សង្គ្រាមពាណិជ្ជកម្មរវាងអាម៉េរិក និងអឺរ៉ុប ទំនងអាចនឹងផ្ទុះឡើង ក្រោយលោក ត្រាំ បានបង្ហើបអំពីការយកពន្ធថ្មីលើប្លុកនេះ

ប្រធានាធិបតីអាម៉េរិកលោក ដូណាល់ ត្រាំ បានអះអាងថា លោកនឹងដាក់ពន្ធថ្មីលើសហភាពអឺរ៉ុប ដើម្បីជាឆ្លើយតបនឹងឱនភាពពាណិជ្ជកម្មរបស់អាម៉េរិកជាមួយនឹងប្លុកនេះ ដែលបានចូលនាំចូលរថយន្ត និងផលិតផលកសិកម្មរបស់អាម៉េរិក ក្នុងចំនួនតិចតួចនៅឡើយ។ ប៉ុន្តែលោក ត្រាំ មិនបានបញ្ជាក់លម្អិតពីកម្រិតពន្ធ និងពេលវេលានៃការដាក់ពន្ធលើប្លុកនេះនៅឡើយទេ ដោយគ្រាន់តែប្រាប់អ្នកយកព័ត៌មានថា លោកនឹងប្រកាសអំពីការយកពន្ធថ្មីនេះក្នុងពេលឆាប់ៗខាងមុខនេះ។

លោក ត្រាំ បានគំរាមកំហែងដាក់ពន្ធគយលើសហភាពអឺរ៉ុប តាំងពីមុនមកម្ល៉េះ សូម្បីកាលពីថ្ងៃសុក្រ សប្ដាហ៍មុន លោកក៏បានគំរាមបែបនេះដែរ។ ចំណែកសហភាពអឺរ៉ុប បានលើកឡើងថា ប្លុកនេះ ក៏បានត្រៀមខ្លួនឆ្លើយតបយ៉ាងម៉ឺងម៉ាត់ចំពោះការសម្រេចចិត្តរបស់លោក ត្រាំ រួចហើយដែរ។

រដ្ឋមន្ត្រីឧស្សាហកម្មរបស់ប្រទេសបារាំង លោក ម៉ាក ហ្វឺរ៉េស៊ី (Marc Ferracci) បានលើកឡើងថា សហភាពអឺរ៉ុប គួរតែមានការឆ្លើយតបឱ្យបានខ្លាំងក្លា ប្រសិនបើលោក ត្រាំ ដាក់ពន្ធលើសហភាពអឺរ៉ុបមែន ដោយផ្ដោតលើផលិតផលសំខាន់ៗ ដែលជះផលប៉ះពាល់ដល់សេដ្ឋកិច្ចអាម៉េរិក ដើម្បីទាក់ទាញការចរចា។

សហភាពអឺរ៉ុប ក៏បានសម្ដែងការសោកស្ដាយចំពោះការសម្រេចចិត្តរបស់អាម៉េរិកនេះដែរ។ អ្នកនាំពាក្យគណៈកម្មការអឺរ៉ុប បាននិយាយថា នៅពេលនេះ អឺរ៉ុបមិនទាន់ដឹងពីការដាក់ពន្ធបន្ថែមលើផលិតផលអឺរ៉ុបនោះទេ។ ទំនាក់ទំនងពាណិជ្ជកម្ម និងការវិនិយោគរបស់ប្លុកនេះជាមួយនឹងសហរដ្ឋអាម៉េរិក គឺមានសារសំខាន់បំផុតនៅក្នុងពិភពលោក។ ដូច្នេះហើយពួកគេទាំងពីរគួរតែស្វែងរកការពង្រឹងទំនាក់ទំនងនេះថែមទៀត៕

អត្ថបទ៖ សុខ មង្គល