ក្រុមហ៊ុន Toyota នឹងធ្វើការជាមួយក្រុមហ៊ុនយក្សរបស់ថៃ CP Group លើគម្រោងមួយក្នុងការបម្លែងកាកសំណល់កសិដ្ឋានទៅជាឥន្ធៈសម្រាប់រថយន្តដើរដោយថាមពលអ៊ីដ្រូហ្សែន ខណៈដែលក្រុមហ៊ុនជប៉ុនមួយនេះបានអះអាងថា រថយន្តអគ្គិសនីមិនមែនជាជម្រើសតែមួយក្នុងការលុបបំបាត់ការបញ្ចេញផ្សែងឡើយ។
គម្រោងនេះ ត្រូវបានប្រកាសកាលពីថ្ងៃទី១៤ ខែធ្នូ ឆ្នាំ២០២២ ធ្វើឡើងក្នុងពេលដែលក្រុមហ៊ុន Toyota បាននឹងកំពុងតែពង្រីកនូវវត្តមានរបស់ខ្លួនចូលក្នុងតំបន់អាស៊ីអាគ្នេយ៍ ជាកន្លែងដែលក្រុមហ៊ុនធំៗដូចជា Tesla និង BYD កំពុងទន្ទ្រានទីផ្សាររថយន្តអគ្គិសនីដែលកំពុងមានទំនោរកើនឡើង។
សូមជម្រាបថា CP គឺជាក្រុមហ៊ុនធំបំផុតមួយរបស់ប្រទេសថៃ ដោយប្រតិបត្តិការ និងចំណូលរបស់ក្រុមហ៊ុននេះ គឺរាប់ចាប់ពីឧស្សាហកម្ម ការដឹកជញ្ជូនចែកចាយ និងកសិកម្ម។
ក្រុមហ៊ុនទាំងពីរ បានបញ្ជាក់ថា ពួកគេនឹងរួមគ្នាផ្តោតលើការផលិតអ៊ីដ្រូសែន ដោយការប្រើប្រាស់ជីវឧស្ម័នពីកាកសំណល់កសិដ្ឋាន។ ឥន្ធនៈអ៊ីដ្រូសែននេះ នឹងត្រូវបំពាក់លើរថយន្តដឹកជញ្ជូនរបស់ក្រុមហ៊ុន CP ដើម្បីបង្ហាញពីការចូលរួមកាត់បន្ថយការបញ្ចេញផ្សែងពុល។
អត្ថបទគួរអាន
ក្នុងសន្និសីទកាសែតមួយ លោក Akio Toyoda នាយកប្រតិបត្តិក្រុមហ៊ុន Toyota បានលើកឡើងពីគោលការណ៍របស់ក្រុមហ៊ុនក្នុងការអភិវឌ្ឍជម្រើសប្រភេទរថយន្ត ពោលគឺបើប្រភេទទីផ្សាររថយន្តផ្សេងៗគ្នា វាក៏នឹងធ្វើឱ្យផ្លូវឆ្ពោះទៅការកាត់បន្ថយការបញ្ចេញផ្សែងនោះ ក៏ផ្សេងគ្នាផងដែរ ដោយលោកចង់សំដៅទៅលើជម្រើសឥន្ធនៈអ៊ីដ្រូសែននេះតែម្តង។ ប៉ុន្តែការលើកឡើងបែបនេះ បានទទួលការរិះគន់ពីអ្នកវិនិយោគមួយចំនួន ដែលពួកគេខិតខំអភិវឌ្ឍរថយន្តអគ្គិសនី ដើម្បីកាត់បន្ថយការប្រែប្រួលអាកាសធាតុ។
លោក Toyoda បាននិយាយថា គម្រោងនេះនឹងជួយបន្ទាបការបញ្ចេញផ្សែកាបូនឌីអុកស៊ីត ក្នុងវិស័យដឹកជញ្ជូនប្រទេសថៃ។ ទន្ទឹមនេះ លោកបានប្រឆាំងនឹងការដាក់កំហិតលើជម្រើសផ្សេងៗក្នុងការលុបបំបាត់ការបញ្ចេញផ្សែងពុល ដោយលោកបញ្ជាក់ថា រថយន្តអគ្គិសនី ជាជម្រើសសំខាន់មួយហើយ ប៉ុន្តែមិនមែនមានន័យថា វាគឺជាជម្រើសតែមួយគត់នោះទេ។
បើតាមនាយក Toyota រូបនេះ ឱ្យដឹងថា គម្រោងរបស់ថៃនេះ នឹងត្រូវយកធ្វើជាករណីធ្វើតេស្តមួយ ហើយលោករំពឹងថា វាក៏នឹងធ្វើឡើងនៅតាមបណ្តាប្រទេសផ្សេងៗទៀតដែរ។
គួរដឹងដែរថា ក្រុមហ៊ុន Toyota និង CP ក៏នឹងសិក្សាផងដែរក្នុងការធ្វើឱ្យវិស័យឡូជីស្ទីកកាន់តែមានប្រសិទ្ធភាពដោយការប្រើប្រាស់បច្ចេកវិទ្យាតភ្ជាប់គ្នា ដែលវាជាផ្នែកមួយនៃសម្ព័ន្ធភាពរវាងក្រុមហ៊ុនទាំងពីរ៕
អត្ថបទ៖ នៅ សំភី
