រដ្ឋមន្ត្រីការពារជាតិអាមេរិក លោក ឡយ អូស្ទីន(Lloyd Austin) បាននិយាយក្នុងកិច្ចប្រជុំនៅប្រទេសសិង្ហបុរីថា ទីក្រុងវ៉ាស៊ីនតោននឹងធ្វើការងាររបស់ខ្លួន ដើម្បីគ្រប់គ្រងភាពតានតឹងជាមួយប្រទេសចិន និងទប់ស្កាត់ជម្លោះផងដែរ បើទោះបីជាទីក្រុងប៉េកាំង កាន់តែបង្ហាញពីការគំរាមកំហែងនៅក្នុងតំបន់ក៏ដោយ។
ចំណែកលោក ហ្សេលេនស្គី ប្រធានាធិបតីអ៊ុយក្រែនវិញ បានថ្លែងតាមរយៈប្រព័ន្ធវីដេអូពី រដ្ឋធានីកៀវមកថា ការគាំទ្ររបស់ប្រទេសលោកខាងលិចមានសារៈសំខាន់ មិនត្រឹមតែដើម្បីកម្ចាត់ការឈ្លានពានរបស់រុស្ស៊ីប៉ុណ្ណោះទេ ប៉ុន្តែដើម្បីរក្សាសណ្តាប់ធ្នាប់ពិភពលោកដែលផ្អែកលើច្បាប់អន្តរជាតិផងដែរ។ លោកបានបន្តកត់សម្គាល់ពីការដែលរុស្ស៊ីបិទច្រកសមុទ្រខ្មៅនិងសមុទ្រ អាហ្សូវ(Azov) ដោយបង្ខាំងការនាំចេញស្បៀងអាហារអ៊ុយក្រែនទៅទីផ្សារពិភពលោកផងដែរ។
លោកហ្សេលេនស្គី បាននិយាយថា «ប្រសិនបើ ដោយសារតែការរារាំងរបស់រុស្ស៊ី យើងមិនអាចនាំចេញគ្រឿងឧបភោគបរិភោគរបស់យើងបាន នោះពិភពលោកនឹងប្រឈមមុខនឹងវិបត្តិស្បៀងអាហារធ្ងន់ធ្ងរ ប្រទេសជាច្រើននៅអាស៊ី និងអាហ្វ្រិកនឹងជួបគ្រោះទុរភិក្ស។»
បើទោះបីជា វិបត្តិសង្គ្រាមនៅអ៊ុយក្រែន ជាប្រធានបទសំខាន់ នៅក្នុងកិច្ចប្រជុំកំពូលសន្ដិសុខអាស៊ីក៏ពិតមែន ប៉ុន្ដែ ប្រទេសចិន និងសហរដ្ឋអាមេរិក បែរជាបះពារពាក្យសម្ដីគ្នាខ្លាំង ជុំវិញទៅសំណុំរឿងកោះតៃវ៉ាន់ទៅវិញ។
អត្ថបទគួរអាន
មែនទែនទៅ ទីក្រុងវ៉ាស៊ិនតោន និងប៉េកាំង បានប៉ះទង្គិចគ្នាជាញឹកញាប់ក្នុងប៉ុន្មានខែថ្មីៗនេះ ជុំវិញរឿងកោះតៃវ៉ាន់ និងកំណត់ត្រាសិទ្ធិមនុស្សរបស់ចិន និងសកម្មភាពយោធានៅសមុទ្រចិនខាងត្បូងផងដែរ។
រដ្ឋមន្ត្រីការពារជាតិចិន លោក វៃ ហ្វេងហឺ (Wei Fenghe) ប្រាប់រដ្ឋមន្ត្រីការពារជាតិអាមេរិកថា ចិននឹងមិនរារែកបន្តិចឡើយក្នុងការប្រើកម្លាំងធ្វើសង្គ្រាម ប្រសិនបើតៃវ៉ាន់ ហ៊ានប្រកាសឯករាជ្យមែននោះ។ ផ្ទុយទៅវិញ លោក ឡយ អូស្ទីន រដ្ឋមន្ត្រីការពារជាតិអាមេរិក បានប្រាប់ទៅរដ្ឋមន្ត្រីការពារជាតិចិនថា ចិនត្រូវតែឈប់បង្កបញ្ហា រករឿងកំញើញ បង្កអស្ថិរភាព អសន្តិសុខ នៅក្នុងតំបន់តទៅទៀត។ លោកឡយ អូស្ទីន បានបញ្ជាក់ប្រាប់ទៅសមភាគីចិន ថាសហរដ្ឋអាមេរិកជំទាស់ដាច់ខាត នូវរាល់ចេតនាកែប្រែ លក្ខខន្តិកៈដោយឯកតោភាគី និងបានរំលឹកឲ្យចិន ត្រូវតែឈប់រករឿងបង្កបញ្ហាជាមួយតៃវ៉ាន់។ សហរដ្ឋអាមេរិកនឹងបន្តឈរនៅជាមួយសម្ព័ន្ធមិត្តរបស់ខ្លួន រួមទាំងតៃវ៉ាន់ផងដែរ។ រដ្ឋមន្ត្រីការបរទេសអាមេរិក ថែមទាំងបានគូសបញ្ជាក់ថា គោលជំហររបស់អាមេរិក ចំពោះការគាំទ្រកោះតៃវ៉ាន់ គឺមិនដែលប្រែប្រួលឡើយ ប៉ុន្ដែ ចិនទៅវិញទេ ដែលមានការប្រែប្រួល។
រដ្ឋមន្ត្រីការពារជាតិចិន លោក វៃ ហ្វេងហឺ បានបញ្ជាក់ថា ប្រទេសចិនច្រានចោលយ៉ាងម៉ឺងម៉ាត់ចំពោះ ចំពោះការប្រមាថ ការចោទប្រកាន់ និងការគំរាមកំហែងពីសំណាក់សហរដ្ឋអាមេរិក។ លោកបន្ថែមថា ភាគីចិនស្នើទៅអាមេរិក ឲ្យបញ្ឈប់ការលាបពណ៌ និងប្រើវិធីសាស្ត្រទប់ទល់គ្រប់គ្រងចិន និងឈប់ជ្រៀតជ្រែកក្នុងកិច្ចការផ្ទៃក្នុងរបស់ចិនតទៅទៀតទៅ។ ហើយទំនាក់ទំនងរវាងអាមេរិក និងចិន មិនអាចប្រសើរឡើងបានទេ ប្រសិនបើអាមេរិក មិនព្រមបញ្ឈប់សកម្មភាពទាំងអស់នេះ។
សូមរំឭកថា កាលពីថ្ងៃទី៣០ឧសភា ចិនបានបញ្ជូនយន្តហោះចម្បាំង ចំនួន៣០គ្រឿង ហោះចូលដែនអាកាសរបស់តៃវ៉ាន់។ អាមេរិកបានស្តីបន្ទោសទៅលើចិន ថានេះគឺជាទង្វើបង្កបញ្ហា បង្កជម្លោះមកលើកោះតៃវ៉ាន់។ គួរបញ្ជាក់ដែរថា កាលពីខែមុន ក្នុងពេលទៅទស្សនកិច្ចនៅជប៉ុន លោកចូ បៃដិន បានបញ្ជាក់ថា សហរដ្ឋអាមេរិក អាចនឹងប្រើប្រាស់កម្លាំងដើម្បីការពារតៃវ៉ាន់ ក្នុងករណីដែលមានការឈ្លានពានពីចិន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
