កិច្ចប្រជុំសន្តិភាពរបស់អ៊ុយក្រែនគ្មានលទ្ធផលជាដុំកំភួន បានត្រឹមក្លាយជាវេទិកាសម្រាប់លោកខាងលិចបរិហារកេរ្តិ៍រុស្ស៊ី

កិច្ចប្រជុំកំពូលសន្តិភាពអ៊ុយក្រែន ដែលរៀបចំនៅប្រទេសស្វីសកាលពីថ្ងៃអាទិត្យកន្លងទៅបានត្រឹមតែក្លាយជាវេទិកាសម្រាប់ប្រទេសមហាអំណាចលោកខាងលិច និងសម្ព័ន្ធមិត្តប្រើដើម្បីបរិហារសកម្មភាពលុកលុយរបស់រុស្ស៊ីលើប្រទេសអ៊ុយក្រែនតែប៉ុណ្ណោះ មិនទទួលបានលទ្ធផលអ្វីជាដុំកំភួននោះទេ។ ក្រុមប្រទេសលោកខាងលិចបានបរិហារការឈ្លានពានរបស់រុស្ស៊ីលើអ៊ុយក្រែន ប៉ុន្តែពួកគេបានបរាជ័យក្នុងការបញ្ចុះបញ្ចូលរដ្ឋមិនចូលបក្សសម្ព័ន្ធសំខាន់ៗឱ្យចូលរួមក្នុងសេចក្តីថ្លែងការណ៍ចុងក្រោយរបស់ពួកគេ ហើយគ្មានប្រទេសណាមួយចេញមុខមកធានាធ្វើជាម្ចាស់ផ្ទះកិច្ចប្រជុំកំពូលនេះបន្តពីប្រទេសស្វីសឡើយ។

ប្រទេសជាង៩០បានចូលរួមកិច្ចពិភាក្សារយៈពេលពីរថ្ងៃនៅឯរមណីយដ្ឋាន Alpine របស់ប្រទេសស្វីស តាមការអញ្ជើញរបស់ប្រធានាធិបតីអ៊ុយក្រែនលោក វ្លូឌីមៀ ហ្សេឡេនស្គី ( Volodymyr Zelenskiy ) ទោះបីជាទីក្រុងម៉ូស្គូមិនត្រូវបានអញ្ជើញក៏ដោយ។ មុននិងក្រោយកិច្ចប្រជុំកំពូលសន្តិភាពនេះដំណើរការ រុស្ស៊ីបានសើចចំអកព្រឹត្តិការណ៍នេះពីចម្ងាយ ខណៈដែលចិន និងប្រទេសមួយចំនួនមិនចូលរួម ហើយប្រទេសដែលចូលរួមខ្លះមិនព្រមចុះហត្ថលេខាលើសេចក្តីប្រកាសរួម ដែលអ្នកវិភាគលើកឡើងថា គោលបំណងដែលអ៊ុយក្រែនចង់ប្រើកិច្ចប្រជុំកំពូលនេះដាក់ឲ្យរុស្ស៊ីនៅឯកា គឺមិនបានសម្រេចតាមការគ្រោងទុកនោះទេ។

បើតាមការចុះផ្សាយរបស់សារព័ត៌មានធំៗ ប្រទេសប្រេស៊ីលបានបញ្ជូនតំណាងចូលរួមតែត្រឹមអ្នកសង្កេតការណ៍ប៉ុណ្ណោះ ហើយឥណ្ឌា ឥណ្ឌូណេស៊ី ម៉ិកស៊ិក អារ៉ាប៊ីសាអូឌីត និងអាហ្រ្វិកខាងត្បូង ដែលចូលបានចូលរួមក្នុងប្រជុំនេះ សុទ្ធតែបដិសេធមិនចុះហត្ថលេខាលើ សេចក្តីថ្លែងការណ៍រួម។

យ៉ាងណាក៏ដោយលោក ហ្សេឡេនស្គី ប្រធានាធិបតីអ៊ុយក្រែនបានចាត់ទុកកិច្ចប្រជុំនេះគឺជាការព្យាយាមឆ្លើយតបទៅនឹងការឈ្លានពានពេញលក្ខណៈរបស់រុស្ស៊ីមកលើអ៊ុយក្រែន ដែលធ្វើមិនត្រឹមតែជាមួយនឹងការការពារជីវិតមនុស្សប៉ុណ្ណោះទេ ប៉ុន្តែក៏មានវិធានការការទូតដ៏ពេញលេញផងដែរ។

លោក ឌីមីទ្រី មេតវេដេវ (Dmitry Medvedev) អតីតប្រធានាធិបតីរុស្ស៊ី បច្ចុប្បន្នជាអនុប្រធានក្រុមប្រឹក្សាសន្តិសុខរបស់ប្រទេសបាននិយាយថា គ្មាននរណាម្នាក់ក្នុងចំណោមអ្នកចូលរួមនៅក្នុងវេទិកាសន្តិភាពដឹងពីអ្វីដែលលោក ហ្សេឡេនស្គី កំពុងធ្វើ និងតួនាទីរបស់លោកនោះទេ។ទន្ទឹមនឹងនេះ គ្មានប្រទេសណាចេញមុខធ្វើជាម្ចាស់ផ្ទះនៃកិច្ចប្រជុំបែបនេះបន្តទៀតឡើយ ខណៈដែលអារ៉ាប៊ីសាអូឌីតត្រូវបានគេចាត់ទុកជាទីកន្លែងដែលអាចកើតមាននាពេលអនាគត៕

ដោយៈ សរ សុជាតិ