អ្នកនាំពាក្យរាជរដ្ឋាភិបាលថៃបានឱ្យដឹងថា នាយករដ្ឋមន្ត្រី លោក ប្រាយុទ្ធ ចាន់អូចា បន្តរំពឹងថាចំនួនទេសចរអរន្តជាតិនឹងកើនឡើងជាបន្តបន្ទាប់ទៀត ខណៈដែលមានក្រុមហ៊ុនអាកាសចរណ៍កាន់តែច្រើនមកពីមជ្ឈិមបូព៌ា និងអឺរ៉ុបកំពុងស្នើសុំកន្លែងចុះចតនៅក្នុងប្រទេស។
លោកបានបន្តថា ចាប់តាំងពីថ្ងៃទី ១ ខែវិច្ឆិកា ក្រុមហ៊ុនអាកាសចរណ៍ចំនួន ១៨ បន្ថែមទៀតបានបន្តជើងហោះហើរទៅ និងមកពីអាកាសយានដ្ឋានសុវណ្ណភូមិ ដែលនាំឱ្យចំនួនជើងហោះហើរសរុបដែលបម្រើនៅមជ្ឈមណ្ឌលអាកាសចរណ៍ដ៏សំខាន់របស់ទីក្រុងបាងកកមួយនេះ កើនឡើងដល់ ២ពាន់ជើងហើយ។
ទន្ទឹមនឹងនេះ ក្រុមហ៊ុនអាកាសចរណ៍ចំនួន ១៩ កំពុងដំណើរការជើងហោះហើរចំនួន ៧៩៣ ជើងក្នុង និងក្រៅអាកាសយានដ្ឋានភូកេតក្នុងខែវិច្ឆិកានេះ ដែលកើនឡើង ៣៩% ធៀបនឹងខែតុលា។
តែយ៉ាងណាមិញ សូមជម្រាបថា ក្នុងចំណោមភ្ញៀវបរទេសជិត ៤ម៉ឺន ៥ពាន់នាក់ មានអ្នកដំណើរចំនួន ២ពាន់នាក់ ត្រូវបានឆ្លងកាត់ការធ្វើចត្តាឡីស័កមុនពេលពួកគេត្រូវបានអនុញ្ញាតឱ្យធ្វើដំណើរទៅកាន់កន្លែងផ្សេងៗក្នុងប្រទេសថៃ ហើយក្នុងនោះ មានភ្ញៀវបរទេសចំនួនតែ ៥២នាក់ប៉ុណ្ណោះ ដែលបានធ្វើតេស្តវិជ្ជមានកូវីដ១៩។
អត្ថបទគួរអាន
សូមជម្រាបថា កាលពីពេលថ្មីៗនេះ អាជ្ញាធរទីក្រុងបាងកក បានយល់ព្រមដកហូតវិធានការរឹតបន្តឹងលើភោជនីយដ្ឋានវិញហើយ ដែលហាងទាំងនោះត្រូវបានអនុញ្ញាតឱ្យបម្រើនូវគ្រឿងស្រវឹងឡើងវិញចាប់ពីថ្ងៃអង្គារសប្ដាហ៍នេះតទៅ។ ទោះយ៉ាងណា កន្លែងទាំងនោះត្រូវតែមានវិញ្ញាបនប័ត្រទាក់ទងនឹងកូវីដ១៩ "Thai Stop Covid Plus " ដើម្បីធានាសុវត្ថិភាព និងរដ្ឋបាលសុខភាព ពីក្រសួងទេសចរណ៍ និងកីឡាថៃ។
ក្រោយពីមើលឃើញពី សន្ទុះភ្ញៀវទេសចរអន្តរជាតិចូលមកកាន់តែច្រើន នាយករដ្ឋមន្ត្រីថៃ ក៏កំពុងតែមានបំណងក្នុងការបើកតំបន់ផ្សេងៗបន្ថែមទៀត ដើម្បីទទួលទេសចរផងដែរ។ សូមបញ្ជាក់ថា ប្រទេសថៃ គឺជាប្រទេសដំបូងគេនៅអាស៊ាននេះ ដែលបានបើកដំណើរការសាកល្បងទទួលទេសចរចាក់វ៉ាក់សាំងរួច ដោយកន្លងមកថៃបានចាប់ផ្ដើមពីខេត្តភូកេតទៅមុន ហើយបានពង្រីកបើកតំបន់ផ្សេងៗជាបន្តបន្ទាប់ ហើយចាប់តាំងពីថ្ងៃទី ០១ ខែវិច្ឆិកាមក ទេសចរអន្តរជាតិមកពីជិត៥០ប្រទេស និងដែនដីអាចធ្វើដំណើរចូលប្រទេសថៃបាន ដោយមិនចាំបាច់ធ្វើចត្តាឡីស័កនោះឡើយ ប្រសិនបើពួកគេទាំងនោះបានចាក់វ៉ាក់សាំងគ្រប់ចំនួន២ដូសបានរួចរាល់៕អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
