
មន្ត្រីនៅសេតវិមានបានប្រាប់អ្នកយកព័ត៌មានថា ការសម្រេចចិត្តដកអាម៉េរិកចេញពីក្រុមប្រឹក្សាសិទ្ធិមនុស្សរបស់អង្គការសហប្រជាជាតិនឹងធ្វើនៅមុនពេលក្រុមប្រឹក្សានេះពិនិត្យឡើងវិញនូវកំណត់ត្រាសិទ្ធិមនុស្សរបស់សហរដ្ឋអាម៉េរិកនៅក្នុងខែសីហា ដែលជាផ្នែកមួយនៃការវាយតម្លៃជាប្រចាំរបស់ខ្លួនចំពោះរដ្ឋជាសមាជិកទាំងអស់។
ការសម្រេចចិត្តរបស់លោក ត្រាំ ដកអាម៉េរិកចេញពីក្រុមប្រឹក្សាសិទ្ធិមនុស្សរបស់អង្គការសហប្រជាជាតិលើកនេះមិនមែនជារឿងថ្មីនោះទេ ពោលគឺនៅក្នុងពេលលោកកាន់អំណាចអាណត្តិមុន លោកក៏ធ្លាប់បានដកអាម៉េរិកចេញម្តងដែរ។ ការសម្រេចចិត្តដកខ្លួនរបស់សហរដ្ឋអាម៉េរិកនៅក្នុងឆ្នាំ២០១៨ ធ្វើឡើងក្រោយលោក ត្រាំ បានពិពណ៌នាថា ក្រុមប្រឹក្សានេះបានបង្ហាញពីភាពលម្អៀងពាក់ព័ន្ធនឹងបញ្ហារវាងអ៊ីស្រាអែលនិងប៉ាឡេស្ទីន និងបរាជ័យក្នុងការអនុវត្តកំណែទម្រង់។
ប៉ុន្តែនៅពេលលោក ត្រាំ អស់អំណាចរដ្ឋបាលលោក ចូ បៃដិន ក៏បានបន្តការចូលរួមរបស់សហរដ្ឋអាម៉េរិកជាថ្មី។ ឡើងកាន់តំណែងមិនទាន់បានមួយខែផង លោក ត្រាំ បានដកអាម៉េរិកចេញពីយន្តការអន្តរជាតិយ៉ាងហោចណាស់៣ គឺកិច្ចព្រមព្រៀងអាកាសធាតុក្រុមប៉ារីស អង្គការសុខភាពពិភពលោក និងកិច្ចព្រមព្រៀងពន្ធសាជីវកម្មសកល៕
ដោយៈ សរ សុជាតិ