កិច្ចចរចាលើកិច្ចព្រមព្រៀងពាណិជ្ជកម្មសេរីរវាងថៃ និងអឺរ៉ុបដែលត្រូវបានផ្អាកអស់រយៈពេលជាយូរឆ្នាំមកហើយនោះ ហាក់ចាប់ផ្ដើមមានពន្លឺថា អាចនឹងបន្ដឡើងវិញនៅពេលឆាប់ៗខាងមុននេះ ក្រោយពេលដែលរដ្ឋមន្ត្រីក្រសួងពាណិជ្ជកម្មថៃ លោក ជូរិន ឡាក់សាណាវិស្សុត បានជួបជាមួយនឹងលោក ភីកា តាភីអូឡា (Pirkka Tapiola) ឯកអគ្គរដ្ឋទូតសហភាពអឺរ៉ុបប្រចាំប្រទេសថៃ នាដើមសប្ដាហ៍នេះ។ភាគីទាំងពីរ ក៏រំពឹងថានឹងអាចមានការចុះហត្ថលេខាលើឯកសារយោគយល់គ្នាមួយ ដើម្បីជាក្របខ័ណ្ឌសម្រាប់កិច្ចចរចាកិច្ចព្រមព្រៀងពាណិជ្ជកម្មសេរីរវាងរដ្ឋាភិបាលទាំងពីរឡើងវិញ ដែលអាចចាប់ផ្ដើមឡើងនៅឆ្នាំក្រោយនេះ។
លោក ជូរិន រដ្ឋមន្ត្រីក្រសួងពាណិជ្ជកម្មថៃបាននិយាយថា រដ្ឋាភិបាល និងក្រសួងពាណិជ្ជកម្ម គឺមានភាពម៉ឺងម៉ាត់មែនទែនក្នុងការបន្ដកិច្ចចរចា កិច្ចព្រមព្រៀងពាណិជ្ជសេរី (FTA) ជាមួយនឹងសហភាពអឺរ៉ុប ខណៈដែលសហភាពអឺរ៉ុបខ្លួនឯងផ្ទាល់ក៏មានបំណងយកប្រទេសថៃ ជាប្រទេសទី៣ក្នុងចំណោមប្រទេសសមាជិកអាស៊ាន សម្រាប់ការចុះហត្ថលេខាលើកិច្ចព្រមព្រៀងពាណិជ្ជកម្មសេរីនេះផងដែរ បន្ទាប់ពីអឺរ៉ុបធ្លាប់បានធ្វើជាមួយនឹងសិង្ហបុរី និងវៀតណាម។
រដ្ឋមន្ត្រីក្រសួងពាណិជ្ជកម្មរូបនេះ បានគូសបញ្ជាក់ថា នៅពេលដែលកិច្ចព្រមព្រៀងពាណិជ្ជកម្មសេរីបានចូលជាធរមាន ថៃអាចនឹងទទួលបានអត្ថប្រយោជន៍ទាំងក្នុងការពង្រីកការធ្វើពាណិជ្ជកម្ម និងការវិនិយោគ ព្រោះប្រទេសសមាជិកសហភាពអឺរ៉ុបទាំង២៧ប្រទេស គឺជាដៃគូពាណិជ្ជកម្មធំបំផុតទី៥របស់ថៃ បន្ទាប់ពីអាស៊ាន, ប្រទេសចិន, ជប៉ុន និងអាមេរិក។
អត្ថបទគួរអាន
អគ្គនាយកនៃអគ្គនាយកដ្ឋានចរចាពាណិជ្ជកម្មរបស់ថៃ បានលើកឡើងថា ឯកសារយោគយល់គ្នាដែលរដ្ឋាភិបាលថៃ និងអឺរ៉ុបគ្រោងរៀបចំឡើង ដើម្បីឈានទៅរកកិច្ចចរចាកិច្ចព្រមព្រៀងពាណិជ្ជកម្មសេរីឡើងវិញនោះ គឺទាក់ទងទៅនឹងការធ្វើពាណិជ្ជកម្មទំនិញ និងសេវាកម្ម និងការវិនិយោគ ក៏ដូចជាផលប្រយោជន៍ផ្សេងទៀត រួមមានកម្មសិទ្ធបញ្ញា លទ្ធកម្មរដ្ឋាភិបាល និងការធ្វើពាណិជ្ជកម្មតាមអេឡិចត្រូនិកជាដើម។ ទោះយ៉ាងណា ឯកសារយោគយល់គ្នាទាំងនេះ ត្រូវមានការពិចារណា និងសម្រេចដោយភាគីទាំងសងខាងជាមុនសិន មុននឹងឈានដល់ការចាប់ផ្ដើមកិច្ចចរចាជាផ្លូវការ។
មែនទែនទៅ ការចរចាលើកិច្ចព្រមព្រៀងពាណិជ្ជកម្មសេរីរវាងថៃ និងអឺរ៉ុបនេះ ត្រូវបានផ្អាកតាំងពីឆ្នាំ២០១៤ មកម្ល៉េះ ពោលគឺចាប់តាំងពីពេលដែលប្រទេសថៃមានរដ្ឋប្រហារដោយយោធា ហើយចាប់តាំងពីពេលនោះមក រដ្ឋាភិបាលថ្មីរបស់ថៃ បានខិតខំតាមចែចូវអឺរ៉ុបខ្លាំងមែនទែន ដើម្បីទាញអឺរ៉ុបឲ្យចូលតុចរចាឡើងវិញ។
សូមបញ្ជាក់ថា នៅឆ្នាំ២០២០ ទំហំពាណិជ្ជកម្មទ្វេភាគីរវាងថៃ និងអឺរ៉ុប សម្រេចបានប្រមាណជាង ៣៣ពាន់លានដុល្លារ ដែលមានប្រមាណជាង ៧,៥% នៃទំហំពាណិជ្ជកម្មសរុបរបស់ថៃ ដែលមានជាមួយពិភពលោក។ ក្នុងនោះ ការនាំចេញរបស់ថៃទៅអឺរ៉ុបសម្រេចបានជាង ១៧ពាន់៦រយលានដុល្លារអាមេរិក៕
None
