ថៃហាមការជួបជុំជាសាធារណៈនៅទូទាំងប្រទេស បន្ទាប់ពីកូវីដ-១៩ផ្ទុះខ្លាំងឡើងវិញ

ប្រទេសថៃដែលនៅជិតខាងភូមិផងរបងជាមួយកម្ពុជា នៅថ្ងៃទី១៧ ខែកក្កដានេះ បានដាក់ចេញនូវការហាមប្រាមលើការជួបជុំគ្នាជាសាធារណៈនៅទូទាំងប្រទេស បន្ទាប់ពីអាជ្ញាធរនៃប្រទេសនេះបានរកឃើញករណីឆ្លងថ្មីនិងករណីស្លាប់កើនឡើងយ៉ាងគំហុក ។

បុគ្គលិកសុខាភិបាលក្នុងសំលៀកបំពាក់ការពារកូវីដ១៩ក្នុងប្រទេសថៃ

ដោយ ខេមបូណូមីស 2 years

អំពី កូវីដ-១៩ នៅថៃ

ទីភ្នាក់ងារព័ត៌មាន រ៉យទ័រ បានផ្សាយថា នៅថ្ងៃទី១៧ ខែកក្កដា ប្រទេសថៃបានរកឃើញករណីឆ្លងថ្មី កូវីដ-១៩ ចំនួន ១ម៉ឺន ៨២ករណី និងស្លាប់ ១៤១នាក់ ដែលជាចំនួនខ្ពស់បំផុតមិនធ្លាប់មានកន្លងមក និងនាំឲ្យករណីឆ្លងសរុបកើនឡើងដល់ ៣៩១.៩៨៩នាក់ និងករណីស្លាប់សរុបឡើងដល់ ៣២៤០នាក់ហើយ ចាប់តាំងពីការចាប់ផ្ដើមនៃជំងឺកាចសាហាវនេះមក ។

បម្រាមហាមឃាត់ការជួបជុំជាសាធារណៈនេះ គឺមានចែងពីទោសទណ្ឌជាប់ពន្ធនាគារដល់ទៅ ២ឆ្នាំ ឬពិន័យជាប្រាក់ ១២២០ដុល្លារអាមេរិក ឬពិន័យទាំងពីររួមគ្នា ។

បន្ថែមលើបម្រាមចុងក្រោយនេះ នាយករដ្ឋមន្ត្រីថៃ លោក ប្រាយុត ចាន់អូចា បាននិយាយថា រដ្ឋាភិបាលលោកកំពុងពិចារណាដាក់ចេញនូវវិធានការរឹតបន្តឹងបន្ថែមច្រើនថែមទៀត ខណៈដែលប្រទេសនេះប្រយុទ្ធប្រឆាំងនឹងជំងឺឆ្លងដ៏អាក្រក់បំផុត ចាប់តាំងពីខែមេសាមក បន្ទាប់ពីការចូលមកដល់នៃមេរោគកូវីដ-១៩ បំប្លែងថ្មី អាល់ហ្វា និងឌែលតា ៕