សំណើរបស់ក្រុមហ៊ុន ByteDance នេះត្រូវបានផ្ញើតាមអ៊ីមែលទៅកាន់ម្ចាស់ភាគហ៊ុន និងត្រូវបានយកមកចុះផ្សាយដោយសារព័ត៌មានជប៉ុន Nikkei។ ការប្រមូលទិញយកភាគហ៊ុននេះ នឹងអនុញ្ញាតឱ្យម្ចាស់ភាគហ៊ុនមួយចំនួនរបស់ក្រុមហ៊ុននេះ មានឱកាសដកប្រាក់ចេញពីក្រុមហ៊ុននេះ បន្ទាប់ពីបានពន្យារពេលលើការស្នើសុំបោះផ្សាយលក់មូលបត្រជាសាធារណៈលើកដំបូងរបស់ខ្លួន។
ប្រភពដែលដឹងពីបញ្ហានេះបាននិយាយថា ភាគហ៊ុនរបស់ម្ចាស់ហ៊ុនភាគច្រើនត្រូវបានបិទរយៈពេលជាច្រើនឆ្នាំមកហើយ ហើយវាជាការល្អដែលផ្តល់ឱ្យពួកគេនូវសាច់ប្រាក់មួយចំនួន ខណៈដែលបច្ចុប្បន្នក្រុមហ៊ុននេះមិនមានផែនការក្នុងការចុះបញ្ជីបោះផ្សាយលក់មូលបត្រនោះទេ។
តម្លៃដែលក្រុមហ៊ុន ByteDance នឹងទិញពីម្ចាស់ភាគហ៊ុនរបស់ពួកគេនោះ គឺក្នុងមួយហ៊ុនរហូតដល់ ១៧៧ ដុល្លារ ហើយផែនការប្រមូលទិញភាគហ៊ុននេះនឹងចាប់អនុវត្តនៅក្នុងរយៈពេល ២ ទៅ ៣ ខែទៀតនេះ។
អត្ថបទគួរអាន
ក្រុមហ៊ុនដែលបានបង្កើតឡើងនៅទីក្រុងប៉េកាំងកាលពី១០ឆ្នាំមុននេះ បានក្លាយជាក្រុមហ៊ុនឯកជនមួយស្ថិតក្នុងចំណោមក្រុមហ៊ុនដ៏មានតម្លៃបំផុតនៅក្នុងពិភពលោក បើទោះជា កំពុងស្ថិតក្នុងចំណុចកណ្ដាលនៃសមរភូមិជម្លោះបច្ចេកវិទ្យារវាងសហរដ្ឋអាមេរិក និងប្រទេសចិនក៏ដោយ។ កម្មវិធីTikTok ជាប្រព័ន្ធផ្សព្វផ្សាយអន្តរជាតិដ៏ល្បីល្បាញបំផុតសម្រាប់ការចែករំលែកវីដេអូខ្លីៗនោះ ត្រូវការពារការគ្រប់គ្រងទិន្នន័យរបស់ខ្លួននៅអាមេរិក និងត្រូវបានហាមឃាត់នៅប្រទេសឥណ្ឌាផងដែរ។
ក្រុមហ៊ុន ByteDance ធ្លាប់ត្រូវគេរំពឹងយ៉ាងទូលំទូលាយថា នឹងបានក្លាយជាក្រុមហ៊ុនបញ្ចេញភាគហ៊ុនលក់ជាលើកដំបូង (IPO) ដែលរកកម្រៃបានច្រើននៅមុនពេលសហរដ្ឋអាមេរិក និងចិនបានបង្កើនជម្លោះអំពីបច្ចេកវិទ្យាក្នុងអំឡុងពេលប្រធានាធិបតីលោក Donald Trump។ ប៉ុន្ដែ ក្រោយភាពតានតឹងក្នុងជម្លោះបច្ចេកវិទ្យារវាងទីក្រុងវ៉ាស៊ិនតោន និងប៉េកាំង ផែនការបោះផ្សាយលក់មូលបត្ររបស់ក្រុមហ៊ុននេះក៏បានជាប់គាំង។ ថ្មីៗនេះដែរ ទីក្រុងប៉េកាំងបានរឹតបន្តឹងចំពោះក្រុមហ៊ុនបច្ចេកវិទ្យារបស់ចិនមួយចំនួនដោយដាក់ឱ្យពួកគេស្ថិតក្រោមការត្រួតពិនិត្យបទប្បញ្ញត្តិកាន់តែខ្លាំង និងធ្វើឱ្យខូចគម្រោងការចុះបញ្ជីផ្សេងៗទៀត ដូចជា ក្រុមហ៊ុន Ant Group របស់លោក Jack Ma ជាដើម។
សូមបញ្ជាក់ថា កាលពីឆ្នាំ២០២១ ប្រាក់ចំណូលរបស់ក្រុមហ៊ុន ByteDance បានកើនឡើងក្នុងអត្រា ៣ ខ្ទង់ ប៉ុន្តែការលក់មួយចំនួនបានកើនឡើង ៧០% ពោលគឺចំណូលសរុបរបស់ក្រុមហ៊ុននេះមាដល់ ៥៨ ពាន់លានដុល្លារ៕
អត្អបទ៖ សុខ ជា
