នកស្លាប់សរុបមានជាង១ពាន់៧រយនាក់៕
None
