តាមរយៈ Twitter, លោកស្រី Morgan Ortagus អ្នកនាំពាក្យក្រសួងការបរទេសអាមេរិក បាននិយាយនៅក្នុងសារវីដេអូខ្លី យ៉ាងដូច្នេះថា ៖ «សហរដ្ឋអាមេរិកមានការព្រួយបារម្ភអំពីការបង្ក្រាបជាបន្តបន្ទាប់ផ្នែកនយោបាយរបស់រដ្ឋាភិបាលកម្ពុជា ទៅលើអតីតគណបក្សសង្គ្រោះជាតិ ឬ CNRP រួមទាំងការចាប់ខ្លួនអតីតសកម្មជន CNRP ជាច្រើននាក់ នាពេលថ្មីៗនេះ។»
លោកស្រី Morgan Ortagus បានបន្តថា សហរដ្ឋអាមេរិកបន្តជំរុញរដ្ឋាភិបាលកម្ពុជា ឱ្យដកការរឹតត្បិតផ្នែកនយោបាយដែលមិនត្រឹមត្រូវ លើមនុស្សទាំងអស់នៅកម្ពុជា និងដោះលែងអ្នកទោសទាំងនោះ ដែលត្រូវបានឃុំខ្លួនដោយខុសច្បាប់ រួមទាំង លោក កឹម សុខា អតីតប្រធានគណបក្សសង្រ្គោះជាតិ ផងដែរ។
លោកស្រី Morgan Ortagus បាននិយាយដូច្នេះថា ៖ «យើងតែងតែបានទទូចឲ្យរដ្ឋាភិបាលកម្ពុជា ស្តារលទ្ធិប្រជាធិបតេយ្យពហុបក្សពិតប្រាកដ ឡើងវិញ និងការពារសិទ្ធិមនុស្ស និងសេរីភាពជាមូលដ្ឋាន ។ នេះរួមបញ្ចូលទាំងការដកចេញនូវការរឹតត្បិតហួសហេតុណាមួយទៅលើសកម្មភាពនយោបាយរបស់មេដឹកនាំប្រឆាំងទាំង ១១៨រូប។»
អត្ថបទទាក់ទង
កាលពីចុងសប្តាហ៍កន្លងទៅនេះ អាជ្ញាធរបានចាប់ខ្លួនអតីតសកម្មជនគណបក្សសង្រ្គោះជាតិចំនួន ៦នាក់ ក្រោមការចោទប្រកាន់ថា រៀបចំប្រមូលកម្លាំងធ្វើការប្រឆាំងអាជ្ញាធរ បង្កអស្ថិរភាពសង្គម បើសិនជាមេបក្សប្រឆាំង លោក សម រង្ស៊ី វិលត្រលប់មកវិញមែន នៅថ្ងៃទី៩ ខែវិច្ឆិកា។
យោងតាមសេចក្តីថ្លែងការណ៍របស់អតីតគណបក្សសង្រ្គោះជាតិ ការចាប់ខ្លួន ៦នាក់ចុងក្រោយនេះ បានធ្វើឲ្យការចាប់ខ្លួនសរុបរបស់សកម្មជនគណបក្សខ្លួន មានចំនួន ២៦នាក់ហើយ ក្នុងឆ្នាំ២០១៩នេះ។
អ្នកនាំពាក្យរដ្ឋាភិបាល មិនបានឆ្លើយតបសំណួរដើម្បីសុំការអត្ថាធិប្បាយចំពោះសេចក្តីថ្លែងការណ៍ចុងក្រោយនេះរបស់ក្រសួងការបរទេសអាមេរិកនោះទេ។
លោក សុខ ឥសាន អ្នកនាំពាក្យគណបក្សកាន់អំណាច បាននិយាយនៅថ្ងៃព្រហស្បតិ៍ ទី១៩ ខែកញ្ញានេះ ថា គណបក្សសង្រ្គោះជាតិបានក្លាយជា «ខ្មោច» រួចហើយ ដូច្នេះ មិនអាចរស់ឡើងវិញបានជាដាច់ខាត ទោះក្នុងករណីណាក៏ដោយ។
សម្រាប់អ្នកដែលត្រូវបានចាប់ខ្លួននោះ គឺជាអ្នកដែលបង្កចលាចលក្នុងសង្គម។ នេះបើយោងតាមលោក សុខ ឥសាន។
លោក សុខ ឥសាន បាននិយាយប្រាប់អ្នកសារព័ត៌មាន តាមរយៈតេឡេក្រាម ដូច្នេះថា ៖ «ការជាប់គុកនៃមនុស្សមួយចំនួន មិនមែនដោយអុចធូបទេ តែដោយសារធ្វើសកម្មភាពបង្កចលាចលនិងបាត់សណ្តាប់ធ្នាប់សាធារណៈសង្គម រំខានគេឯង។»
នាយប់ថ្ងៃពុធទី១៨ ខែកញ្ញានេះ ផងដែរ ឯកអគ្គរដ្ឋទូតអាមេរិកថ្មីប្រចាំកម្ពុជា លោក W.Patrick Murphy បានមកដល់ប្រទេសកម្ពុជាហើយ ដោយលោកបាននិយាយថា នឹងពង្រឹងទំនាក់ទំនងទ្វេភាគីឡើងវិញ រវាងកម្ពុជានិងអាមេរិក៕
