សារព័ត៌មាន South China Morning Post ផ្សាយថា នៅក្នុងទីក្រុងបាងកក ប្រទេសថៃ មាន«មន្ទីរពេទ្យសណ្ឋាគារ» យ៉ាងហោចណាស់ ២៣កន្លែង ដែលបានបើកកាលពីពេលថ្មីៗនេះ ផ្ដល់សេវាចត្តាឡីស័កលំដាប់ VIP ដល់អ្នកជំងឺកូវីដ-១៩ ដែលសម្បូរលុយ ។
ជាក់ស្ដែង នៅសណ្ឋាគារ Pullman Grande នៅទីក្រុងបាងកក បន្ទប់ប្រហែល ២៥០បន្ទប់ នៃសណ្ឋាគារលំដាប់ផ្កាយ ៥ នេះ បានរៀបចំកែប្រែទៅជាគ្រែពេទ្យរបស់មន្ទីរពេទ្យឯកជន ធុនប៊ុរី នៅចំពេលដែលករណីឆ្លងកូវីដ-១៩បានកើនឡើងយ៉ាងគំហុក នៅក្នុងប្រទេសថៃ ។
សណ្ឋាគារលំដាប់ផ្កាយដែលប្រែក្លាយជាមន្ទីរពេទ្យទាំងនេះ ផ្ដល់សេវាចត្តាឡីស័កសម្រាប់អ្នកជំងឺកូវីដ-១៩ ដែលមានរោគសញ្ញាស្រាល ឬគ្មានរោគសញ្ញា និងដែលពុំមានបញ្ហាសុខភាពអ្វីទៀត ផ្សេងពីជំងឺកូវីដ-១៩ ។
អត្ថបទទាក់ទង
នៅប្រទេសថៃ អ្នកជំងឺកូវីដ-១៩អាចទទួលការព្យាបាលនៅតាមមន្ទីរពេទ្យរដ្ឋដោយឥតគិតថ្លៃ ប៉ុន្តែ ការសម្រាកធ្វើចត្តាឡីស័កនៅ«មន្ទីរពេទ្យសណ្ឋាគារ» Pullman Grande នេះ អ្នកជំងឺអាចត្រូវចំណាយប្រាក់ដល់ទៅ ១ម៉ឺន ២ពាន់បាត (ឬ ៣៨៤ដុល្លារអាមេរិក) ក្នុងមួយយប់ ។ នេះបើយោងតាមបុគ្គលិកថ្នាក់គ្រប់គ្រងមួយរូប នៃមន្ទីរពេទ្យឯកជន ធុនប៊ុរី ហ៊ែល្សឃែ គ្រុប ។
ថ្មីៗនេះ ក្រុងបាងកកក៏បានរៀបចំបង្កើតមន្ទីរពេទ្យបណ្ដោះអាសន្ន ដែលភាគច្រើនប្រើប្រាស់ទីតាំងសាធារណៈ ដូចជាកីឡដ្ឋាន ចំនួន ៤កន្លែង មានចំនួនគ្រែ ១២៥០ ប៉ុន្តែ ចំនួននេះត្រូវបានគេរាយការណ៍ថា មិនទាន់គ្រប់គ្រាន់សម្រាប់ទទួលអ្នកជំងឺដែលមានចំនួនកើនឡើងយ៉ាងគំហុកនោះទេ ។
ប៉ុន្តែ ចំពោះបន្ទប់«មន្ទីរពេទ្យសណ្ឋាគារ»វិញ គេរាយការណ៍ថា មានចំនួនប្រហែល ៤៩០០គ្រែ នៅក្នុងទីក្រុងបាងកក ហើយចំនួននេះអាចនឹងបង្កើនដល់ ៧០០០គ្រែ នៅពេលដ៏ខ្លីខាងមុខ ។
ទោះយ៉ាងណា សំណួរចោទសួរថា តើអ្នកជំងឺកូវីដ-១៩ដែលគ្មានរោគសញ្ញា ឬដែលឈឺស្រាលៗ មានលុយពីណា ដើម្បីចូលសម្រាកនៅក្នុងមន្ទីរពេទ្យសណ្ឋាគារទាំងនេះ ខណៈមន្ទីរពេទ្យសាធារណៈកំពុងខ្វះគ្រែព្យាបាល ?
វេជ្ជបណ្ឌិតឯកជនមួយរូប ដែលសុំមិនបញ្ចេញឈ្មោះ បាននិយាយថា ការស្នាក់នៅចត្តាឡីស័កនៅក្នុងមន្ទីរពេទ្យសណ្ឋាគារ (hospitel ជាពាក្យផ្គុំគ្នារវាង hospital និង hotel) អាចចំណាយប្រាក់ដល់ទៅ ១២៨០០ដុល្លារអាមេរិក ខណៈដែលប្រាក់ខែមធ្យមរបស់អ្នកទីក្រុងបាងកក មានត្រឹមតែប្រហែល ២១០០០បាត (៦៧០ដុល្លារអាមេរិក) ប៉ុណ្ណោះ ៕
