ប្រទេសថៃ ចាំបាច់ត្រូវធ្វើកំណែទម្រង់ការផ្ដល់ឥណទាន ដើម្បីជួយដល់បណ្ដាក្រុមហ៊ុនអចលនទ្រព្យនៅឆ្នាំ២០២៥

លោក ឌីរ៉ា ថងវិឡៃ (Dhira Thongwilai) នាយកប្រតិបត្តិក្រុមហ៊ុនអចលនទ្រព្យក្នុងស្រុក Pruksa Real Estate បានកត់សម្គាល់ថា វិស័យអចលនទ្រព្យក្នុងប្រទេសថៃ បានធ្លាក់ចុះរហូតដល់ទៅ២០% ក្នុងឆ្នាំ២០២៤ នេះ ហើយរំពឹងថា និន្នាការធ្លាក់ចុះនេះនឹងបន្តហៀរចូលដល់ឆ្នាំ២០២៥។ ទោះជាយ៉ាងណា លោករំពឹងថា ស្ថានភាពនឹងមានភាពល្អប្រសើរឡើងវិញនៅត្រីមាសទី១ ដើមឆ្នាំ២០២៥ ខណៈដែលបណ្ដាក្រុមហ៊ុនអភិវឌ្ឍន៍នឹងសម្រុកលក់ចេញស្តុកលំនៅឋានដែលមានស្រាប់។

នាយកប្រតិបត្តិរូបនេះ ក៏បានលើកឡើងដែរថា ការបន្ធូរបន្ថយវិធាន ស្ដីពីការកំណត់ទំហំកម្ចីធៀបជាមួយទ្រព្យបញ្ចាំ នឹងអាចទាក់ទាញអ្នកទិញផ្ទះទី២ និងជួយជំរុញគម្រោងលំនៅឋានដែលមានតម្លៃសមរម្យ។ លោកបានបន្តថា សម្រាប់រូបលោកផ្ទាល់ លោកមានគម្រោងផ្តោតលើផ្នែកលំនៅឋានដែលមានតម្លៃសមរម្យនៅឆ្នាំក្រោយ ដោយផ្ទះទោល ឬ Single House មានតម្លៃចន្លោះប្រមាណ២០ម៉ឺនដុល្លារអាម៉េរិក ទៅជាង៤៣ម៉ឺនដុល្លារអាម៉េរិក។

បច្ចុប្បន្ន ក្រុមហ៊ុន Pruksa Real Estate មានគម្រោងមិនទាន់បញ្ចប់ក្នុងទំហំទឹកប្រាក់ចន្លោះពី៨៧លានដុល្លារអាម៉េរិក ទៅ១១៧លានដុល្លារអាម៉េរិក។ ហើយស្តុកលំនៅឋានជាប្រភេទផ្ទះទោល របស់ក្រុមហ៊ុននេះមានតម្លៃប្រមាណ១១៧លានដុល្លារអាម៉េរិក ដោយ៤០% ក្នុងចំណោមនោះជាផ្ទះដែលមានតម្លៃចន្លោះពីជាង៨ម៉ឺន៧ពាន់ដុល្លារអាម៉េរិក ទៅជាង១៥ម៉ឺន៥ពាន់ដុល្លារអាម៉េរិក។

កាលពីពេលថ្មីៗនេះ ក្រុមហ៊ុន Pruksa Real Estate បានបើកដំណើរការគម្រោងថ្មីមានឈ្មោះថា ឌឹ ផាម រ៉េស៊ីឌិន ប៉ាត់តាណាកន (The Palm Residences Pattanakarn) ដែលជាគម្រោងផ្ទះទោលកម្ពស់៣ជាន់បែបប្រណីត ដែលមានតម្លៃសរុបប្រមាណជាង៧៥លានដុល្លារអាម៉េរិក៕

ដោយ: តែម សុខុម