ស្របពេលដែល ប្រទេសថៃបានប្រកាសបិទទ្វារ លែងទទួលអ្នកដំណើរចូលមកក្នុងប្រទេសខ្លួនដោយមិនចាំបាច់ធ្វើចត្តាឡីស័កទៀត ប្រទេសនេះ ក៏នៅតែបន្ដទទួលអ្នកដំណើរឲ្យចូលប្រទេសខ្លួនជាមួយនឹងការធ្វើចត្តាឡីស័ក ដែលមានតម្រូវដោយក្រសួងសុខាភិបាលផងដែរ។ បន្ថែមពីនេះ អ្នកដំណើរទាំងនោះ ត្រូវតែតម្រូវឲ្យចុះឈ្មោះយ៉ាងតិចឲ្យបានមុន ១សប្ដាហ៍ នៃការធ្វើដំណើរទៅកាន់ប្រទេសថៃ។ កម្មវិធី Phuket “sandbox” ក៏នឹងបន្ដឡើងវិញផងដែរ ដែលកម្មវិធី តម្រូវឲ្យភ្ញៀវទេសចរអន្តរជាតិដែលមកកម្សាន្ដនៅតំបន់ទេសចរណ៍កោះភូកេត ត្រូវស្នាក់នៅទីនេះ រយៈពេលយ៉ាងតិច៧ថ្ងៃ ទើបអាចធ្វើដំណើរទៅតំបន់ផ្សេងទៀតបាន។
ការឈប់អនុញ្ញាតឲ្យអ្នកដំណើរអន្តរជាតិចូលមកប្រទេសថៃ ដោយមិនធ្វើចត្តាឡីស័កនេះ នឹងត្រូវធ្វើឡើងចាប់ពីថ្ងៃទី ២២ ធ្នូ រហូតដល់ថ្ងៃទី០៤មករា ២០២២ ហើយបន្ទាប់ពីនោះ រដ្ឋាភិបាលថៃ នឹងសម្រេចចិត្តជាថ្មីទៀត ថាតើត្រូវបន្ដវិធានការនេះទៀត ក៏ត្រូវផ្អាកវិញ។
ជាមួយគ្នានេះដែរ ក៏មានមនុស្សប្រមាណ ៩ម៉ឺននាក់ ដែលទទួលបានការអនុញ្ញាតរួចហើយ ឲ្យធ្វើដំណើរចូលប្រទេសថៃ ដោយមិនចាំបាច់ធ្វើចត្តាឡីស័ក ប៉ុន្ដែ មិនទាន់បានធ្វើដំណើរចូលក្នុងប្រទេសថៃនោះ ក៏ត្រូវបានរាជរដ្ឋាភិបាលថៃអនុញ្ញាតឲ្យចូលមកដោយមិនចាំបាច់ធ្វើចត្តាឡីស័កដែរ ប៉ុន្ដែ ពួកគេត្រូវធ្វើតេស្ដ RT-PCR ចំនួន២ដង ពោលគឺនៅមុនពេលមកដល់តេស្ដម្ដង និង៧ថ្ងៃក្រោយតេស្ដមើលម្ដងទៀត។អត្ថបទគួរអាន
គិតមកទល់ពេលនេះ ប្រទេសថៃ បានរកឃើញករណីវិជ្ជមានមេរោគបំប្លែងថ្មី អូមីក្រុងចំនួន ៦៣ ករណីហើយ ដោយភាគច្រើនជាករណីនាំចូលពីក្រៅប្រទេស។ កាលពីថ្ងៃចន្ទសប្ដាហ៍នេះ ប្រទេសថៃក៏ទើបតែបានរាយការណ៍ពីករណីឆ្លង អូមីក្រុង ចូលក្នុងសហគមន៍ជាលើកដំបូងផងដែរ ខណៈដែលបច្ចុប្បន្ន មេរោគបំប្លែងថ្មីផ្សេងៗទៀត ពិសេស គឺមេរោគ ឌែលតា កំពុងបន្ដលុកលុយខ្លាំងនៅឡើយនៅក្នុងប្រទេសនេះ ដោយករណីឆ្លងថ្មីប្រចាំថ្ងៃមានខ្ទង់រាប់ពាន់នាក់។
ប្រទេសថៃ បានចាប់ផ្ដើមទទួលភ្ញៀវទេសចរអន្តរជាតិចាក់វ៉ាក់សាំងរួច ដោយមិនចាំបាច់ត្រូវធ្វើចត្តាឡីស័ក តាំងពីខែវិច្ឆិកាមក ហើយកន្លងមក ថៃបានបើកទទួលអ្នកដំណើរមកពីប្រទេស និងដែនដីចំនួន ៦៣។
សូមបញ្ជាក់ថា កាលពីឆ្នាំ២០២០ ដែលរងទុក្ខខ្លាំងដោយសារកូវីដ១៩ សេដ្ឋកិច្ចថៃ បានដាំក្បាលចុះ ៦,១% ហើយនៅឆ្នាំ២០២១នេះ រំពឹងថា នឹងងើបឡើងវិញក្នុងកំណើន១,២% និងបន្ដកើនដល់ ៣,៥% ទៅ ៤,៥% នៅឆ្នាំ២០២២ខាងមុខ។ ប៉ុន្ដែ ក្នុងករណី ដែលថៃបន្ដអូសបន្លាយកានត់យូរនូវវិធានការ ឈប់ទទួលអ្នកដំណើរឲ្យចូលមកដោយមិនចាំបាច់ធ្វើចត្តាឡីស័ក នោះវាអាចនឹងធ្វើឲ្យសេដ្ឋកិច្ចថៃដើរយឺតមួយឆ្នាំទៀត៕None
