និយ័តករបរធនបាលកិច្ច បើកសិក្ខាសាលាផ្សព្វផ្សាយ «ការទទួលស្គាល់ក្រុមហ៊ុនវាយតម្លៃក្នុងវិស័យបរធនបាលកិច្ច»

សិក្ខាសាលានេះ រៀបចំឡើង ក្នុងគោលបំណងបញ្ជ្រាបការយល់ដឹងបន្ថែមដល់សិក្ខាកាមទាំងអស់អំពីលក្ខខណ្ឌ និងនីតិវិធីនៃការទទួលស្គាល់ក្រុមហ៊ុនវាយតម្លៃ និងអ្នកជំនាញវាយតម្លៃអចលនវត្ថុក្នុងវិស័យបរធនបាលកិច្ច ក៏ដូចជាសិទ្ធិ និងកាតព្វកិច្ចរបស់ក្រុមហ៊ុនវាយតម្លៃ និងអ្នកជំនាញវាយតម្លៃ សំដៅធានាឱ្យបាននូវសុក្រឹតភាពនៃតម្លៃបរធនបាលកិច្ចដែលបានបង្កើត និងចុះបញ្ជីបរធនបាលកិច្ចក្នុងព្រះរាជាណាចក្រកម្ពុជា។

ដោយមានការអញ្ជើញចូលរួមពីតំណាងនិយ័តករពាក់ព័ន្ធក្រោមឱវាទ អ.ស.ហ. ថ្នាក់ដឹកនាំ និងសមាជិក-សមាជិកាសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា, តំណាងពីសមាគមអ្នកអភិវឌ្ឍន៍លំនៅឋានកម្ពុជា, ប្រតិបត្តិករបរធនបាលដែលជាក្រុមហ៊ុនបរធនបាល និងជាបរធនបាលរូបវន្តបុគ្គលឯករាជ្យ, ប្រតិបត្តិករបរធនបាលដែលផ្តល់សេវារក្សាសុវត្ថិភាពនិងសេវារក្សាទុក, តំណាងការិយាល័យមេធាវី និងបុគ្គលពាក់ព័ន្ធដែលផ្តល់សេវានៅក្នុងវិស័យបរធនបាលកិច្ចក្នុងព្រះរាជាណាចក្រកម្ពុជា និងមានអ្នកចូលរួមសរុបចំនួន ១៥៨ រូប។

សូមបញ្ជាក់ថា ប្រតិបត្តិការបរធនបាលកិច្ច គឺជាចំណងគតិយុត្ត ដែលក្នុងនោះបរធនបាលទាយកដែលជាម្ចាស់ទ្រព្យ បានផ្ទេរទ្រព្យសម្បត្តិទៅឱ្យបុគ្គលទី២ ហៅថាបរធនបាល ដែលជាបុគ្គលមានវិជ្ជាជីវៈ និងជំនាញ និងទទួលបានអាជ្ញាបណ្ណពីនិយ័តករបរធនបាលកិច្ច ដើម្បីធ្វើការគ្រប់គ្រង ចាត់ចែង និងថែរក្សាសុវត្ថិភាពជំនួស សម្រាប់ជាប្រយោជន៍ដល់បុគ្គលទី៣ ហៅថាអត្ថគាហកៈ៕