អ្នកជំនាញក្នុងវិស័យដឹកជញ្ជូនជឿជាក់ថា ក្រោយច្រកព្រំដែននេះបើកដំណើរការ វានឹងជួយកាត់ការកកស្ទះ និងធ្វើឲ្យការដឹកជញ្ជូនទំនិញរវាងប្រទេសទាំងពីរឲ្យកាន់តែមានភាពល្អប្រសើរមួយកម្រិត។
អ្នកនាំពាក្យក្រសួងសាធារណការ និងដឹកជញ្ជូន បានប្រាប់សារព័ត៌មាន ខេមបូណូមីស ថា ប្រសិនបើស្ថានភាពនៃការឆ្លងជំងឺកូវីដ-១៩ នៅតាមព្រំដែនកម្ពុជា-ថៃមានភាពធូរស្បើយ ភាគីទាំងពីរនឹងបើកឲ្យដំណើរការបណ្តោះអាសន្នច្រកព្រំដែនអន្តរជាតិស្ទឹងបត់-បាណងអៀន ដែលប្រសព្វគ្នារវាងខេត្តបន្ទាយមានជ័យនិងខេត្តស្រះកែវរបស់ថៃក្នុងពេលឆាប់ខាងមុខនេះ។ ប៉ុន្តែមកទល់ពេលនេះភាគីទាំងពីរមិនទាន់បានកំណត់ពេលវេលាជាក់លាក់ណាមួយក្នុងការបើកច្រកព្រំដែននេះនៅឡើយទេ។
ឯកឧត្តម វ៉ាស៊ឹម សុរិយ៉ា បានបន្ថែមថា តាមគម្រោងច្រកព្រំដែនអន្តរជាតិថ្មីនេះគ្រោងបើកឲ្យដំណើរការបណ្តោះអាសន្នតាំងពីខែកក្កដា ឆ្នាំ២០២១ មកម្ល៉េះ តែត្រូវបានពន្យាពេលដោយសារការរាតត្បាតនៃជំងឺកូវីដ-១៩។
ជាមួយគ្នានេះឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជារំពឹងថា ក្រោយច្រកព្រំដែនអន្តរជាតិស្ទឹងបត់-បាណងអៀនដាក់ឲ្យដំណើរការបណ្តោះអាសន្ន វានឹងជួយសម្រួលឲ្យការដឹកជញ្ជូនទំនិញចេញចូលរវាងប្រទេសទាំងពីរឲ្យកាន់តែមានភាពល្អប្រសើរមួយកម្រិតទៀត។ ជាពិសេស ជួយកាត់បន្ថយការកកស្ទះការធ្វើដំណើរ និងដឹកជញ្ជូនទំនិញនៅតាមច្រកព្រំដែនអន្តរជាតិប៉ោយប៉ែត ដែលមានសភាពតូច និងមមាញឹកជាមួយការធ្វើពាណិជ្ជកម្ម។
អត្ថបទទាក់ទង
ពាក់ព័ន្ធការធ្វើពាណិជ្ជកម្ម និងដឹកជញ្ជូនទំនិញទ្វេភាគីកម្ពុជាថៃ ឧកញ៉ា ស៊ិន ចន្ធី បានបញ្ជាក់ប្រាក់សារព័ត៌មានខេមបូណូមីសថា បច្ចុប្បន្នការដឹកជញ្ជូន និងដោះដូរទំនិញរវាងប្រទេសទាំងពីរហាក់មានភាពល្អប្រសើរឡើងវិញមួយកម្រិតទៀតហើយ។ អ្នកជំនាញរូបនេះអះអាងថា បញ្ហាទឹកជំនន់នៅប្រទេសថៃ ជាពិសេសនៅព្រំដែនខេត្តបន្ទាយមានជ័យមិនបានបង្កការរំខាន ឬរាំងស្ទះដល់ការដឹកជញ្ជូនទំនិញរវាងប្រទេសទាំងពីរនោះទេ។
ឯកឧត្តម វ៉ាស៊ឹម សុរិយ៉ា បានគូសបញ្ជាក់ថា ច្រកព្រំដែនថ្មីស្ទឹងបត់-បាណងអៀននេះមានច្រកទ្វារធំ និងទីធ្លារធំទូលាយជាងច្រកអន្តរជាតិប៉ោយប៉ែតដែលអាចបង្កលក្ខណៈងាយស្រួលដល់ការដឹកជញ្ជូនទំនិញចេញចូលរវាងប្រទេសទាំងពីរកម្ពុជា-ថៃ។ ឯកឧត្តមបានបន្ថែមថា ច្រកព្រំដែនថ្មីនេះ ជាជំនួយឥណទានរបស់ភាគីថៃ៕
