កិច្ចពិភាក្សារវាងមន្ត្រីជាន់ខ្ពស់អាមេរិក និងចិននេះ ធ្វើឡើងចំពេលមានសេចក្តីរាយការណ៍មកថា រដ្ឋបាលលោកចូ បៃឌិន បានខិតជិតដល់ការសម្រេចដករនាំងពន្ធគយមួយចំនួនលើមុខទំនិញរបស់ចិន ដើម្បីទប់ទល់នឹងអតិផរណាដែលកំពុងតែកើនខ្ពស់នៅអាមេរិក ។
សេចក្តីថ្លែងការណ៍ពីក្រសួងពាណិជ្ជកម្មចិនគូសបញ្ជាក់ថា លោកលីវ ហេ ឧបនាយករដ្ឋមន្ត្រីចិន បាននិយាយទៅកាន់លោកស្រី Yellen រដ្ឋមន្ត្រីក្រសួងហិរញ្ញវត្ថុអាមេរិកថា ការដករនាំងពន្ធ និងការដកទណ្ឌកម្ម និងការអនុវត្តពាណិជ្ជកម្មដោយយុត្តិធម៌សម្រាប់សហគ្រាសចិន គឺជាផ្នែកមួយសំខាន់ខ្លាំងណាស់ ដែលរដ្ឋាភិបាលទីក្រុងប៉េកាំងយកចិត្តទុកដាក់ នៅក្នុងការស្ដារទំនាក់ទំនងទំនងរវាងប្រទេសយក្សសេដ្ឋកិច្ចទាំងពីរ។
ក្នុងអំឡុងពេលនៃជំនួបពិភាក្សានោះដែរ លោកស្រី Yellen ក៏បានលើកឡើងពីការព្រួយបារម្ភអំពីអ្វីដែលសហរដ្ឋអាមេរិកហៅថា ការអនុវត្តសេដ្ឋកិច្ច "អយុត្តិធម៌ និងមិនមែនទីផ្សារ" របស់ប្រទេសចិនផងដែរ។ ប៉ុន្ដែ លោកស្រីបានចាត់ទុកការសន្ទនាជាមួយលោក លីវ ហេនេះ ថាជាការសន្ទនាមួយបង្ហាញពីភាពស្មោះត្រង់ និងមានសារៈសំខាន់ណាស់ ។
អត្ថបទគួរអាន
សេចក្តីថ្លែងការណ៍ដដែលបន្តទៀតថា ក្រៅតែបញ្ហាពន្ធគយ និងពាណិជ្ជកម្ម ភាគីទាំងពីរក៏បានពិភាក្សាអំពីគោលនយោបាយសេដ្ឋកិច្ច និងស្ថិរភាពខ្សែចង្វាក់ផ្គត់ផ្គង់សកល ហើយព្រមទាំងបានយល់ស្របគ្នាថា វាមានសារសំខាន់សម្រាប់សហរដ្ឋអាមេរិក និងចិន ក្នុងការពង្រឹងទំនាក់ទំនង និងកិច្ចសហការ ដើម្បីសម្របសម្រួលដល់បញ្ហាដែលកំពុងកើតមាននៅក្នុងតំបន់ និងដើម្បីផលប្រយោជន៍នៃប្រទេសទាំងពីរ ក៏ដូចជាពិភពលោកទាំងមូល។ ដោយឡែកបើតាមការចុះផ្សាយរបស់ Bloomberg កិច្ចពិភាក្សានេះមិនមានការតឹងសសៃក ឬសាចទឹកដាក់គ្នានោះទេ តែវាមានលក្ខណៈជាក់ស្តែង និងក្នុងន័យស្ថាបនាសម្រាប់ទំនាក់ទំនងរវាងប្រទេសទាងពីរ។
គួរជម្រាបថា ជំនួបរវាងមន្ត្រីជាន់ខ្ពស់ក្រុងវ៉ាស៊ីនតោន និងប៉េកាំង បានធ្វើឡើងស្របពេលដែលកំពុងមានសេចក្តីរាយការណ៍មកថា ប្រធានាធិបតី Joe Biden អាចនឹងប្រកាសភ្លាមៗនៅក្នុងសប្តាហ៍នេះ នូវការដកពន្ធមួយចំនួនរបស់អាមេរិកលើទំនិញចិនដែលមានតម្លៃសរុបប្រមាណ ៣០០ពាន់លានដុល្លារ។ ការដកចេញវិញនូវរនាំងពន្ធមួយចំនួនលើទំនិញចិន ដែលបានដាក់តាំងតែពីរដ្ឋបាលលោក ដូណាល់ ត្រាំត្រូវបានរដ្ឋបាលលោកបៃឌិន រំពឹងថា នឹងអាចបន្ធូរបន្ថយដល់ការចំណាយលើទំនិញប្រចាំថ្ងៃរបស់ពលរដ្ឋអាមេរិកកាំង ស្របពេលដែលអតិផរណានៅសហរដ្ឋអាមេរិកបានហក់ឡើងដល់កំរិតខ្ពស់បំផុតមិនធ្លាប់មាននា៤ទសវត្សចុងក្រោយ។
នៅចុងបញ្ចប់នៃកិច្ចពិភាក្សា ភាគីទាំងពីរបានយល់ព្រមរក្សាការសន្ទនារវាងគ្នា ដើម្បីឈានទៅរកផ្លែផ្កាកាន់តែប្រសើរនាពេលខាងមុខ។
សូមបញ្ជាក់ថា បើទោះបីជាសេដ្ឋកិច្ចរបស់ប្រទេសចិនមានកំណើនយឺតដែលជាលទ្ធផលនៃការបិទខ្ទប់ដោយអន្លើៗ ដោយសារតែការរាតត្បាតកូវីដ១៩ ការនាំចេញរបស់ចិនទៅកាន់សហរដ្ឋអាមេរិកក្នុងរយៈពេល៥ខែដំបូងឆ្នាំនេះមិនបានថយចុះសោះឡើយ ពោលវាបានកើនឡើងជាង ១៥% ខណៈដែលការនាំចូលពីអាមេរិកមកចិនវិញ បានកើនឡើង ៤%។ នេះបើយោងតាមទិន្នន័យផ្លូវការពីរដ្ឋាភិបាលទីក្រុងប៉េកាំង៕
