រាជរដ្ឋាភិបាលគ្រោងពិចារណាបង្កើតឱ្យមានច្បាប់កំណត់ចំនួនទិញអចលនទ្រព្យរបស់អតិថិជន

ឯកឧត្តម ជូ វណ្ណៈ អគ្គនាយកនិយ័តករអាជីវកម្មអចលនវត្ថុ និងបញ្ចាំ បានបញ្ចាក់ប្រាប់ខេមបូណូមីសថា និយ័តករអាជីវកម្មអចលនវត្ថុ កំពុងតាមដាន និងសម្របសម្រួលដោះស្រាយបញ្ហាវិវាទរវាងប្រជាពលរដ្ឋជាមួយក្រុមហ៊ុនបុរីពិភពថ្មី ដែលមានការខ្វែងគំនិតគ្នាលើលក្ខខណ្ឌមួយចំនួននៃកិច្ចសន្យាទិញលក់រវាងភាគីទាំងពីរ។ បើតាមថ្នាក់ដឹកនាំរូបនេះ ទាំងនិយ័តករអាជីវកម្មអចលនវត្ថុ និងសាលារាជធានីភ្នំពេញ គ្រាន់តែជាអ្នកជួយសប្របសម្រួលក្នុងការដោះស្រាយបញ្ហា ហើយពុំមានសិទ្ធិសម្រេចឱ្យភាគីនេះ ឬភាគីនោះឈ្នះ ឬចាញ់នោះទេ ពោលគឺការសម្រេចយ៉ាងណា គឺអាស្រ័យលើភាគីវិវាទទាំងពីរ។ ក្រោយផ្ទុះការតវ៉ានៅប៉ុន្មានថ្ងៃកន្លងមកនេះ ក្រុមហ៊ុនបុរីពិភពថ្មី បានសម្រេចទទួលទិញផ្ទះពីអតិថិជនត្រឡប់មកវិញក្នុងតម្លៃ៥០% នៃតម្លៃផ្ទះដែលបានព្រមព្រៀងគ្នាកន្លងមក។ ប៉ុន្តែក្រុមហ៊ុនមិនទទួលទិញផ្ទះពីបុគ្គលណាដែលមានផ្ទះចាប់ពី២ល្វែងនោះទេ។

យ៉ាងណាមិញឯកឧត្តម ជូ វណ្ណៈ បានចាត់ទុកករណីវិវាទរវាងអតិថិជនជាមួយក្រុមហ៊ុនបុរីពិភពថ្មី គឺជាបទពិសោធន៍ និងជាធាតុចូលមួយសម្រាប់ក្រសួងស្ថាប័នពាក់ព័ន្ធក្នុងការពិចារណារៀបចំឱ្យមានការកំណត់ជាគោលនយោបាយនាពេលខាងមុខ ដើម្បីបង្កភាពងាយស្រួលក្នុងការគ្រប់គ្រងទៅថ្ងៃអនាគត។

ជុំវិញបញ្ហានេះ លោកស្រី អាន សុសុធីតា នាយិកាគ្រប់គ្រងក្រុមហ៊ុនអចលនទ្រព្យ PropNex យល់ឃើញថា ការបង្ការបញ្ហារវាងអ្នកទិញផ្ទះ និងអ្នកលក់ផ្ទះ គឺអាស្រ័យទៅលើកត្តាផ្លូវច្បាប់។ សម្រាប់អ្នកជំនាញរូបនេះ ការទិញលក់បែបណាក៏ដោយ ត្រូវតែមានកិច្ចសន្យាច្បាស់លាស់ ដើម្បីទុកការពារខ្លួន ប៉ុន្តែទន្ទឹមគ្នានេះកិច្ចសន្យាទៀតសោត គឺត្រូវតែមានអព្យាក្រឹតភាព និងមិនលម្អៀងទៅភាគីណាមួយនោះទេ។

គួរកត់សម្គាល់ថា បច្ចុប្បន្នវិស័យអចលនទ្រព្យកម្ពុជា ដែលបានរងផលប៉ះពាល់យ៉ាងដំណំដោយសារវិបត្តិកូវីដ-១៩ មិនទាន់មានភាពល្អប្រសើរឡើងវិញគួរឱ្យកត់សម្គាល់នោះទេ បើទោះវិបត្តិកូវីដ-១៩ មានភាពធូរស្បើយឡើងវិញក៏ដោយ។ ចរន្តទិញលក់ក្នុងវិស័យអចលនទ្រព្យនៅកម្ពុជាហាក់បន្តស្ងប់ស្ងាត់ តែតម្លៃអចលនទ្រព្យមិនមានការប្រែប្រួលខ្លាំងនោះទេ។ ការធ្លាក់ចុះចរន្តទិញលក់អចលនទ្រព្យនៅកម្ពុជា ត្រូវបានអ្នកជំនាញក្នុងវិស័យនេះ វាយតម្លៃថា គឺបណ្តាលមកពីបញ្ហាសង្គ្រាម ភាពតានតឹងភូមិសាស្ត្រ​នយោបាយសកល ជម្លោះពាណិជ្ជកម្មរវាងប្រទេសមហាអំណាចធំៗ និងការធ្លាក់ចុះសេដ្ឋកិច្ចរបស់ចិនជាដើម៕

អត្ថបទ៖ បូ ដូឡា