ក្នុងសន្និសីទកាសែតមួយនៅថ្ងៃអង្គារសប្ដាហ៍នេះ នៅរដ្ឋធានីរបស់ឥណ្ឌា រដ្ឋមន្ត្រីការពារជាតិអាមេរិកលោក Mark Esper និងសមភាគីឥណ្ឌាលោក Rajnath Singh បានប្រកាសឲ្យដឹងអំពីការចុះហត្ថលេខាលើកិច្ចព្រមព្រៀងផ្លាស់ប្តូរនិងកិច្ចសហប្រតិបត្តិការមូលដ្ឋាន (BECA) ដែលបើកផ្លូវដល់ការបង្កើនការចែករំលែកព័ត៌មានកាន់តែច្រើនថែមទៀត និងកិច្ចសហប្រតិបត្តិការការពារជាតិ រវាងប្រទេសទាំងពីរ ។
រដ្ឋមន្ត្រីការពារជាតិអាមេរិក លោក Esper បានមានប្រសាសន៍ថា “ទំនាក់ទំនងការពារជាតិរវាងប្រទេសយើងទាំងពីរ [អាមេរិក-ឥណ្ឌា] នៅតែជាសសរស្តម្ភដ៏សំខាន់នៃទំនាក់ទំនងទ្វេភាគីរបស់យើង។ ផ្អែកលើគុណតម្លៃរួមនិងផលប្រយោជន៍រួមរបស់យើង យើងគាំទ្ររួមគ្នាដើម្បីគាំទ្រឥណ្ឌូ-ប៉ាស៊ីហ្វិកដោយសេរីនិងបើកចំហ សម្រាប់ទាំងអស់គ្នា ជាពិសេស នៅចំពោះមុខសកម្មភាពឈ្លានពានដែលកើនឡើង និងការបង្កអស្ថិភាពពីសំណាក់ប្រទេសចិន។"
រដ្ឋមន្ត្រីការពារជាតិឥណ្ឌា លោក Singh បាននិយាយថា កិច្ចព្រមព្រៀងនេះបានពង្រឹងបន្ថែមនូវការប្តេជ្ញាចិត្តរបស់ភាគីទាំងពី [ឥណ្ឌា-អាមេរិក] ក្នុងការធានា"ការអនុវត្តច្បាប់និងសេរីភាពនៃការធ្វើនាវាចរណ៍នៅលើសមុទ្រអន្តរជាតិ" ទន្ទឹមគ្នានឹង "ការថែរក្សាបូរណភាពទឹកដីនិងអធិបតេយ្យភាពរបស់រដ្ឋទាំងអស់ ។"
អត្ថបទទាក់ទង
ទាំងឥណ្ឌានិងអាមេរិកគ្រោងនឹងចូលរួមសមយុទ្ធនាវាចម្បាំង ម៉ាឡាបា ដែលនឹងត្រូវធ្វើឡើងនៅមហាសមុទ្រឥណ្ឌា នៅខែក្រោយនេះ ។ សមយុទ្ធនេះនឹងបង្ហាញពីសមាជិកទាំងអស់នៃសម្ព័ន្ធមិត្រ Quad ដែលជាសម្ព័ន្ធមិត្តក្រៅផ្លូវការរបស់សហរដ្ឋអាមេរិក ឥណ្ឌា ជប៉ុន និង អូស្ត្រាលី ដែលត្រូវបានមនុស្សមួយចំនួនហៅថា “NATO នៅអាស៊ី” ដែលបង្កើតឡើងក្នុងគោលបំណងប្រឆាំងតបតនឹងកម្លាំងយោធារបស់ចិន នៅក្នុងតំបន់។
នៅក្នុងកិច្ចប្រជុំមួយរបស់ Quad កាលពីដើមខែនេះ នៅទីក្រុងតូក្យូ ប្រទេសជប៉ុន រដ្ឋមន្រ្តីការបរទេសអាមេរិកលោក Mike Pompeo បាននិយាយប្រឆាំងនឹង“ការបិទបាំងរបស់បក្សកុំម្មុយនិស្តចិន” នៅក្នុងដំណាក់កាលដំបូងៗនៃជំងឺរាតត្បាតកូរ៉ូណា និងបាននិយាយថា “ឥឡូវនេះ គឺសំខាន់ជាងពេលណាៗទាំងអស់ ដែលយើងត្រូវសហការគ្នាដើម្បីការពារប្រជាជននិងដៃគូរបស់យើងពីការកេងប្រវ័ញ្ច អំពើពុករលួយ និងការបង្ខិតបង្ខំរបស់ [បក្សកុំម្មុយនិស្តចិន] CCP ។"
ទន្ទឹមនឹងការវិវឌ្ឍថ្មីជុំវិញកិច្ចព្រមព្រៀងវិស័យយោធារវាងអាមេរិកនិងឥណ្ឌា និងសមយុទ្ធនាវាចម្បាំងនៅមហាសមុទ្រឥណ្ឌានាខែក្រោយនេះ សារព័ត៌មានផ្លូវការរបស់ចិនក៏ឆ្លើយតបដោយវោហារសាស្ត្រខ្លាំងៗផងដែរ ។
នៅក្នុងបទអត្ថាធិប្បាយមួយនៅសប្តាហ៍នេះ ទីភ្នាក់ងារព័ត៌មានរដ្ឋចិន ស៊ីនហួ បានប្រកាសថ្កោលទោសការធ្វើសមយុទ្ធម៉ាឡាបា ក្នុងពេលឆាប់ៗនេះ ដោយនិយាយថា នេះជាភ័ស្ដុតាងបង្ហាញថា "Quad កំពុងធ្វើកិច្ចសហប្រតិបត្តិការខាងយោធានិងសន្តិសុខ ដើម្បីផលប្រយោជន៍នយោបាយបម្រើខ្លួនឯង ។"
ស៊ីនហួ បាននិយាយថា "សមាជិក Quad ចាំបាច់ត្រូវដឹងថា ការប៉ុនប៉ងដើម្បីដាស់តឿនគូប្រជែងនៅក្នុងតំបន់ គឺផ្ទុយនឹងនិន្នាការនៃសម័យកាល ហើយនឹងមិនត្រូវបានទទួលយកដោយប្រទេសធំៗនៅលើពិភពលោកឡើយ ។ ការប៉ុនប៉ងរបស់ប្រទេសខ្លះក្នុងការផ្សព្វផ្សាយផ្នត់គំនិតនៃសង្គ្រាមត្រជាក់ និងបង្កើតភាពវឹកវរនៅក្នុងតំបន់ គឺប្រៀបបីដូចជាពួកគេនឹងបាញ់ជើងខ្លួនឯងតែប៉ុណ្ណោះ ។"
នៅក្នុងសំណេរលើបណ្តាញសង្គម Twitter នាសប្ដាហ៍នេះ ឆ្លើយតបទៅនឹងអត្ថបទនៅក្នុងប្រព័ន្ធផ្សព្វផ្សាយឥណ្ឌា អំពីរបៀបដែល រដ្ឋាភិបាលក្រុងដេលី គួរឱបក្រសោបសម្ព័ន្ធមិត្ត Quad អ្នកការទូតចិន លោក Li Bijian បានសួរថា "តើអ្នកដឹងទេថា តើនឹងមានអ្វីកើតឡើងបន្ទាប់ពីការលេងជាមួយភ្លើង?" ៕ (ប្រភព ៖ CNN)
