ស្របពេលដែលប្រទេសជាច្រើនលើពិភពលោកបើកទ្វារប្រទេសឡើងវិញ និងប្រកាសរៀនរស់ជាមួយកូវីដ១៩នោះ ប្រទេសចិន មានគោលជំហរផ្ទុយពីនេះ ពោលគឺ ចិនមិនត្រឹមតែមិនជ្រើសយកការរស់ជាមួយកូវីដ១៩នោះទេ ប៉ុន្ដែ ចិនថែមទាំងបានអនុវត្តនូវគោលនយោបាយគ្មានកូវីដ១៩ថែមទៀតផង ពោលគឺ ចិននៅតែបន្ដវិធានការរឹតត្បឹតតឹងរឹងមែនទែន ដើម្បីទប់ស្កាត់ការឆ្លងរីករាលដាលនៃមេរោគកូវីដ១៩ និងមានគោលដៅឈានទៅកាត់ផ្ដាច់ឬសគល់នៃការឆ្លងរីករាលដាលផងដែរ។ ក៏ប៉ុន្ដែ នៅមួយរយៈចុងក្រោយ ការឆ្លងរីករាលដាលនៅក្នុងប្រទេស នៅតែមានរកឃើញជាហូរហែដដែល បើទោះបីមានវិធានការតឹងរឹងយ៉ាងណាក្ដី ហើយនៅថ្ងៃចន្ទដើមសប្ដាហ៍នេះទៀតសោត ចិនដីគោក ទើបតែបានរកឃើញករណីវិជ្ជមានកូវីដ១៩បំប្លែងថ្មី អូមីក្រុង ថែមទៀតផង។
បុគ្គល ដែលត្រូវបានរកឃើញវិជ្ជមានកូវីដ១៩អូមីក្រុងលើកដំបូងនៅចិនដីគោកនេះ គឺជាអ្នកដំណើរ ដែលបានធ្វើដំណើរមកពីក្រៅប្រទេស ប៉ុន្ដែ រូបគេមិនមានរោគសញ្ញាអ្វីនោះទេ។ នេះបើតាមការអះអាងរបស់ គណៈកម្មការសុខាភិបាលក្នុងស្រុករបស់ខេត្តតៃចៀនប្រទេសចិន។ បច្ចុប្បន្ន អ្នកជំងឺរូបនោះ កំពុងសម្រាកព្យាបាលដាច់ដោយឡែក នៅមន្ទីរពេទ្យ។
អត្ថបទគួរអាន
ប្រទេសចិន បច្ចុប្បន្នមានករណីឆ្លងប្រចាំថ្ងៃ ក្នុងអត្រាតួលេខ២ខ្ទង់ ដោយនៅថ្ងៃចន្ទដើមសប្ដាហ៍មុននេះ ចិនរកឃើញអ្នកឆ្លងកូវីដ១៩ក្នុងសហគមន៍ចំនួន ៥១នាក់ និងករណីនាំចូលពីក្រៅប្រទេស ២៥នាក់ និងមិនមានអ្នកស្លាប់ថ្មីនោះទេ។ សរុបចំនួនអ្នកឆ្លងកូវីដ១៩ នៅក្នុងប្រទេសចិនគិតមកទល់ពេលនេះ មានជិត១០ម៉ឺននាក់ និងអ្នកស្លាប់សរុបមានជាង៤ពាន់៦រយនាក់។
គួរបញ្ជាក់ថា មេរោគបំប្លែងថ្មី អូមីក្រុង ត្រូវបានអង្គការសុខភាពពិភពលោកអះអាងថា គឺមានសមត្ថភាពចម្លងខ្ពស់ ប៉ុន្ដែមិនបង្កឲ្យមានស្ថានភាពឈឺធ្ងន់ធ្ងរនោះទេ ហើយគិតមកទល់ពេលនេះ មានជាង៦០ប្រទេសហើយដែលបានរកឃើញករណីឆ្លងកូវីដ១៩បំប្លែងថ្មី អូមីក្រុងនេះ។
ជាមួយគ្នានេះដែរ កាលពីថ្ងៃចន្ទដើមប្ដាហ៍នេះ ចក្រភពអង់គ្លេស ទើបតែបានរាយការណ៍ថា មានករណីស្លាប់លើកដំបូង ដោយសារតែមេរោគបំប្លែងថ្មីអូមីក្រុងនេះ ផងដែរ។
នៅសហរដ្ឋអាមេរិកវិញ ថ្មីៗនេះ ក៏ត្រូវបានគេរាយការណ៍ថា កំពុងមានករណីឆ្លងអូមីក្រុងកើនឡើង ដោយនៅក្នុងចំណោមអ្នកឆ្លងមេរោគបំប្លែងថ្មីអូមីក្រុងទាំងនោះ ភាគច្រើន គឺជាអ្នកដែលបានចាក់វ៉ាក់សាំងបានគ្រប់ចំនួនដូស ហើយសូម្បីតែអ្នកចាក់ដូសទី៣ហើយក៏ដោយ ក៏នៅមានរកឃើញឆ្លងដែរ។ គិតមកទល់ពេលនេះ មានជាង២០រដ្ឋហើយនៅអាមេរិក ដែលត្រូវបានអូមីក្រុងចូលលុកលុយ។
យ៉ាងណាក៏ដោយចុះ អ្នកជំនាញផ្នែកសុខាភិបាលបានអះអាងថា ការចាក់វ៉ាក់សាំងឲ្យបានគ្រប់ចំនួនដូស និងការចាក់ដូសជំរុញ គឺនៅតែជាមធ្យោយបាយដ៏ប្រសើរ សម្រាប់ការពារការឆ្លងមេរោគបំប្លែងថ្មី និងកុំឲ្យធ្លាក់ខ្លួនឈឺធ្ងន់ធ្ងរ ហើយអ្នកជំនាញក៏ជំរុញឲ្យរដ្ឋាភិបាលប្រទេសទាំងអស់ ត្រូវពន្លឿនការចាក់ឲ្យបានលឿនតាមដែលអាចធ្វើទៅបានផងដែរ៕
None
