ប្រទេសនានានៅក្នុងកិច្ចព្រមព្រៀងពាណិជ្ជកម្ម TPP បានឯកភាពគ្នាទៅលើខ្លឹមសារសំខាន់ៗនៃកិច្ចព្រមព្រៀង ដើម្បីបោះជំហានបន្តទៅមុខ ដោយគ្មានសហរដ្ឋអាមេរិក បន្ទាប់ពីការជំទាស់ពីប្រទេសកាណាដា នៅនាទីចុងក្រោយ ដែលបានបន្ថែមភាពមន្ទិលសង្ស័យទៅលើការរស់រានមានជីវិតនៃកិច្ចព្រមព្រៀងនេះ។
កិច្ចចរចាក្ដៅគគុកជុំវិញកិច្ចព្រមព្រៀង TPP ត្រូវបានធ្វើឡើងនៅក្រៅជំនួបកំពូលសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) ដែលប្រព្រឹត្តទៅនៅតំបន់រមណីយដ្ឋាន ដាណាង ប្រទេសវៀតណាម នាចុងសប្ដាហន៍នេះ។
រដ្ឋមន្ត្រីពាណិជ្ជកម្មវៀតណាម បានប្រាប់សន្និសីទសារព័ត៌មាន ថា ឥឡូវនេះ កិច្ចព្រមព្រៀងដែលត្រូវចរចាបញ្ចប់ មានឈ្មោះថា កិច្ចព្រមព្រៀងវឌ្ឍនភាពនិងគ្រប់ជ្រុងជ្រោយ សម្រាប់ភាពជាដៃគូអន្តរប៉ាស៊ីហ្វិក (CPTPP)។
តើអ្នកបានអានអត្ថបទនេះ ឬនៅ?
ដើមឡើយ កិច្ចព្រមព្រៀង TPP ជាកិច្ចព្រមព្រៀងពាណិជ្ជកម្មសេរីដែលមាន ១២ប្រទេសចូលរួម គឺ អូស្ត្រាលី ប៊្រុយណេ កាណាដា ឈីលី ជប៉ុន ម៉ាឡេស៊ី មិចស៊ិក ញូវហ្ស៊ីឡិន ពេរូ សិង្ហបុរី សហរដ្ឋអាមេរិក និងវៀតណាម។ ប៉ុន្តែ កាលពីដើមឆ្នាំនេះ បន្ទាប់ពីលោក ដូណាល់ ត្រាំ បានឡើងកាន់តំណែងជាប្រធានាធិបតីអាមេរិក អាមេរិកបានដកខ្លួនពីកិច្ចព្រមព្រៀងនេះ។
រដ្ឋមន្ត្រីសេដ្ឋកិច្ចជប៉ុន នៅតែសង្ឃឹមថា ការបោះជំហានទៅមុខនៃកិច្ចព្រមព្រៀង TPP នាគ្រានេះ នឹងជាជំហានមួយឆ្ពោះទៅរកការទាញសហរដ្ឋអាមេរិកឲ្យត្រលប់មកចូលរួមវិញ។
ដោយមើលឃើញកំណើនឥទ្ធិពលចិននៅអាស៊ី ប្រទេសជប៉ុនបានខិតខំយ៉ាងដុតដៃដុតជើង ក្នុងការបញ្ចុះបញ្ចូលការចរចាដើម្បីកិច្ចព្រមព្រៀង TPP នេះ ដែលសំដៅលុបបំបាត់ពន្ធគយលើផលិតផលកសិដ្ឋាននិងឧស្សាហកម្មនៅក្នុងប្លុកប្រទេសទាំង១១ ដែលមានទំហំពាណិជ្ជកម្មសរុបប្រមាណ ៣៥៦ពាន់លានដុល្លារ កាលពីឆ្នាំទៅមិញ៕
