នាយករដ្ឋមន្ត្រីកម្ពុជា សម្តេច តេជោ ហ៊ុន សែនបានថ្លែងថា តាមរយៈការវាយតម្លៃចុងក្រោយរបស់អង្គការសហប្រជាជាតិដែលធ្វើឡើងរៀងរាល់៣ឆ្នាំម្ដង ទិន្នន័យក្នុងឆ្នាំ២០២១នេះ បង្ហាញថា ជាលើកដំបូងក្នុងប្រវត្តិសាស្ត្ររបស់កម្ពុជាហើយ ដែលកម្ពុជាមានលទ្ធភាពអាចបំពេញតាមលក្ខខណ្ឌដែលអាចចាត់ទុកថា រួចផុតពីឋានៈជាក្រុមប្រទេសមានការអភិវឌ្ឍតិចតួច។ មិនតែប៉ុណ្ណោះ កម្ពុជាក៏មានគោលដៅ នឹងប្រែក្លាយជាប្រទេសចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅត្រឹមឆ្នាំ២០៥០ផងដែរ។ នេះបើតាមសុន្ទរកថា របស់សម្តេចតេជោ នៅក្នុងឱកាសទិវាសន្និភាពអន្តរជាតិ កាលពីថ្ងៃទី២១ ខែកញ្ញាឆ្នាំ២០២១។
ជុំវិញនឹងការវាយតម្លៃរបស់អង្គការសហប្រជាជាតិនេះដែរ អ្នកជំនាញក្នុងវិស័យសេដ្ឋកិច្ចយល់ឃើញថា ប្រជាពលរដ្ឋ មន្ត្រីរាជការ និងអ្នករកស៊ីក្នុងវិស័យផ្សេងៗត្រូវអភិវឌ្ឍន៍ និងពង្រឹងសមត្ថភាពរបស់ខ្លួនបន្ថែមទៀត ព្រោះការរួចផុតពីឋានៈជាក្រុមប្រទេសមានការអភិវឌ្ឍន៍តិចតួច មានន័យថា គេវាយតម្លៃទៅចង្វាក់ផលិតកម្ម និងសេដ្ឋកិច្ចប្រទេសនោះ ដែលអាចឈរយ៉ាងរឹងមាំដោយខ្លួន ដោយមិនចាំបាច់ពឹងលើជំនួយ ឬការអនុគ្រោះផ្សេងៗពីប្រទេសដទៃ។ ហើយការវាយតម្លៃនេះ គឺពឹងផ្អែកលើកម្រិតជីវភាព និងប្រាក់ចំណូលរបស់ប្រជាពលរដ្ឋ។ នេះបើតាមការបញ្ជាក់របស់លោកបណ្ឌិត គី សិរីវឌ្ឍ អ្នកវិភាគសេដ្ឋកិច្ច និងជាប្រធានមជ្ឈមណ្ឌលសិក្សាចិន នៃរាជបណ្ឌិតសភាកម្ពុជា។
អត្ថបទគួរអាន
អ្នកជំនាញសេដ្ឋកិច្ចរូបនេះបន្ថែមថា ក្រោយពេលដែលកម្ពុជានឹងឆ្លងផុតពីឋានៈជាក្រុមប្រទេសមានការអភិវឌ្ឍន៍តិចតួច គឺការកាត់ផ្តាច់ប្រព័ន្ធអនុគ្រោះណាមួយ ដែលលែងសូវសំខាន់សម្រាប់កម្ពុជាទៀតហើយ មានន័យថា កម្ពុជាអាចមានសមត្ថភាពគ្រប់គ្រាន់ក្នុងការធ្វើពាណិជ្ជកម្មទ្វេភាគី និងជាមួយបណ្តាប្រទេសផ្សេងៗដោយស្មើមុខស្មើមាត់។ ទោះយ៉ាងណា លោកបណ្ឌិតអះអាងថា កម្ពុជាត្រូវទាមទារធ្វើយ៉ាងណាដើរឲ្យទាន់ប្រព័ន្ធបច្ចេកវិទ្យា និងស្ថានភាពបច្ចុប្បន្នរបស់ពិភពលោក។
គួរបញ្ជាក់ថា អស់រយៈពេលជាងពីរទសវត្សរ៍កន្លងមកនេះ កំណើនសេដ្ឋកិច្ចកម្ពុជាបានកើនឡើងជាមធ្យមប្រមាណ៧% ជារៀងរាល់ឆ្នាំ ប៉ុន្ដែ នៅឆ្នាំ២០២០ ក្រោយមានកូវីដ-១៩ចូលមកទន្ទ្រានសេដ្ឋកិច្ចកម្ពុជា បានដាំក្បាលចុះដល់ជាង -៣% ហើយនៅឆ្នាំ២០២១នេះ ត្រូវបានព្យាករថា នឹងរក្សាបានកំណើន១,៩% មុននឹងស្ទុះងើបឡើងដល់កំណើន ៥,៥% នៅឆ្នាំ២០២២។ នេះបើតាមការព្យាករថ្មីចុងក្រោយមួយពីធនាគារអភិវឌ្ឍន៍អាស៊ី៕
None
