អាជ្ញាធរអាកាសចរណ៍ស៊ីវិលថៃ បានប្រកាសឡើងពីការពន្យារពេលបន្ថែម១ខែទៀត សម្រាប់ការបិទជើងហោះហើរនេះ គឺនៅមុនថ្ងៃផុតកំណត់នៃការប្រកាសបិទចាស់ ដែលនឹងត្រូវបញ្ចប់នៅក្នុងថ្ងៃទី ៣០ខែមេសានេះ។
បើតាមសេចក្ដីប្រកាសនេះ បានឲ្យដឹងថា ការបន្តបិទជើងហោះហើរនេះ គឺដើម្បីគាំទ្រដល់មជ្ឈមណ្ឌលសម្រាប់ការគ្រប់គ្រង ស្ថានភាពកូវីដ-១៩ ដើម្បីគ្រប់គ្រប់ការរីករាលដាលនៃមេរោគនៅក្នុងប្រទេសថៃ។
ជាមួយគ្នានេះ រាជរដ្ឋាភិបាលថៃក៏បានប្រកាសបន្តការដាក់ប្រទេសនៅក្នុងស្ថានភាពអាសន្នសម្រាប់រយៈពេល១ខែទៀតផងដែរ ពោលគឺនឹងបន្ដរហូតដល់ថ្ងៃទី ៣១ ខែឧសភាដែរ។
អត្ថបទទាក់ទង!
យ៉ាងណាក៏ដោយចុះ ការសម្រេចចិត្តបន្តពន្យារពេលបន្ថែមនៃរបិទជើងហោះហើរនេះ វាត្រូវបានគេមើលឃើញថា នឹងធ្វើឲ្យប៉ះពាល់ដល់ក្រុមហ៊ុនអាកាសចរណ៍អន្តរជាតិដែលមានគម្រោងបើកជើងហោះហើររបស់ខ្លួនឡើងវិញមកកាន់ប្រទេសថៃ រួមមានដូចជា Philippines AirAsia ជាដើម ដែលបានប្រកាសថា នឹងបើកជើងហោះហើរពីក្រុងម៉ានីលទៅកាន់បាងកក នៅថ្ងៃទី០១ ខែឧសភា។
ប្រទេសថៃ នៅឈរលំដាប់លេខរៀងទី ៥៨ ក្នុងពិភពលោក ដែលមានករណីឆ្លងកូវីដ-១៩ច្រើនជាងគេ ខណៈដែលសហរដ្ឋអាមេរិកឈរលេខ១។
សូមបញ្ជាក់ថា កន្លងមកនេះ មានក្រុមហ៊ុនអាកាសចរណ៍ក្នុងស្រុកនៃប្រទេសថៃចំនួន ៨ក្រុមហ៊ុនបានត្រៀមខ្លួនដើម្បីជួបពិភាក្សាជាមួយនឹងក្រសួងហិរញ្ញវត្ថុ ក្នុងការស្វែងរកប្រាក់កម្ចីការប្រាក់ទាប ដើម្បីរក្សាដង្ហើមអាជីវកម្មរបស់ពួកគេ។ ការស្វែងរកប្រាក់កម្ចីនេះ គឺធ្វើឡើង ក្រោយពីក្រុមហ៊ុនអាកាសចរណ៍ទាំងនោះ បានគោរពតាមសំណើរបស់រាជរដ្ឋាភិបាល ដោយមិនបញ្ឈប់បុគ្គលិកប្រហែល ៣ ទៅ៥ម៉ឺននាក់នៅក្នុងឧស្សាហកម្មអាកាសចរណ៍ ចំពេលដែលមានវិបត្តិកូវីដ-១៩។
តាមប្រភពព័ត៌មានបានបញ្ជាក់ថា ក្រុមហ៊ុនអាកាសចរណ៍ទាំង៨ បានដាក់ដាក់លិខិតទៅកាន់ក្រសួងរួចហើយ ដោយបានស្នើសុំប្រាក់កម្ចីការប្រាក់ទាប សរុបមានទំហំទឹកប្រាក់ប្រមាណ ២៤,១៥ ពាន់លានបាត ឬស្មើនឹងជាង ៧៤០ លានដុល្លារអាមេរិក។ ប៉ុន្ដែ មកទល់ពេលនេះ នៅមិនទាន់មានការឆ្លើយតបណាមួយពីរដ្ឋាភិបាលនៅឡើយទេ៕
None
