ស្របពេលប្រធានាធិបតីទី៤៧ របស់សហរដ្ឋអាម៉េរិក លោក ដូណាល់ ត្រាំ បានប្រកាសដំឡើងពន្ធគយ២៥% ភ្លាមៗលើប្រទេសម៉ិកស៊ិក និងប្រទេសកាណាដា និង១០% លើប្រទេសចិន ហើយមិនបានប៉ុន្មានក៏ប្រកាសផ្អាកដំឡើងពន្ធនេះវិញរយៈពេល៣០ថ្ងៃសម្រាប់ប្រទេសម៉ិកស៊ិក និងកាដាណា លើកលែងតែប្រទេសចិន បណ្ដាក្រុមហ៊ុនផ្គត់ផ្គង់ដល់ក្រុមហ៊ុនបច្ចេវិទ្យាយក្សនៅអាស៊ី មានការព្រួយបារម្ភថា យុទ្ធសាស្ត្ររើទីតាំងផលិតកម្មជាពិសេសរើចេញពីប្រទេសចិន មកកាន់តំបន់អាស៊ីអាគ្នេយ៍ ដើម្បីគេចផុតពីការដំឡើងពន្ធគយរបស់សហរដ្ឋអាម៉េរិក លែងគ្រប់គ្រាន់សម្រាប់កាត់បន្ថយហានិភ័យផ្នែកភូមិសាស្ត្រនយោបាយទៀតហើយ។
តួយ៉ាង នាយកប្រតិបត្តិមួយរូបរបស់ក្រុមហ៊ុនមួយដែលជាអ្នកផ្គត់ផ្គង់ដល់ក្រុមហ៊ុនយក្សអាម៉េរិក Apple និងក្រុមហ៊ុនផលិតរថយន្តអគ្គិសនី Tesla ដែលមានរោងចក្រផលិតនៅប្រទេសម៉ិកស៊ិក បាននិយាយថា ក្រុមហ៊ុនរបស់លោកពេលនេះមិនអាចសម្រេចចិត្តអ្វីបានទាំងអស់ ដោយរង់ចាំមើលសភាពការណ៍វិវត្តជាក់ស្ដែងសិន។ នាយកប្រតិបត្តិរូបនេះបានលើកឡើងថា ក្រោយឃើញសារព័ត៌មានផ្សាយថា ការដំឡើងពន្ធគយថ្មីដែលសហរដ្ឋអាម៉េរិក ដាក់លើទំនិញនាំចូលពីប្រទេសម៉ិកស៊ិក ត្រូវបានផ្អាករយៈពេល៣០ថ្ងៃ ដូចនេះអ្នកណាទៅដឹងថា នឹងមានរឿងអ្វីកើតឡើងទៀត បន្ទាប់ពីលោក ដូណាល់ ត្រាំ សន្ទនាតាមទូរសព្ទជាមួយមេដឹកនាំចិនលោក ស៊ី ជីនភីង?
សេតវិមានបាននិយាយថា ការសន្ទនាតាមទូរសព្ទរវាងប្រធានាធិបតី ដូណាល់ ត្រាំ និងប្រធានាធិបតីចិនលោក ស៊ី ជីនភីង អាចនឹងធ្វើឡើងនៅក្នុងសប្ដាហ៍នេះ ទោះជាយ៉ាងណា ក្រោយមកបន្តិចលោក ដូណាល់ ត្រាំ បាននិយាយសម្រាល ដែលទំនងជាចង់ច្រានចោលការសន្ទនានេះ។
ការប្ដេជ្ញារបស់លោក ដូណាល់ ត្រាំ ក្នុងការប្រើប្រាស់ពន្ធគយជាអាវុធ ដើម្បីដោះស្រាយបញ្ហាអតុល្យភាពពាណិជ្ជកម្មជាពិសេសនោះ បានបង្កការព្រួយបារម្ភយ៉ាងខ្លាំងសម្រាប់ខ្សែច្រវាក់ផ្គត់ផ្គង់ក្នុងវិស័យបច្ចេកវិទ្យា ជាពិសេសនៅតំបន់អាស៊ី។
គួររំឭកថា អំឡុងអាណត្តិដំបូងនៃការកាន់អំណាចរបស់លោកចន្លោះពីខែមករា ឆ្នាំ២០១៧ ដល់ខែមករា ឆ្នាំ២០២១ លោក ដូណាល់ ត្រាំ បានបញ្ឆេះភ្លើងសង្រ្គាមពាណិជ្ជកម្មដ៏ធំបំផុតមិនធ្លាប់មានចាប់តាំងពីទសវត្សរ៍ឆ្នាំ១៩៣០ មក ដោយប្រើការគំរាមកំហែង និងពន្ធគយធ្វើជាអាវុធ ដែលបណ្តាលឱ្យពិភពលោកជ្រួលច្របល់ធ្លាក់ចូលក្នុងភាពចលាចល និងទទួលរងការរិះគន់ធ្ងន់ៗពីបណ្ដាអ្នកជំនាញសេដ្ឋកិច្ចដែលគាំទ្រពាណិជ្ជកម្មសេរី៕
ដោយ: តែម សុខុម
