សារព័ត៌មាន the Nation បានរាយការណ៍នៅថ្ងៃទី១៧ ខែធ្នូ ថា យោធាថៃ នៅតែមិនអស់ចិត្តដាក់ការសង្ស័យថា ប្រេងឥន្ធនៈដែលកំពុងប្រើប្រាស់នៅកម្ពុជា ជាប្រេងឥន្ធនៈ ដែលរត់ពន្ធពីប្រទេសថៃ ខណៈកម្ពុជា បានបញ្ឈប់ការនាំចូលប្រេងឥន្ធនៈពីថៃ ទាំងស្រុង តាំងពីមុនមានការប៉ះទង្គិចគ្នានៅតាមព្រំដែនកាលពីខែកក្កដា មកម្ល៉េះ។ ការដាក់ការសង្ស័យនេះបានធ្វើឱ្យថៃ មានការមិនទុកចិត្តលើឡាវ រហូតជំរុញឱ្យរដ្ឋមន្រ្តីថាមពលថៃ លោក ប្រាសឺត ស៊ីនសុកប្រាសឺត (Prasert Sinsukprasert) ប្រាប់ទៅសមភាគីឡាវ លោក ម៉ាឡៃថុង កុម៉ាស៊ីត (Malaithong Kommasith) ថា ប្រេងឥន្ធនៈដែលនាំចូលពីប្រទេសថៃ អាចប្រើប្រាស់បានតែក្នុងប្រទេសឡាវប៉ុណ្ណោះ ហើយបើឡាវ ធ្វើការនាំចេញបន្តទៅប្រទេសកម្ពុជា គឺខុសច្បាប់។
ការដាក់ការសង្ស័យនេះ ដោយសារយោធាថៃ មិនបានស៊ើបអង្កេតច្បាស់លាស់លើចំណាត់ការបិទខ្ទប់ប្រេងឥន្ធនៈនាពេលថ្មីៗនេះ ក្រោយមានការបង្ហោះសារលើបណ្តាញសង្គមពាក់ព័ន្ធនឹងលំហូរប្រេងគេចពន្ធពីថៃ ចូលមកប្រទេសកម្ពុជា។
តែយ៉ាងណាឆ្លើយតបនឹងបញ្ហានេះ លោក ផាន់តុង ឡយគុលណាន់តា (Phantong Loykulnanta) អគ្គនាយកគយថៃ បានអះអាងថា ការនាំចេញប្រេងឥន្ធនៈពីថៃ ទៅកាន់ប្រទេសឡាវ ចាប់ពីខែតុលា ដល់ខែធ្នូ ឆ្នាំ២០២៥ មានតិចតួចប៉ុណ្ណោះមិនដូចការផ្សព្វផ្សាយតាមបណ្តាញសង្គមនោះទេ។ ជាមួយគ្នានេះការនាំចេញប្រេងឥន្ធនៈពីថៃ ទៅឡាវ ក៏មិនមានការប្រែប្រួលនោះដែរ ដោយមួយថ្ងៃប្រមាណ២០រថយន្ត ពេលខ្លះតិចជាងនេះ ហើយពេលខ្លះក៏អាចឡើងដល់៥០រថយន្តក្នុងមួយថ្ងៃ។
គួរបញ្ជាក់ថា កម្ពុជា បានសម្រេចផ្អាកនាំចូលប្រេងឥន្ធនៈ និងឧស្ម័នគ្រប់ប្រភេទចាប់តាំងពីថ្ងៃទី២៣ ខែមិថុនា មកម្ល៉េះ ដើម្បីឆ្លើយតបនឹងការគំរាមរបស់ថៃ។ បើតាមការអះអាងរបស់រដ្ឋមន្ត្រីក្រសួងរ៉ែ និង ថាមពល ប្រេងឥន្ធនៈដែលកំពុងប្រើប្រាស់នៅកម្ពុជា គឺនាំចូលពីប្រទេសសិង្ហបុរី និងវៀតណាម៕
ដោយៈ សរ សុជាតិ
