មូលនិធិសម្រាប់អាជីវកម្មឌីជីថល (SADIF) ត្រូវបានបង្កើតឡើងដោយក្រុមហ៊ុនទូរស័ព្ទចល័ត Smart សហការជាមួយក្រុមហ៊ុនធានារ៉ាប់រង Forte និង Mekong Strategic Partner ដើម្បីផ្តល់មូលនិធិដល់សហគ្រិនដែលមានឆន្ទៈច្បាស់លាស់ និងផ្តល់មូលនិធិចាំបាច់សម្រាប់គាំទ្រដល់ឧស្សាហកម្ម ICT ដែលកំពុងរីកលូតលាស់នៅកម្ពុជាយ៉ាងឆាប់រហ័ស។
លោក ថូម៉ាស ហ៊ុន (Thomas Hundt) នាយកប្រតិបត្តិក្រុមហ៊ុន Smart បានថ្លែងក្នុងពិធីប្រកាសនេះថា បន្ទាប់ពីចំណាយពេលជាច្រើនខែ ដើម្បីត្រួតពិនិត្យឲ្យបានល្អិតល្អន់លើបេក្ខជននានា ដែលមានការសហការជាមួយក្រុមហ៊ុនធានារ៉ាប់រង Forte មូលនិធិ SADIF មានក្តីសោមនស្សរីករាយក្នុងការបង្ហាញក្រុមហ៊ុន៣ គឺក្រុមហ៊ុន «ជូនអ្នក» «មរកត» និងក្រុមហ៊ុន Aniwaa ជាក្រុមហ៊ុនដំបូងគេដែលទទួលបានទុនជាទឹកប្រាក់វិនិយោគពីមូលនិធិ SADIF។
លោកបញ្ជាក់ថា៖ «ក្រុមហ៊ុន Smart ដើរតួនាទីស្នូលក្នុងការផ្លាស់ប្តូរវិស័យឌីជីថលនៅកម្ពុជាឲ្យកាន់តែប្រសើរបំផុត។ យើងរង់ចាំធ្វើការជាមួយនឹងក្រុមហ៊ុនថ្មីៗទាំងនេះ ដើម្បីអភិវឌ្ឍ និងជំរុញអាជីវកម្មបែបឌីជីថល របស់ពួកគេ។ ខ្ញុំកំពុងរង់ចាំចង់ឃើញការវិនិយោគទាំងនេះលេចចេញជារូបរាង»។
ក្រុមហ៊ុនដឹកជញ្ជូន Joonnak ស្ថិតក្នុងចំណោមក្រុមហ៊ុន ៣ ដែលបានទទួលមូលនិធិវិយោគ ៥លានដុល្លារ។
តើអ្នកបានអានអត្ថបទនេះ ឬនៅ?
ដូចគ្នាដែរ លោក Charles Cheo នាយកប្រតិបត្តិក្រុមហ៊ុន Forte បានមានប្រសាសន៍ថា លោកមានជំនឿចិត្តថា សេដ្ឋកិច្ចបែបឌីជីថលរបស់កម្ពុជា នឹងមានការលូតលាស់នៅប៉ុន្មានឆ្នាំខាងមុខនេះ។
លោកបញ្ជាក់យ៉ាងដូច្នេះ ថា៖ «យើងមានចិត្តសប្បាយក្នុងការគាំទ្រកំណើននេះ តាមរយៈការចូលរួមសហការជាដៃគូជាមួយនឹងក្រុមហ៊ុនទាំងអស់ខាងលើ ដែលយើងខ្ញុំទាំងអស់គ្នានឹងខិតខំប្រឹងប្រែងបន្ថែមដោយនាំនូវមាតិកាថ្មីៗដែលទំនើបទាន់សម័យ និងកម្មវិធីឌីជីថលផ្សេងៗ»។
ការផ្តល់មូលនិធិដល់សហគ្រិនវ័យក្មេងទាំងនេះ នឹងជួយពួកគេឲ្យទទួលបានឱកាសពង្រីកនិងពង្រឹងអាជីវកម្មរបស់ខ្លួនទាំងនៅក្នុងស្រុក និងពង្រីកទៅកាន់តំបន់ និងពិភពលោក ដែលជាការរួមចំណែកយ៉ាងសំខាន់ក្នុងការជំរុញអាជីវកម្មបែបឌីជីថល ដែលកំពុងពេញនិយមក្នុងសកម្មភាពសេដ្ឋកិច្ចសាកល។
លោក ចាយ គង់ នាយកប្រតិបត្តិក្រុមហ៊ុន Joonaak Delivery Co., Ldt ដែលជាក្រុមហ៊ុនពាណិជ្ជកម្មអេឡិចត្រូនិក ដោយផ្តល់សេវាកម្មដឹកជញ្ជូន និងភស្តុភារដល់បណ្តាក្រុមហ៊ុនសហគ្រាស បានថ្លែងថា តម្លៃនៃការវិនិយោគចេញពីភាពជាដៃគូនេះ ដែលបានពីក្រុមហ៊ុនដែលមានភាពច្នៃប្រឌិត និងមានចក្ខុវិស័យច្បាស់លាស់ បើទោះបីមូលនិធិមានសារសំខាន់ធំធេងក៏ដោយចុះ តែមិនមែនកំណត់ត្រឹមតែការផ្តល់មូលនិធិនោះឡើយ។
លោកអះអាងយ៉ាងដូច្នេះថា៖ «យើងមានសេចក្តីរំភើបក្នុងការចាប់ផ្តើមធ្វើការជាមួយនឹងក្រុមហ៊ុន Smart ក្រុមហ៊ុន Forte និងក្រុមហ៊ុន MSP ដើម្បីជួយអភិវឌ្ឍអាជីវកម្មរបស់យើង នៅត្រង់ចំណុចដែលយើងមិនអាចធ្វើបានដោយខ្លួនឯង»។
ក្រុមហ៊ុន Morako Technology ស្ថិតក្នុងចំណោមក្រុមហ៊ុន ៣ ដែលបានទទួលមូលនិធិវិយោគ ៥លានដុល្លារ។
តើអ្នកបានអានអត្ថបទនេះឬនៅ?
មិនឆ្ងាយពីគ្នាប៉ុន្មានឡើយ លោក ឃួន សុភ័ត នាយកប្រតិបត្តិក្រុមហ៊ុន Morakot Technology ដែលមានជំនាញផ្តល់ដំណោះស្រាយដល់មីក្រូហិរញ្ញវត្ថុ និងធនាគារ លើកម្មវិធី Software ដែលមានសុវត្ថិភាព ជឿទុកចិត្ត និងកែសម្រួលបាន បានអះអាងថា មូលនិធិ SADIF នេះ នឹងជួយឲ្យក្រុមហ៊ុនរបស់លោក អាចពង្រីកខ្លួនក្នុងការស្វែងរកទីផ្សារថ្មីនៅក្នុងតំបន់អាស៊ាន ដែលស្ថាប័នផ្តល់ប្រាក់កម្ចីទាំងនោះ នឹងកំពុងប្រឈមបញ្ហាស្រដៀងគ្នានឹងគ្រឹះស្ថានមីក្រូហិរញ្ញវត្ថុនៅកម្ពុជាដែរ។
លោកថ្លែងយ៉ាងដូច្នេះថា៖ «ក្រោយពីបានធ្វើការងារលើវិស័យហិរញ្ញវត្ថុ ខ្ញុំកត់សម្គាល់ឃើញថា ប្រតិបត្តិការមានការរាំងស្ទះដោយសារតែកង្វះកម្មវិធីដែលសមស្រប និងមានតម្លៃសមរម្យ ដើម្បីទៅប្រើក្នុងការជួយគាំទ្រដល់មន្រ្តីឥណទាន និងប្រតិបត្តិការផ្នែកខាងក្នុង»។
ដូចគ្នាដែរ លោក Martin Ianasard នាយកប្រតិបត្តិក្រុមហ៊ុន Aniwaa ដែលជាគេហទំព័រប្រៀបធៀបម៉ាស៊ីន 3D ដែលធ្វើការងារយ៉ាងជិតស្និទ្ធជាមួយរោងចក្រដោយផ្តល់ការត្រួតពិនិត្យវាយតម្លៃស៊ីជម្រៅលើ Hardware ម៉ាស៊ីនបោះពុម្ព 3D បានថ្លែងថា៖ «ជាមួយនឹងការបញ្ចូលទុនបន្ថែម ក៏ដូចជាបណ្តាញ និងចំណេះដឹងពី SADIF យើងក៏នឹងខិតខំប្រឹងប្រែងពង្រឹងសមត្ថភាពខ្លួនឲ្យកាន់តែមានភាពប្រសើរបំផុត។ យើងនឹងនាំមកនូវព័ត៌មានទាក់ទងទៅនឹងបច្ចេកវិទ្យាផ្នែករឹង (Hardware) ដែលទំនើបទាន់សម័យបំផុតសម្រាប់អ្នកចាប់អារម្មណ៍លើការវិវត្តបច្ចេកវិទ្យាថ្មីៗចុងក្រោយ»៕
