ចំណែកប្រាក់ដុល្លារក្នុងទុនបម្រុងអន្តរជាតិ កំពុងធ្លាក់ចុះ តើពិភពលោកកំពុងបោះបង់ប្រាក់ដុល្លារឬ?

ប្រាក់ដុល្លារអាម៉េរិក មានចំណែកគ្របដណ្ដប់៥៦% នៃទុនបម្រុងអន្តរជាតិ របស់ពិភពលោកក្នុងឆ្នាំ២០២៥ ដោយធ្លាក់ចុះពី៦៤% បើធៀបទៅនឹងមួយទសវត្សរ៍មុន។ ការធ្លាក់ចុះនេះត្រូវបានគេមើលឃើញថា ជាសញ្ញានៃបដិដុល្លារនីយកម្ម ឬការកាត់បន្ថយការពឹងផ្អែកលើប្រាក់ដុល្លារ។ ប៉ុន្តែក្រុមអ្នកស្រាវជ្រាវនៅធនាគារកណ្ដាលអាម៉េរិក សាខាក្រុងញូវយ៉ក បានអះអាងថា ស្ថានការណ៍មានភាពស្មុគស្មាញជាងនេះ។ ការសិក្សារបស់ពួកគេបានរកឃើញថា ចាប់តាំងពីឆ្នាំ២០១៥ មានប្រទេសមួយចំនួនបង្កើនការកាន់កាប់ប្រាក់ដុល្លារ ខណៈប្រទេសមួយចំនួនទៀតបានកាត់បន្ថយការកាន់កាប់ប្រាក់ដុល្លារ។
ចន្លោះឆ្នាំ២០១៥ ដល់ឆ្នាំ២០១៩ ចិន និងរុស្ស៊ី គឺជាប្រទេសសំខាន់ៗដែលបានរួមចំណែកធ្វើឱ្យការកាន់កាប់ប្រាក់ដុល្លារធ្លាក់ចុះ។ ហើយនៅអំឡុងឆ្នាំ២០១៩ ដល់ឆ្នាំ២០២៣ ចិន រុស្ស៊ី ម៉ិកស៊ិក និងម៉ារ៉ុក បានរួមចំណែកយ៉ាងសំខាន់ដល់ការធ្លាក់ចុះនេះ។ បើតាមការអះអាងរបស់ក្រុមអ្នកស្រាវជ្រាវ ប្រទេសជាច្រើនបានកែសម្រួលទុនបម្រុងរបស់ខ្លួនដោយផ្អែកលើតម្រូវការជាក់ស្ដែងរបស់ប្រទេសនីមួយៗ ដូចជាការគ្រប់គ្រងអត្រាប្តូរប្រាក់ ការរក្សាលទ្ធភាពប្រើប្រាស់ប្រាក់ដុល្លារ និងការការពារខ្លួនពីវិបត្តិហិរញ្ញវត្ថុជាដើម។ ពួកគេបានសន្និដ្ឋានថា មិនទាន់មានភ័ស្តុតាងច្រើន ដែលបង្ហាញថា ប្រទេសនានាកំពុងងាកចេញពីប្រាក់ដុល្លារជាទ្រង់ទ្រាយធំ និងជាសកលនោះទេ។

ទិន្នន័យរបស់មូលនិធិរូបិយវត្ថុអន្តរជាតិ ក៏បានបង្ហាញដែរថា ចំណែកប្រាក់ដុល្លារអាម៉េរិកនៅក្នុងទុនបម្រុងអន្តរជាតិរបស់ពិភពលោកកបានធ្លាក់ចុះដល់កម្រិតទាបបំផុតចាប់តាំងពីឆ្នាំ១៩៩៥។ ទោះជាយ៉ាងណា ការធ្លាក់ចុះនេះមួយផ្នែកធំក៏បណ្តាលមកពីការប្រែប្រួលតម្លៃប្រាក់ដុល្លារ គឺមិនមែនដោយសារប្រទេសនានាលក់ប្រាក់ដុល្លារ ដែលខ្លួនកាន់កាប់ទាំងស្រុងនោះទេ៕

ដោយ: តែម សុខុម