រដ្ឋសភាអាមេរិកអនុម័តសេចក្តីព្រៀងច្បាប់ ហាមឃាត់ការនាំចូលទំនិញពីតំបន់ស៊ីនជាំងប្រទេសចិន

រដ្ឋសភាជាតិអាមេរិក នៅថ្ងៃពុធបានបោះឆ្នោតគាំទ្រ ក្នុងសម្លេង ៤២៨ ទល់នឹង១សំឡេង លើសេចក្តីព្រៀងច្បាប់ថ្មីមួយដែលគេឲ្យឈ្មោះថា «ច្បាប់រារាំងការរំលោភពលកម្មជនជាតិអ៊ុយហ្គ័រ»។ ដើម្បីក្លាយជា ច្បាប់ដែលចូលជាធរមានបាន សេចក្តីព្រៀងនេះត្រូវឆ្លងកាត់ការអនុម័តពីព្រឹទ្ធសភាអាមេរិក រួចទើបតម្រូវឲ្យប្រធានាធិបតី លោកចូ បៃឌិន ចុះហត្ថលេខាដាក់ឲ្យប្រើប្រាស់។

សេចក្តីព្រៀងច្បាប់ដដែលនេះ នឹងឈានទៅហាមប្រាមការនាំចូលទំនិញទាំងឡាយណាពីតំបន់ស៊ីនជាំង ដែលជាទំនិញ ត្រូវគេកំណត់ថា ផលិតឡើងក្រោមការបង្ខិតបង្ខំ និងជិះជាន់កំលាំងពលកម្ម។ គួរបញ្ជាក់ថា ស៊ីនជាំង ជាកន្លែងដែលរដ្ឋាភិបាលក្រុងវ៉ាស៊ីនតោន តែងតែចោទទៅកាន់រដ្ឋាភិបាលប៉េកាំង ថាបានបង្កើតបណ្តាញជំរុំឃុំឃាំងដ៏ធំសម្រាប់ជនជាតិភាគតិចម៉ូស្លីមអ៊ុយហ្គ័រ និងក្រុមជនជាតិមូស្លីមផ្សេងទៀត ដើម្បីបង្ខំឲ្យធ្វើការលើសកំលាំងជាដើម។

ជារឿយៗ ចិនតែងច្រានចោលការចោទប្រកាន់ទាំងនេះ ពិសេសការចោទប្រកាន់ដោយវ៉ាស៊ីនតោន ថាក្រុងប៉េកាំងចង់ប្រព្រឹត្តិអំពើប្រល័យពូជសាសន៍លើជនជាតិអ៊ុយហ្គ័រ។

យ៉ាងណាមិញ ការជំនុំជម្រះក្តីក្រៅផ្លូវការមួយកាលពីថ្ងៃព្រហស្បតិ៍ ដែលរៀបចំដោយសកម្មជនសិទ្ធិមនុស្សអ៊ុយហ្គ័រ ក្រោមការដឹកនាំដោយចៅក្រមជនជាតិអង់គ្លេសមួយរូប បានប្រកាសថា រដ្ឋអំណាចចិន ពិសេសលោកស៊ី ជីនពីង ត្រូវតែទទួលខុសត្រូវលើការប្រល័យពូជសាសន៍ អំពើឧក្រិដ្ឋកម្មមនុស្សជាតិ និងការគាបសង្កត់លើជនជាតិភាគតិចអ៊ុយហ្គ័រ។ នេះបើតាមការរាយការណ៍ដោយសារព័ត៌មានរ៉យទ័រ។

ភាគីចិនភ្លាមៗនៅថ្ងៃព្រហស្បតិ៍ បានចេញមកច្រានចោលការកាត់ក្តីខាងលើនេះ ដោយបាននិយាយថា អ្នកទាំងនេះគ្មានសិទ្ធិអំណាចអ្វីមកចោទប្រកាន់ និងដាក់សម្ពាធលើចិននោះឡើយ។ ហើយចិន បានចាត់ទុក ក្រុមសកម្មជនសិទ្ធិមនុស្សអ៊ុយហ្គ័រ ដែលបានប្តឹង និងរៀបចំការកាត់ក្តី ទាក់ទងឧក្រិដ្ឋកម្មនេះ គ្រាន់តែជាក្រុមចង់ផ្តាច់ខ្លួនពីការគ្រប់គ្រងរបស់ចិន និងបានទទួលលុយពីក្រុមលោកខាងលិច ព្រមទាំង សហរដ្ឋអាមេរិកដែលប្រឆាំងនឹងចិនប៉ុណ្ណោះ៕