អ្នកនាំពាក្យក្រសួងការពារជាតិរុស្ស៊ីបានអះអាងប្រាប់ប្រព័ន្ធផ្សព្វផ្សាយរដ្ឋរបស់រុស្ស៊ីថា កងទ័ពខ្លួនបានគ្រប់គ្រងទាំងស្រុងទៅលើទីក្រុង Kherson របស់អ៊ុយក្រែនហើយ។ យ៉ាងណាក៏ដោយ ហេដ្ឋារចនាសម្ព័ន្ធ និងការដឹកជញ្ជូនក្នុងទីក្រុងពុំមានការខូចខាតទេ ពោលគឺនៅដំណើរការជាធម្មតា។ ការវាយកាន់កាប់បានទីក្រុងខាងលើនេះ បានកើតឡើងបន្ទាប់ពីការប្រយុទ្ធគ្នាយ៉ាងខ្លាំងខ្លា អស់រយៈពេលជាច្រើនថ្ងៃមកហើយ និងមានទាំងការបាញ់ផ្លោងផងដែរ។ អភិបាលក្រុងខឺសុន បានបង្ហោះសារលើបណ្ដាញសង្គម Facebook ដោយព្រមានថា ទីក្រុងនេះកំពុងរងការវាយប្រហារហើយ។
Kherson គឺជាក្រុងកំពង់ផែដ៏សំខាន់មួយនៅជាប់នឹងសមុទ្រខ្មៅ និងជាកន្លែងឧស្សាហកម្មសាងសង់កប៉ាល់ដ៏សំខាន់មួយរបស់អ៊ុយក្រែនផងដែរ។
ស្របពេលដែលសង្គ្រាមវាយប្រហារកាន់តែខ្លាំង ការចរចាក៏នៅតែបន្ដបើកទ្វារសម្រាប់ភាគីរុស្ស៊ី និង អ៊ុយក្រែន។ បើតាមប្រភពព័ត៌មានពីសារព័ត៌មានរុស្ស៊ី RT កាចរចាលើកទី២ ត្រូវបានរំពឹងថានឹងធ្វើឡើងនៅពេលឆាប់ៗដ៏ខ្លីខាងមុខនេះ។
ដោយឡែក រុស្ស៊ីបានព្រមានទៅកាន់ពលរដ្ឋដែលរស់នៅក្នុងទីក្រុងកៀវ ឲ្យភៀសខ្លួនចេញជាបន្ទាន់ ខណៈដែលខ្លួនកំពុងវាយប្រហារលើគោលដៅនានាក្នុងរដ្ឋធានីមួយនេះ។ មិនយូរប៉ុន្មានក្រោយការព្រមាននេះ គ្រាប់រ៉ុកកែតរបស់រុស្ស៊ីចាប់ផ្តើមបាញ់ស្រោចចូលមកក្នុងរដ្ឋធានីកៀវ ទៅលើគោលដៅជាច្រើនពាសពេញទីក្រុង។ ក្នុងនោះ បង្គោលអង់តែនដែលបម្រើឲ្យការទាក់ទងគ្នាសំខាន់មួយរបស់អ៊ុយក្រែន ត្រូវបានបាញ់កំទេចចោលផងដែរ។
អត្ថបទទាក់ទង
ទន្ទឹមនឹងនេះ គ្រាប់បែកចង្កោមជាច្រើនគ្រាប់ផ្សេងទៀត ត្រូវបានបាញ់ទៅលើទីក្រុង ខាគីវ(Kharkiv) ដែលជាក្រុងធំទីពីរ របស់អ៊ុយក្រែន។ អ្នកជំនាញផ្នែកគ្រាប់បែកបានធ្វើការអះអាងថា រុស្ស៊ីពិតជាបានប្រើប្រាស់គ្រាប់បែកចង្កោម ដែលជាប្រភេទអាវុធត្រូវបានហាមឃាត់ពិតមែន។ ឯកអគ្គរដ្ឋទូតអ៊ុយក្រែនប្រចាំនៅសហរដ្ឋអាមេរិក ក៏បានចោទប្រកាន់រុស្ស៊ីថា បានវាយប្រហារជនជាតិអ៊ុយក្រែនដោយគ្រាប់បែកចង្កោម ដែលជាអាវុធ ត្រូវបានថ្កោលទោសដោយអង្គការអន្តរជាតិផ្សេងៗគ្នាជាច្រើន។
នៅពេលដែលត្រូវបានសួរអំពីការចោទប្រកាន់ថា រុស្ស៊ីកំពុងប្រើប្រាស់គ្រាប់បែកចង្កោមមែនទេ អ្នកនាំពាក្យវិមានក្រឹមឡាំង លោក Dmitry Peskov បាននិយាយថា វាជាព័ត៌មានមិនពិតទេ វាមិនច្បាស់ណាស់។ លោកបានបន្តថា ប្រតិបត្តិការរបស់រុស្ស៊ី គឺផ្តោតលើគោលដៅយោធា មិនមែនជនស៊ីវិលនោះទេ។
គួរជម្រាបថា ក្រុងខាគីវ គឺជាគោលដៅនៃការវាយប្រហារតាមអាកាសដ៏សំខាន់មួយពីរុស្ស៊ី ចាប់តាំងពីអ៊ុយក្រែនត្រូវបានឈ្លានពានដោយកងកម្លាំងរុស្ស៊ីកាលពីថ្ងៃទី២៤ខែកុម្ភៈ។
សូមជម្រាបថា ប្រធានាធិបតី អ៊ុយក្រែននៅថ្ងៃពុធទី០២នេះ បានចេញមកអំពាវនាវរកការគាំទ្របន្ថែមទៀត ក្រោយពីរុស្ស៊ីបានបង្កើនការវាយប្រហារកាន់តែខ្លាំងឡើងៗ។ ប៉ុន្តែលោកបានអះអាងថា រហូតមកដល់ពេលនេះអ៊ុយក្រែននៅតែ ប្រឈមមុខនឹងការវាយលុករបស់ទីក្រុងម៉ូស្គូតែម្នាក់ឯង។
បើតាមរបាយការណ៍របស់អង្គការសហប្រជាជាតិ មនុស្សយ៉ាងហោច ១៣៦នាក់ រួមទាំងកុមារ១៣នាក់ ត្រូវបានសម្លាប់ ចាប់តាំងពី ប្រទេសរុស្ស៊ីបើការឈ្លានពាន ហើយជនស៊ីវិល ៤០០នាក់ផ្សេងទៀតបានរងរបួសផងដែរ ខណៈតួលេខនេះអាចនឹងមានច្រើនជាងនេះទៀត៕
None
