លោក ដានីន ឆេរ៉ាវ៉ានុត ប្រធានជាន់់ខ្ពស់នៃក្រុមហ៊ុន ស៊ីភីគ្រុប ដ៏ធំរបស់ប្រទេសថៃ បាននិយាយក្នុងសប្តាហ៍នេះថា លោកកំពុងត្រៀមរៀបចំទីតាំងសម្រាប់ដាំដុះរុក្ខជាតិមួយប្រភេទឈ្មោះហ្វាតាលី យ៉ុន (fah talai jone) ដែលខ្មែរយើងស្គាល់ថា ដើមប្រមាត់មនុស្ស ដោយគម្រោងដាំដុះនេះនឹងធ្វើឡើងក្នុងផ្ទៃដីប្រមាណ១៦ហិកតា ក្នុងខេត្តសារាបុរី។
រុក្ខជាតិប្រភេទនេះ ប្រើប្រាស់សម្រាប់ជាសារធាតុផ្សំដើម្បីផលិតជាថ្នាំព្យាបាលរលាក កម្ចាត់មេរោគ និងព្យាបាលក្អក ហើយក្នុងពេលថ្មីៗនេះ ក្រសួងសុខាភិបាលថៃក៏បានអនុម័តឲ្យប្រើប្រាស់ថ្នាំដែលផ្សំឡើងពីរុក្ខជាតិ ដើមប្រមាត់មនុស្សនេ ជាថ្នាំព្យាបាលអ្នកជំងឺកូវីដ១៩ផងដែរ។
ក្រុមហ៊ុន CP របស់សេដ្ឋីថៃរូបនេះ ក៏នឹងសាងសង់រោងចក្រមួយ សម្រាប់ដំណើរការផលិតថ្នាំប្រភេទនេះ រួចលោកនឹងផ្តល់ថ្នាំដែលផលិតរួច ឲ្យសាធារណជន ព្រមទាំងរដ្ឋាភិបាលដោយមិនយកប្រាក់តែម្តង។
បើតាមការអះអាងពីក្រុមហ៊ុន ដំណើរការដាំដុះរុក្ខជាតិ និងដំណើរការផលិតចេញជាថ្នាំគ្រាប់ត្រូវប្រើពេលយ៉ាងហោចណាស់ជិត ៣ខែ មុននឹងអាចយកមកប្រើប្រាស់សម្រាប់អ្នកជំងឺកូវីដ១៩បាន។
អត្ថបទគួរអាន
គួរជម្រាបថា ប្រទេសថៃនៅសប្តាហ៍ចុងក្រោយនេះបានផុងខ្លួនកាន់តែខ្លាំងក្នុងវិបត្តិឆ្លងរាលដាលកូវីដ១៩។ ជាក់ស្តែង ថៃបានរកឃើញករណីឆ្លងថ្មីក្នុងកំណត់ត្រាច្រើនមិនធ្លាប់មាន ពោលគឺក្នុងចំនួនជាង ២ម៉ឺនករណី ខណៈករណីឆ្លងសរុបកើនជិត ៧០ម៉ឺនករណីហើយ។
ដោយអ្នកជំងឺកូវីដ១៩មានចំនួនច្រើន ជាហេតុធ្វើឲ្យប្រព័ន្ធសុខាភិបាលរបស់ថៃទប់ទល់លែងចង់បាន គួបផ្សំនឹងកង្វះខាតគ្រែ មន្ទីរពេទ្យ និងថ្នាំសង្កូវផងនោះ បានបង្ខំចិត្តឲ្យពលរដ្ឋថៃជាច្រើនជ្រើសយកការស្នាក់នៅ និងព្យាបាលនៅផ្ទះដោយខ្លួនឯង ដោយពឹងផ្អែកលើឱសថបុរាណនេះ។
គួររំឭកថា ប្រទេសថៃបានអនុញ្ញាតឲ្យប្រើប្រាស់ថ្នាំបុរាណដែលផ្សំឡើងពីដើមប្រមាត់មនុស្សនេះចាប់តាំងពីខែកក្កដាមក ក្រោយមើលឃើញពីប្រសិទ្ធិភាពរបស់វាដែលអាចព្យាបាលអ្នកជំងឺកម្រិតស្រាលបានជាសះស្បើយ ៩៩% ក្នុងចំណោមអ្នកជំងឺដែលគេសាកល្បងឲ្យប្រើប្រាស់ចំនួនជាង ១ម៉ឺន២ពាន់នាក់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
