នាវាចម្បាំងរបស់កងទ័ពជើងទឹកអាម៉េរិកនឹងចូលចតនៅកំពង់ផែក្រុងព្រះសីហនុ

ក្រសួងការពារជាតិរបស់កម្ពុជាបានបញ្ជាក់ក្នុងសេចក្តីប្រកាសព័ត៌មានរបស់ខ្លួនថា តបតាមសំណើរបស់សហរដ្ឋអាម៉េរិកក្នុងការចូលសំចតនាវា និងដោយទទួលបានការឯកភាពពីក្រសួងការពារជាតិកម្ពុជា នាវាចម្បាំងកងទ័ពជើងទឹករបស់សហរដ្ឋអាមេរិកឈ្មោះ USS SAVANNAH (LCS 28) ដែលមាននាវិកសរុបចំនួន១០៣នាក់នឹងចូលសំចតនៅកំពង់ផែស្វយ័តក្រុងព្រះសីហនុ ខេត្តព្រះសីហនុចាប់ពីថ្ងៃទី១៦ ដល់ថ្ងៃទី២០ ខែធ្នូ ឆ្នាំ២០២៤។

បើគិតចាប់តាំងពីឆ្នាំ២០០៧ មាននាវាកងទ័ពជើងទឹកអាម៉េរិកចំនួន២៧គ្រឿងបានចូលចតនៅកម្ពុជា។ ប៉ុន្តែលើកនេះការចូលចតលើកទី១ បន្ទាប់ពីពួកគេបានអាក់ខានអស់រយៈពេល៨ឆ្នាំកន្លងមកនេះ។ នៅក្នុងពេលសំចតនៅកម្ពុជារយៈពេល៥ថ្ងៃនេះ គណៈប្រតិភូនាវានេះ នឹងរៀបចំផែនការសកម្មភាពជាច្រើន ដើម្បីជំរុញឱ្យមានការផ្លាស់ប្តូរវប្បធម៌ និងកិច្ចសហប្រតិបត្តិការ។ តាមការគ្រោងទុកក្រុមនាវិករបស់នាវានឹងជួបពិភាក្សាការងារជាមួយមេបញ្ជាមូលដ្ឋានសមុទ្ររាម និងថ្នាក់ដឹកនាំខេត្តព្រះសីហនុជាដើម។

បន្ថែមលើនេះ ក៏មានការរៀបចំកម្មវិធីប្រកួតកីឡាមិត្តភាពរវាងក្រុមនាវិករបស់នាវាចម្បាំងសហរដ្ឋអាម៉េរិក និងកងទ័ពជើងទឹកកម្ពុជា ដើម្បីលើកកម្ពស់ភាពស្និទ្ធស្នាល និងពង្រឹងសាមគ្គីគ្នាជាក្រុម និងមានកម្មវិធីជាលក្ខណៈមិត្តភាពមួយចំនួនទៀតផងដែរ៕

អត្ថបទ៖ ឈួន ហ្គេកហ័ង