ទំហំពាណិជ្ជកម្មវៀតណាមអង់គ្លេសហក់ឡើងខ្លាំងក្រោយកិច្ចព្រមព្រៀងពាណិជ្ជកម្មសេរីចូលជាធរមាន

បើតាមរបាយការណ៍នៃក្រសួងពាណិជ្ជកម្មរបស់វៀតណាមបានឲ្យដឹងថា ទំហំពាណិជ្ជកម្មរវាងវៀតណាមនឹងអង់គ្លេសក្នុងមួយខែដំបូងប៉ុណ្ណោះនៃឆ្នាំ២០២១ មានចំនួនដល់ទៅជាង ៦៥០លានដុល្លារអាមេរិក។

ក្នុងនោះវៀតណាមនាំចេញទៅអង់គ្លេសបានកើនឡើងដល់ ៨៤% ធៀបនឹងទិន្នន័យខែមករាឆ្នាំ២០២០ ដោយគិតជាទឹកប្រាក់មានប្រមាណ ៥៩០ លានដុល្លារអាមេរិក។    

ដោយឡែក ទំនិញដែលវៀតណាមនាំចូលពីអង់គ្លេសវិញមានកំណើន ៣៤% ធៀបនឹងរយៈពេលដូចគ្នាកាលពីឆ្នាំមុន ដោយគិតជាទំហំទឹកប្រាក់មានចំនួន ៥៩លានដុល្លារអាមេរិក។

ទំនិញដែលវៀតណាមនាំចេញទៅអង់គ្លេសជាមួយនឹងការលើកលែងពន្ធស្ទើរទាំងស្រុងរួមមាន គ្រឿងសមុទ្រ អង្ករ បន្លែផ្លែឈើ ស្បែកជើង វាយនភណ្ឌ ទិន្នផលព្រៃឈើ គ្រឿងបង្គំទូរស័ព្ទ កុំព្យូទ័រ និងគ្រឿងអេឡិចត្រូនិចផ្សេងៗ។ ហើយទំនិញសំខាន់ៗដែលវៀតណាមនាំចូលពីអង់គ្លេសវិញ មានដូចជា ដែក ថ្នាំសំលាប់សត្វល្អិត និងវត្ថុធាតុដើមសំខាន់ៗមួយចំនួនទៀត។

សូមបញ្ជាក់ថា អង់គ្លេសជាប្រទេសលំដាប់ទី១៥ក្នុងចំណោមបណ្តាប្រទេសដែលមានវិនិយោគទុនច្រើនជាងគេនៅវៀតណាម ជាមួយនឹងគម្រោងវិនិយោគជាង ៤០០គម្រោង សរុបទឹកប្រាក់មានជិត៤ពាន់លានដុល្លារអាមេរិក៕